Kusintii Andunya 33

Zakɔbu í ko Esau

1Si anyii nŋu ŋɔi Zakɔbu í wu iju lele nɔ í ba wee Esau wa to wa do amanɛ cĩɔ mɛɛ. Nɔ í kpɛ̃ kpɛ̃ kpɛ̃ amu ŋau, inɛ gɔ ŋa bi Lea, inɛ gɔ ŋa mɔ bi Rasɛli, inɛ gɔ ŋa mɔ bi woo ce icɛ inaabo minji ŋau. 2Í ta woo ce icɛ minji ŋau si waju do ama nŋa ŋa. Nɔ í jɔ̀ Lea do amaɛ ŋa à waa too ŋa, Rasɛli do Zozɛfu mɔ à waa too anyi nŋa. 3Nŋu takaɛ í bɛi í wa waju nŋa. Nɔ í sɛɛbata ilɛ isɛ gbɛɛje hee ku maa to kɔkɔi igbãɛu. 4Nɔ Esau í sɛi í koo í kòo, nɔ í muu wa baabaaɛ nɔ í cɔ̃ɔcɔ̃ɔɛ. Nɔ aŋa minji fei à waa kpata.

5Iyi Esau í cɔ do waju í yɛ abo ŋau do amu ŋau nɔ í beeɛ í ni, yoo ŋai à waa siɛ wau ihɛ̃. Nɔ Zakɔbu í jɛaa í ni, amu ŋa iyi Ilaaɔ̃ í muum nii mbɛ na didɔ̃ɛ amu woo ce icɛɛ. 6Ŋɔi woo ce icɛ minji ŋau à to wa do ama nŋa ŋa, nɔ à naa à gulɛaa. 7Lea do amaɛ ŋa mɔ à to wa, aŋa mɔ à naa à gulɛaa. Si anyiɛ Zozɛfu do Rasɛli aŋa mɔ à to wa nɔ à naa à gulɛaa. 8Nɔ Esau í bee Zakɔbu í ni, na mii í ce ì jɔ̀ inɛ ŋau ihɔ̃ do mɛɛmu gaa ŋau bɛ à cua wa bi tom. Ŋɔi Zakɔbu í jɛaa í ni, lafɛ̃ɛm, ǹ sambaɛ iyi bɛ ŋau bɛ fei wai ku ba i ceem didɔ̃. 9Nɔ Esau í ni, ifɔm, amu mɔ ǹ nɛ nkpɔ nkpɔ, mu titɛɛ. 10Nɔ Zakɔbu í jɛ í ni, aawo. Ǹ wa n tɔɔɛi, bii ì gbam do jiida ku jɛ, jɛsi amua iyi ǹ wa n ceɛ, domi wajuɛ ku yɛ í yɛɛm nii bɛi wajui Ilaaɔ̃ ku yɛ, ì gbam do inɔ didɔ̃. 11Na nŋu, gba amua iyi ǹ wa n ceɛ, domi Ilaaɔ̃ í kaakom do jiida nɔ mii fei wa tom n kù kua nkãma. Zakɔbu í mante Esau nɔ í gba.

12Nɔ Esau í ni, ka dasi kpãa ka nɛ, an maa n wa wajuɛ. 13Nɔ Zakɔbu í jɛaa í ni, lafɛ̃ɛm, í jɔ ì mà iyi amu ŋau a kù nɛ gbugbã ya, nɔ ǹ wa n gbã ama angudã do ama kɛtɛ ŋa iyi à waa mɔmɔ. Bii à mante ŋa nɔ isɛɛnɛu í gbãa í caa baa ajɔ akã aŋa fei aa kui. 14Cua i maa koo, an maa n nɛ wa kpɛlɛ kpɛlɛ do mɛɛmu gaa ŋau, do ama keeke ŋau hee n koo n toò ilɛi Seii bi tɛɛ bɛ. 15Ŋɔi Esau í ni, an jɔ̀ɔɛ fiti bubui inɛm ŋa iyi à sim wau. Nɔ Zakɔbu í jɛaa í ni, a maa ce mii ihɛ̃. Amu de ǹ ba ì gbam do inɔ didɔ̃. 16Ajɔ nŋu mɔi Esau í dasi kpãai Seii.

17Zakɔbu mɔ í nɛ ilui Sukɔtu, nɔ í ma ilei nŋu takaɛ bɛ do aroi mɛɛmuɛ ŋa. Na ŋɔi í jɔ̀ à ya kpe inyau Sukɔtu#33:17 Sukɔtu Yaasei iriui í jɛ aro ŋa..

Zakɔbu í buba kɔkɔi Sikɛmu

18Si kubaai Zakɔbu hai ilɛi Padan-Aramu í to wa ilui Sikɛmu si ilɛi Kanaã baani, nɔ í buba kɔkɔi iluu. 19Zakɔbu í gũ ilei acɔɛ ŋa nɔ í na í ra ilɛ bii í gũ ilei acɔɛu bi amai Hamɔɔ ŋa do isɔ fũfũ kpɛkɛlɛ cĩɔ. Hamɔɔ nŋui í jɛ baai Sikɛmu. 20Nɔ Zakɔbu í ma bi kuwee bɛ má si inyau, nɔ í kpoo bi kuweei Ilaaɔ̃ Lafɛ̃ɛi inɛi Izirɛli ŋa.

Currently Selected:

Kusintii Andunya 33: MKL

Highlight

Copy