Kusintii Andunya 42

Zakɔbu í bɛ amaɛ ŋa Ezibiti

1Zakɔbu í gbɔ iyi ijɛ í wa ilɛi Ezibiti, ŋɔi í sɔ̃ amaɛ ŋa í ni, na mii í ce ì waa tɔtɔɔ nŋɛ ihɛ̃ ì waa cɔ njɛ ŋa. 2Ǹ gbɔ à ni ijɛ ku ta í wa Ezibiti. I faaba i koo i ra nwa wa ŋa. I maà jɔ̀ ka ku do ari.

3Nɔ igbã mɛɛwai Zozɛfu ŋau à dede à bɔ Ezibiti ijɛ ku ra. 4Amma Zakɔbu kù jɛ Bɛnzamɛɛ, ifɔi Zozɛfuu ku too ŋa, domi wa ce njo laalɔ gɔ ku maà na ku baa. 5Nɔ amai Zakɔbu ŋau à bɔ ijɛ ku ra ilɛi Ezibiti do inɛi Kanaã gɔ ŋa mɔ, domi ariu í teese wa buui si ilɛi Kanaã fei.

Zozɛfu wa ce kugaabu si wajui igbãɛ ŋa

6Zozɛfui í jɛ inɛ ngboi ilɛu. Nŋui í ya maa taa inɛ njoo do ilu ide ŋa fei ijɛ. Nɔ igbãɛ ŋau à to wa à naa à sɛɛbata si wajuɛ bɛrɛrɛ. 7Hai í yɛ igbãɛ ŋau gbakã í mà ŋai, amma í cei bɛi inɛ iyi kù mà ŋa. Nɔ wa ba ŋa ide ku fɔ do kugaabu. Í bee ŋa í ni, hai iwoi ì waa naa ŋa. Nɔ à jɛaa à ni, hai ilɛi Kanaãi à naa ijɛ ku ra.

8Baa do iyi Zozɛfu njɛ í mà ŋa, aŋa de a kù màa. 9Nɔ Zozɛfu í ye gigii ala ŋa iyi í ce na iri nŋau. Nɔ í sɔ̃ ŋa í ni, iŋɛ woo zamba ŋai. Ì naa ilɛu ku cɔ ŋai ku ba i mà tengi bii gbugbã ku kua nwa í wa ŋa. 10Nɔ à jɛaa à ni, aawo Lafɛ̃ɛ. Ijɛ dei à naa ku ra. 11Awa fei amai baa akã mbɛ. Ntɔi à waa fɔ, woo zamba inɛ kù wa si inɔ nwa baa akã. 12Nɔ Zozɛfu í yɔsi ŋa iju. Í ni, iŋɛ woo zamba ŋai. Ì naa ku cɔ tengi bii gbugbã ku kua nwa í wa ŋai. 13Nɔ à wasi ku ni, awa woo ce icɛɛ ŋa, awa amai baa akã ŋa mbɛ, hai ilɛi Kanaãi à naa. Awa maateejii à bí wa amma inɛ iyi í jɛ kɔdaa nwa kù naa, inɛ nŋu í gbe ide bi baa nwa. Inɛ akã mɔ kù wɛɛ. 14Nɔ Zozɛfu í ni, iboi ì waa sɔ ŋa, iŋɛ woo zamba ŋai. 15Nsɛi í gbe n cɔ laakai nŋɛi. Do gbugbãi Faraɔ̃i ǹ wa n sɔ̃ ŋɛ ideu ihɛ̃, nɔ ifɔ nŋɛu kù naa ihɛ̃ i kaa nɛ ŋa pai. 16I bɛ inɛ akã nŋɛ koo gbãa wa, nɔ iŋɛ iyi ì gbe ŋau mɔ n dasi ŋɛ ile piisɔ̃ɔ. Nŋu bɛi á jɔ̀ n mà bii ì waa fɔ ntɔ ŋa. Bii kù jɛ bɛɛbɛ, do gbugbãi Faraɔ̃ ǹ ni iŋɛ woo zamba ŋai.

17Nɔ í koo í cĩmbo aŋa fei zakai ajɔ mɛɛta. 18Nɔ si ajɔ mɛɛtasiau í sɔ̃ ŋa í ni, mii iyi ǹ wa n bi n ce nŋɛ wee ku ba i ba faaba ŋa, domi ǹ mà bɛɛrɛi Ilaaɔ̃. 19Bii í jɛ ntɔi ì waa fɔ ŋa, i jɔ̀ inɛ akã nŋɛ ile piisɔ̃ɔ ihɛ̃ ŋa. Nɔ iŋɛ iyi ì gbe ŋau i so ijɛ i bɔò ide na irii inɛ ŋa iyi à wa si ari ide. 20Nɔ bii ì waa nyi wa ŋa, i gbã ifɔ nŋɛu wa, ku ba n mà iyi ntɔi ì fɔ ŋa, nɔ i fita si iku ŋa.

Nɔ igbãɛ ŋau à jɛsi ideu. 21Ŋɔi à waa fɔ aŋa duusɔ̃ɔ à waa ni, à yɛ ijuukpã na irii ifɔ nwa. Bɔ̃nɛ iyi à ceaai í sɔ si wa, domi waati iyi wa tɔɔ wa suuru, à kɔ̀i. Na ŋɔi í jɔ̀ awa mɔ à waa yɛ bɔ̃nɛ nnyi.

