Kusintii Andunya 43

Zakɔbu í jɛsi Bɛnzamɛɛ ku koo

1Si bɛi ariu í la wa kɔ̃ɔsi si ilɛi Kanaã, 2nyaanzei Zakɔbu ŋau à jɛ sɔnda iyi à baaò wa hai ilɛi Ezibitiu fei. Nɔ Zakɔbu í sɔ̃ amaɛ ŋa í ni a nyi a koo a ra mii ku jɛ keeke wa hai bɛ má.

3Amma Zudaa í jɛaa í ni, inɛ ngboi Ezibitiu í sɔ̃ wa wo ntɔ ntɔ í ni nŋu kaa gba wa bii kù jɛ ifɔ nwau í wa inɔ nwa. 4Na nŋu, bii aa jɔ̀ Bɛnzamɛɛ ku si wa fei, aa ka koo kaa ra mii ku jɛ wa. 5Amma bii i kaa jɔ̀ ku si wa, awa mɔ a kaa ka koo má, domi inɛɛu í sɔ̃ wa í ni bii ifɔ nwau kù wa si inɔ nwa nŋu kaa gba wa. 6Nɔ Izirɛli í ni, bɛirei í ce ì ce lasabu awɔ anyi, ì sɔ̃ inɛɛu ì ni ì nɛ ifɔ mmu gɔ í wa ide má ŋa. 7Amma à jɛaa à ni, inɛɛui í wasi ku bee wa ide nkpɔ nkpɔ. Í bee yaasei awa taka nwa do yaasei nyaanze nwa. Í bee wa í ni, baa nŋɛ í wɛɛ hee nsɛi? Ì nɛ ifɔ gɔ má ŋa? Nɔ awa mɔ à jɛaa ide ŋa iyi wa bee wau fei. Bɛirei aa ka ce ka mà mà njɛ á ni kaa gbã ifɔ nwa wai.

8Ŋɔi Zudaa í sɔ̃ Izirɛli baa nŋau má í ni, jɔ̀ ifɔ nwau ku too wa ku ba ka dede nɔ ka koo. Do yaase bɛɛbɛ aa ka wɛɛ si hunde a kaa ka ku, awa do awɔ takaɛ do ama nwa ŋa. 9An na aram si fei ndɛɛ ku jɛ idei irim, bɛi í na í jɛ fei aa yɔkɔ i beem. Bii n kù baaɛ wa an jɛ ilu taale bi tɛɛ hee do ajɔ fei. 10Bii í jɛ i kù jɔ̀ a kù kpɛ ihɛ̃ do kakɔɔ ku ce wo, bii í wa, aa ka koo ku to baa isɛ gbeeji, kukoo do kubaa, kukoo do kubaa.

11Ŋɔi Izirɛli í sɔ̃ ŋa í ni, si bɛi tilasii i gbã Bɛnzamɛɛ ŋa, á sĩa i ce iyi ihɛ̃ ŋa. Bii ì waa koo ŋa i dɛ mii jiidai ilɛ nwa ihɛ̃ i dasi saaki nŋɛ ŋa i koo i cea inɛi Ezibitiu amua ŋa. I dɛdɛ delii jĩi ikã ikã iyi à dɔ̃ inunu ŋa do jĩnɛi ayɛ ŋa, nɔ i so nyikɔ̃ do isoi jĩi ndii ilɛ nwa ŋau ihɛ̃ iyi à ya kpe pisitasi do amandi. 12I so fia mmuɛ má ŋa, nɔ i nyiò fia iyi ì yɛ si inɔ saaki nŋɛ ŋau, domi á yɔkɔ ku jɛ inɛɛu í rarai. 13Bɛbɛi i gbã ifɔ nŋɛu nɔ i dede i nyi bi inɛi Ezibitiu ŋa. 14Aɔ̃ Lafɛ̃ɛ ilu gbugbã fei ku jɔ̀ inɛɛu ku ce araare nŋɛ, nɔ ku jɔ̀ iŋɛ do Bɛnzamɛɛ do igbãɛ i baa ŋa. Bi ti amu, bɛbɛi bii ǹ kua amam ŋa, kù jɛ taale.

Njɛ ku yɛ isɛ gbeejisiai Zozɛfu do igbãɛ ŋa

15Ŋɔi amai Zakɔbu ŋau à so amua ŋau, nɔ à so fia mmuɛ do ti tako iyi à yɛ si saaki nŋau, nɔ à gbã Bɛnzamɛɛ ifɔ nŋau à dasi kpãa. Iyi à to nɔ à koo bi Zozɛfu. 16Iyi Zozɛfu í yɛ Bɛnzamɛɛ í wa inɔ nŋa, í sɔ̃ inɛ ngboi woo ce icɛi kpasɛ̃ɛ í ni, gbã inɛ ŋau bɛ i bɔò ŋa kpasɛ̃m, kpa mɛɛmu akã nɔ i ce ijɛ, domi awaò ŋai aa ka jɛ dasãi.

