Kusintii Andunya 34
34
Simeɔ̃ do Levii à jaa wecĩ nŋa
1Ajɔ nŋu gɔ Dina ama inaabo iyi Lea í bía Zakɔbuu, í fita í bɔ ku yiyi bi ama inaaboi inɔ ilu ŋau. 2Hamɔɔ inɛi Hɛvii í jɛ ilaalui iluu. Ŋɔi Sikɛmu amaɛ í yɛ Dina í sũòɛ í dasiɛ anyɔ. 3Nɔ lasabuɛ í wa si Dina amai Zakɔbuu. Í nɛ kubii ama inaabou ntɔ ntɔ, nɔ wa dɛ idɔɛ ku sinda si nŋu wa do ide didɔ̃ɛ ŋa. 4Nɔ í sɔ̃ baaɛ Hamɔɔ í ni, dɛdɛɛm ama mudɛ̃ɛu ihɛ̃ n ce abo.
5Ŋɔi Zakɔbu í gbɔ iyi Sikɛmu í sũò Dina ama inaaboi nŋu do gbugbã, nɔ si bɛi amaɛ ŋa à wa iko à waa degbe mɛɛmu gaaɛ ŋau, í cokoɛ hee aŋa fei à baa.
6-7Waati iyi amu ŋau à baa ŋɔi Zakɔbu í sɔ̃ ŋa ideu. Nɔ ideu í jɔ nŋa bɛi inɛ ku dondai, idɔ nŋa í kɔ̃ ntɔ ntɔ, domi Sikɛmu í ce mii iyi kù dɔ̃ baa ku gbɔ si ilɛi Izirɛli si bɛi í bɛjɛ wecĩ nŋa ama inaaboi baa nŋa Zakɔbu, mii iyi kù jɔò ku ce mɔm.
Ŋɔi Hamɔɔ baai Sikɛmuu í bɔ bi Zakɔbu í koo í sɔ̃ɔ í ni, 8idɔi Sikɛmu ama inɛmɔkɔm nɔu í nɛ kubii ama inaaboɛu ntɔ ntɔ, ǹ wa n tɔɔɛi i muaa ku ce abo. 9Awaɛ ŋa ka ce anu akã. I ya mu nwa ama inaabo nŋɛ ŋa, nɔ iŋɛ mɔ i ya so tu wa ŋa. 10Awaɛ ŋa ka wɛɛ, nɔ ilɛu ku jɛ tu ŋɛ. Aa yɔkɔ i ce wũa iyi ì bi fei si ilɛu nɔ i ba amani ŋa.
11Sikɛmu takaɛ í koo í sɔ̃ baai ama inaabou do wecĩɛ ŋa í ni, i ceem didɔ̃ ŋa nɔ n ce nŋɛ amuai mii iyi ì beem ŋa. 12Baa bii ì bi ŋa aa yɔkɔ i ni n na fiai ana ku kpɔ do amua ŋa, ǹ tã sɔɔlu n na fei ndɛɛ, amu de n ba i muum ama mudɛ̃ɛu ŋa ku jɛ abom.
13Ŋɔi amai Zakɔbu ŋau à waa jɛa Sikɛmu do baaɛ Hamɔɔ ide do bisi si na iyi í jɔ̀ Sikɛmu í bɛjɛ Dina wecĩ nŋau, 14à ni, a kaa ka so wecĩ nwa ka na inɛmɔkɔ iyi kù ce bango, domi bi tu wa, bii à ce bɛɛbɛ anyɔi. 15A kaa ka jɛsi ide nŋɛ bii kù jɛ inɛmɔkɔi ilu nŋɛ ŋau fei à bu bango bɛi awa mɔ. 16Bɛi à fɔu bɛ, bii ì jɛsi ŋa, aa ka mu nŋɛ ama inaabo nwa ŋa i gba abɔdɔ̃ ŋa, nɔ iŋɛ mɔ i mu nwa tu ŋɛ ŋa ka gba abɔdɔ̃. Aa ka buba bi tu ŋɛ nɔ awaɛ ŋa ka baa ka jɛ dimi akã. 17Amma bii i kù jɛsi bɛi à fɔu bɛ ŋa nɔ ì kɔ̀ ku bu bango ŋa, aa ka gbã wecĩ nwai nɔ ka nɛ.