22Nɔ inɛ akã nŋa iyi à ya kpe Rubɛ̃ɛ í ni, ǹ jɔ ǹ sɔ̃ ŋɛ ǹ ni ka maà cea Zozɛfu dimii laalɔu bɛ ya. Amma i kù jɛ idem nɔu ku gbɔ ŋa. To, bɛbɛi awa mɔ aa ka yɛ ijuukpãɛi.

23Igbã ŋau a kù mà mà Zozɛfu wa gbɔ iyi aŋa à waa fɔ, domi waati iyi Zozɛfu wa ba ŋa ide ku fɔu wo, do fee mmui, inɛ gɔi í ya maa tusɛ nŋa. 24Ŋɔi Zozɛfu í dede hai bi tu ŋa bɛ í koo í kpata titã.

Amai Zakɔbu ŋa à nyi ilɛi Kanaã

Waati iyi Zozɛfu í kpata í tã ŋɔi í nyi wa bi tu ŋa má, nɔ í ba ŋa ide ku fɔ. Si anyiɛ nɔ í jɔ̀ à mu Simeɔ̃ à dũu nɔ à koo à cĩmboɛ hai iju nŋa bɛ. 25Nɔ í ni a da nŋa si ijɛ ŋa si saaki nŋa ŋa, nɔ a sindo si fiai aŋa fei si saaki nŋa ŋa, nɔ a na ŋa kosĩa a jɛ a maa nɛò. Nɔ à na ŋa. 26Ŋɔi inɛ ŋau à kãa gbankɛlɛ nŋa ŋa aso ŋau nɔ à nɛ.

27Waati iyi idũ í dũ ŋɔi à koo à leekĩ. Iyi inɛ akã í fũ saakiɛ, wa bi ku bu ijɛ ku na gbankɛlɛɛ ŋɔi í ba wee fiaɛ wa lesi bɛ. 28Nɔ í sɔ̃ inɛ ŋa iyi à gbe í ni, à sindoom fiam wa í wa si inɔ saakim ihɛ̃. Ŋɔi aŋa fei à biti à waa yaya do njo. À waa ni, mii Ilaaɔ̃ wa ce nwa bɛ ihɛ̃.

29Iju kumáɛ, ŋɔi à mɔsi isɛɛnɛ nŋa má. Iyi à to ilɛi Kanaã bi baa nŋau nɔ à sisiaa mii iyi í ce fei. 30À ni, inɛ iyi wa jɛ inɛ ngboi ilɛu, do kugaabui í ba waò ide ku fɔ. Í ni awa woo zamba ŋai. 31Nɔ awa mɔ à jɛaa à ni, a kù jɛ woo zamba ŋa, awa inɛ jiida ŋai. 32Awa iyi à jɛ amai baa akã ŋa awa maateejii, amma inɛ akã nwa kù wɛɛ, nɔ inɛ iyi í jɛ kɔdaa nwa inɛ nŋu í gbe ide bi baa nwa ilɛi Kanaã. 33Nɔ inɛɛu í ni nŋu ku bɛi ku mà iyi awa inɛ jiida ŋai, ka jɔ̀a nŋu inɛ akã nwa, nɔ ka so ijɛ ka bɔa inɛ nwa ŋa iyi à wa si ari ide. 34Nɔ ka gbã ifɔ nwau ka naaɛ wa ku cɔ. Si bɛɛbɛ á mà iyi awa inɛ jiida ŋai do ntɔ, a kù jɛ woo zamba. Nɔ ku sindo nwa Simeɔ̃. Nɔ ku jɔ̀ ka dabii si ilɛu ka ce wũa nwa ŋa si laakai nwa.

35Iyi à koo à waa tu amaajɛ nŋa ŋau nɔ inɛ fei í yɛ fiaɛ si saakiɛ nɔ zigii aŋa fei í da hee do Zakɔbu baa nŋau fei. 36Nɔ Zakɔbu í sɔ̃ ŋa í ni, ama minjii ì nya hai si awɔm bɛ ŋa. N kù waa Zozɛfu má nɔ n kù waa Simeɔ̃ mɔ má. Nɔ ì waa bi i so Bɛnzamɛɛ sim má ŋa. Sim nii fei ndɛɛ fei wa cuku si.

37Ŋɔi Rubɛ̃ɛ í sɔ̃ baa nŋau í ni, bii n kù baaò Bɛnzamɛɛ wa, bii ì bi, kpa ama minjim ŋau. Jɔ̀ n kooòɛ, an baaɛ wa. 38Amma Zakɔbu í ni, aawo. Amam kaa too ŋɛ. Igbãɛ kù wɛɛ, nŋu akãi í gbeem. Bii laalɔ gɔ í baa má si isɛɛnɛ nŋɛu ni, si bɛi ǹ gbou ihɛ̃, tilasii an ku do ara kuro na irii kurara nŋɛ.

Currently Selected:

Kusintii Andunya 42: MKL

Highlight

Copy