17Ŋɔi inɛɛu í ce bɛi Zozɛfu í fɔu, í gbã inɛ ŋau í bɔò ŋa kpasɛ̃. 18Nɔ njo wa mu ŋa, si na iyi í jɔ̀ à gbã ŋa à waa bɔò ŋa kpasɛ̃i Zozɛfuu. À ni, á jɛ na irii fia iyi à sindo si saaki nwa waati iyi à tako à naaui í jɔ̀ à gbã wa à waa bɔò wa kpasɛ̃. Aa koo a lɔsi ku kpã wa iju mbɛ, aa gba gbankɛlɛ nwa ŋa nɔ a mu wa aru. 19Waati iyi à to wa andɛ koofau, ŋɔi à tɛkɛɛ si inɛɛu à sɔ̃ɔ à ni, 20ce nwa suuru lafɛ̃ɛ, domi à tako à naa ihɛ̃ bɛ tã wo à naa à ra mii ku jɛ. 21Ŋɔi à sinda à waa nɛ nɔ à koo à leekĩ à waa bi ka sũ. Nɔ iyi à fũ andɛi saaki nwa ŋa, à ba wee fiai awa fei í wa andɛi saaki nwa ŋau zakai bɛi awa fei à ra. Wee à nɔ à mu fiau à nyiò wa ihɛ̃. 22Wee à nɔ à waa mu fia mmuɛ wa má iyi aa ka raò mii ku jɛ mmuɛ má. A kù nɔ a kù mà inɛ iyi í tako í sindo nwa fia nwa ŋau si saaki nwa ŋa wo. 23Woo ce icɛi Zozɛfuu í jɛ nŋa í ni, i wɛɛ si laakai nŋɛ. I maa jɔ̀ zigi nŋɛ ku da. Ilaaɔ̃, nŋu iyi iŋɛ do baa nŋɛ ì waa tɔɔ ŋa, nŋui í da nŋɛ si fiau bɛ si saaki nŋɛ. Amma fia nŋɛu amui ǹ gbaa ihɛ̃.

Si anyiɛ, ŋɔi inɛɛu í koo í nya Simeɔ̃ wa hai ile piisɔ̃ɔ, 24nɔ í jɔ̀ aŋaò ŋa fei à lɔ kpasɛ̃i Zozɛfu. Í na ŋa inyi nɔ aŋa fei à wiɛ kutɛ nŋa. Nɔ í na gbankɛlɛ nŋa ŋau mɔ ijɛ. 25À teese à waa jilɛ amua ŋa iyi à naaò wau hee Zozɛfu ku maa baa dasã, domi à sɔ̃ ŋa à ni bɛi aa jɛ dasãu. 26Iyi Zozɛfu í baa ide, à náa amua nŋa ŋau nɔ aŋa fei à sɛɛbata si wajuɛ. 27Si anyiɛ, ŋɔi Zozɛfu wa bee baani nŋa í ni, mɔkɔ ngbo nŋɛ iyi ì sɔ̃m ideɛ ŋau wa nɛ baani? Í wɛɛ si hunde hee nsɛi? 28Ŋɔi à jɛaa à ni, baa nwa woo ce icɛɛu wa nɛ baani, í wɛɛ si hunde baa nsɛi. Nɔ à sisi à sɛɛbataa má. 29Ŋɔi Zozɛfu í yɛ Bɛnzamɛɛ ifɔi nŋu takaɛ iyi aŋaò à jɛ iye akãu, nɔ í ni, debɛi ifɔ nŋɛ iyi ì sɔ̃m ideɛui ihɛ̃ ŋa? Í sɔ̃ Bɛnzamɛɛ í ni, Ilaaɔ̃ ku weeɛ.

30Ŋɔi idɔɛ í nɛ kubii ifɔɛ jiida jiida hee cikãaju wa baa hai si ijuɛ. Nɔ í fa araɛ gbãa gbãa í bɔ ilaawaɛ í koo í kpata. 31Iyi í tã nɔ í wɛɛju í bɛi í fita wa, nɔ wa ce kookaai bɛi kaa ce ku kpata má í bɛi í ni a kpɛ̃ ijɛu. 32Nɔ Zozɛfu í nya araɛ í buba ikã, igbãɛ ŋa do ifɔɛ mɔ ikã, inɛi Ezibiti ŋa iyi à kpe ku jɛ bɛu mɔ ikã, domi inɛi Ezibiti ŋau a kaa yɔkɔ à jɛ do inɛi Ebɛɛ ŋau ajɔ, si na iyi í jɔ̀ à waa cɔ ŋa ilu riisi ŋa. 33Igbãi Zozɛfu ŋau do ifɔɛu à buba si wajuɛ nɔ à mɔ njɛ hai bi inɛ ngbou hee í koo í kãsi ifɔ nŋau, nɔ aŋa fei à waa cɔ njɛ à biti. 34Zozɛfu í so ijɛ ŋa iyi wa jilɛ si wajuɛu í jilɛ nŋa, nɔ í jilɛa Bɛnzamɛɛ ifɔɛu zaka bɛi í jilɛa igbãɛ ŋau ikɔ miiu. Aŋa fei à jɛ à mɔ nɔ à wɛɛò inɔ didɔ̃ ntɔ ntɔ.

Currently Selected:

Kusintii Andunya 43: MKL

Highlight

Copy