18Hamɔɔ do amaɛ Sikɛmu à jɛsi ideu. 19Kù kpɛ mɔm awaasũu í tã sɔɔlu nŋu ku ce mii nɔu, domi í bi ama inaaboui. Wee nŋui í re inɛ fei do bɛɛrɛ si inɔ kpasɛ̃i baaɛ. 20Hamɔɔ do amaɛu à bɔ andɛ koofai ilu nŋau nɔ à sɔ̃ inɛ ŋa à ni, 21inɛ ŋau ihɛ̃ inɛ jiida ŋai bi tu wa. Ka jɔ̀ a buba si ilɛu nɔ a ce wũa iyi à bi fei domi ilɛu í cĩ. Aa ka yɔkɔ ka ba abo si inɔ nŋa, nɔ aŋa mɔ aa ba abo si inɔ nwa. 22Aa jɛsi a buba kɔkɔ nwa nɔ ka jɛ dimi akã, amma iyi à nɛ ku ce nŋui í jɛ inɛmɔkɔ fei ku ce bango bɛi aŋa mɔ à ce. 23Ka jɛsi ide nŋa ku ba a na a buba kɔkɔ nwa, nɔ mɛɛmu nŋa ŋa do amani nŋa ŋa fei ku na ku jɛ tu wa.
24Inɛ ŋa iyi à wa andɛ koofai iluu fei à gbɔ bɛi à waa fɔ, nɔ aŋa fei à jɛsi ideu, nɔ inɛmɔkɔ ŋa iyi à wa inɔ iluu fei à ce bango. 25Si ajɔ mɛɛtasia, waati iyi inɛ ŋau à wa si ara kuroi bangou, nɔ a kù waa tamaa hee mà wahala gɔ á naa si aŋa mɔm, waati bɛɛbɛi ama inɛmɔkɔ minjii Zakɔbu ŋau Simeɔ̃ do Levii wecĩi Dina ŋau à so taakuba nŋa ŋa à dasi inɔ iluu nɔ à kpa andi mii iyi í jɛ inɛmɔkɔ fei, 26hai Hamɔɔ do Sikɛmu amaɛu fei. Iyi à fita à waa nɛ nɔ à gbã Dina wecĩ nŋau hai kpasɛ̃i Sikɛmu à nɛò.
27Ŋɔi ama inɛmɔkɔi Zakɔbu ŋa iyi à gbe ŋau à dasi inɔi iku ŋau nɔ à ce ilei mii fei si inɔ iluu, si na iyi í jɔ̀ à bɛjɛ wecĩ nŋa. 28Nɔ à mu mɛɛmu gaa nŋa ŋa, hai angudã nŋa ŋa do kɛtɛ nŋa ŋa, do gbankɛlɛ nŋa ŋa, iyi à wa inɔ iluu do iyi à wa iko ŋa fei. 29À ko amani nŋa fei à nɛò, hai ama nŋa ŋa, do abo nŋa ŋa do mii ŋa iyi à wa inɔ kpasɛ̃ nŋa ŋa fei.
30Ŋɔi Zakɔbu í gbɔ mii iyi amaɛ ŋau à ce nɔ í kpe Simeɔ̃ do Levii í sɔ̃ ŋa í ni, wahala nla nlai ì naam wa bɛ ŋa. Mii iyi ì ce ŋau bɛ á jɔ̀ inɛi ilɛ ŋau ihɛ̃ a cém. Inɛi Kanaã ŋa do inɛi Ferɛzi ŋa aa na a tɔtɔɔ sim wa nɔ a jɛm igũ, amu iyi zamaam kù kpɔ. Nɔ aa kpa irii amu do kpasɛ̃m fei.
31Ŋɔi à jɛaa à ni, à bɛi à maa cea wecĩ nwa bɛi abo à ta icu?
Currently Selected:
Kusintii Andunya 34: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
