Kusintii Andunya 35

Zakɔbu í dede hai Sikɛmu í nɛ Betɛli

1Nɔ Ilaaɔ̃ í sɔ̃ Zakɔbu í ni, dede i koo i buba Betɛli, nɔ i maam bi kuwee bɛ, tengi bii ǹ naa siɛu wo si waati iyi ì waa saa Esau igbãɛ.

2Nɔ Zakɔbu í sɔ̃ inɛi kpasɛ̃ɛ ŋa do inɛ ŋa iyi à wa bi tɛɛ fei, í ni, i nyɔ iwɛ̃ nŋɛ ŋa iyi ì nɛu. I ce buki iyi á jɔ̀ i maaju ŋa, nɔ i kpaasi ibɔ nŋɛ ŋa. 3I ce sɔɔlu ka nɛ Betɛli. An koo n maa Ilaaɔ̃ bi kuwee, nŋu iyi í gbɔ kutɔɔm si waati iyi ǹ wa si wahala, nɔ í wɛɛ do amu tengi bii ǹ bɔ fei.

4Nɔ à na Zakɔbu andi iwɛ̃ nŋa ŋa iyi à nɛ fei, hee do hanlaga#35:4 hanlaga Á yɔkɔ ku jɛ hanlaga ŋa iyi à waa fãa ŋau ihɛ̃, a kù jɛ hanlaga alala, hanlaga ŋau, hanlaga ku tɔtɔɔò iwɔ ŋai. nŋa ŋa fei, nɔ í tu isa í si ŋa si icui jĩi nla gɔ bɛ kɔkɔi Sikɛmu. 5Si ajɔ iyi Zakɔbu do amaɛ ŋa à dede hai iluu à waa nɛ, Ilaaɔ̃ í jɔ̀ njo nla nla í mu inɛi ilu ŋa iyi à wa kɔkɔ nŋa ŋau, nɔ inɛ kãma kaa jɛ ku hãmɛɛ ŋa do taale gɔ.

6Zakɔbu do inɛɛ ŋa à to Luzi waatɔ Betɛli, si ilɛi Kanaã. 7Nɔ í ma bi kuwee, nɔ í kpe inyau Eli-Betɛli#35:7 Eli-Betɛli Yaasei iriui í jɛ Ilaaɔ̃ í wa Betɛli.. Í kpoo bɛɛbɛi domi tengi bɛi Ilaaɔ̃ í naa siɛ wo si waati iyi wa saa Esau igbãɛ.

8Ŋɔi Debora inaabo woo ce icɛ iyi í bíi Rebeka í ku nɔ à suu kɔkɔi Betɛli abɛi jĩi nla gɔ. Ŋɔi à sɔ jĩi nɔu jĩi ndii woo kpata ŋa.

9Waati iyi Zakɔbu í baa hai Padan-Aramu ŋɔi Ilaaɔ̃ í naa siɛ má nɔ í weea 10í sɔ̃ɔ í ni, Zakɔbui à ya tako à kpeɛ wo, amma hai nnyi a kaa kpeɛ bɛɛbɛ má. Bɛbɛi iriɛi í jɛ Izirɛli. Nɔ bɛɛbɛi Ilaaɔ̃ í ya kpoo. 11Nɔ í sɔ̃ɔ má í ni,

amui ǹ jɛ Ilaaɔ̃ ilu gbugbã.

Bí ku kpɔ ku ba i jɛ balai dimi nkpɔ nkpɔ

do zamaai ilɛ nkpɔ.

Ilaalu ŋa aa ya fitai hai si tɔkuɛ ŋa.

12Ilɛ iyi ǹ mua Aburahamu do Izaaki

an mua awɔ mɔ,

nɔ n nyi n na n mua tɔkuɛ ŋa mɔ má.

13Nɔ Ilaaɔ̃ í nɛ lele í jɔ̀ Zakɔbu tengi bii í baa ide ku fɔu. 14Nɔ Zakɔbu í gũ kuta gɔ bɛ, nɔ í ce si kuwee í nikã si ikpo do atɛ̃ vɛ̃ɛ ku ba ku jɛ ti Ilaaɔ̃. 15Tengi bɛi Ilaaɔ̃ í baa ide ku fɔ. Nŋui í jɔ̀ í sɔ inyau Betɛli.

Kubíi Bɛnzamɛɛ do ikui Rasɛli

16Zakɔbu do nyaanzeɛ ŋa fei à dede à nɛ hai Betɛli à waa bɔ Efarata. Waati iyi à maai Efarata, nɔ kubí í naa si Rasɛli si kpãa bɛ. Kubíu wa gaabu. 17Si bɛi kubíu wa gaabu ŋɔi inaabo woo bí inɛ ŋau í ni ku ce kpɛlɛ kpɛlɛ, ku maà ce njo, ama inɛmɔkɔi. 18Nɔ Rasɛli í kasãm. Waati iyi í gbe kumii ankãanyiɛ ŋɔi í sɔ amau Benoni#35:18 Benoni Yaasei iriui í jɛ amai wahala.. Amma baau í sɔɔ Bɛnzamɛɛ#35:18 Bɛnzamɛɛ Yaasei iriui í jɛ amai awɔ njɛ waatɔ sobim..

19Rasɛli í ku nɔ à suu itĩ kpãai Efarata. Efarataui à waa kpe Betelehɛmu si nsɛi. 20Nɔ Zakɔbu í lɔ kuta si antaii balɛu. Nɔ baa nnyi kutau í wa bɛ si balɛi Rasɛli.

21Si anyii ikui Rasɛli, ŋɔi Izirɛli í nɛ hai bɛ í koo í buba hee wajui Migidali-Edɛɛ. 22Nɔ si waati iyi í wa inyau, Rubɛ̃ɛ amaɛu í koo í sũò Biliha aboi baaɛu. Iyi baau í gbɔ ideu ŋɔi í roo jiida jiida.

Ama inɛmɔkɔi Zakɔbu ŋau aŋa maateejii fei sãa sãa. 23Lea í bíaa Rubɛ̃ɛ yemmaɛu, do Simeɔ̃, do Levii, do Zudaa, do Isakaa, do Zabulɔ̃ɔ. 24Nɔ Rasɛli mɔ í bíaa Zozɛfu do Bɛnzamɛɛ. 25Nɔ Biliha woo ce icɛi Rasɛliu mɔ í bíaa Dãa, do Nɛfitali. 26Nɔ Zilipa, woo ce icɛi Leau mɔ í bíaa Gadi do Azɛɛ. Inɛ nŋu ŋau bɛi à jɛ amai Zakɔbu ŋa iyi à bíaa hai ilɛi Padan-Aramu.

27Si anyii isɛɛnɛ ŋau bɛ fei ŋɔi Zakɔbu í nyi bi Izaaki baaɛ ilui Maree, kɔkɔi Kiria-Aaba iyi à waa kpe Eborɔ̃ɔ si nsɛi. Bɛi Aburahamu do Izaaki à buba wo. 28-29Izaaki í gbo ntɔ ntɔ. Adɔ̃ cĩɔ do cinɛi í ce (180) í bɛi í sũ í ku í nyi bi balaɛ ŋa, nɔ Esau do Zakɔbu amaɛ ŋau à suu.

Currently Selected:

Kusintii Andunya 35: MKL

Highlight

Copy