Kusintii Andunya 32

1Iyi à dede daadaakɔu ŋɔi Labãa í cɔ̃ɔcɔ̃ɔ tɔkuɛ ŋau do ama inaaboɛ ŋau nɔ í wee nŋa, í bɛi í nyi ilɛi ideɛ.

Sɔɔlu iyi Zakɔbu í ce a koo a ko do Esau

2Zakɔbu í dasi kpãaɛ í nɛ ŋɔi amalekai Ilaaɔ̃ ŋa à kòo. 3Iyi Zakɔbu í yɛ amaleka ŋau ŋɔi í ni, bi kuwai woo ce igũi Ilaaɔ̃ ŋai ihɛ̃. Ŋɔi í sɔ inyau Mahanaimu#32:3 Mahanaimu Yaasei iriui í jɛ wuaa minjii woo ce igũ ŋa..

4Nɔ Zakɔbu í bɛ amaacɛɛ ŋa bi Esau igbãɛ si iri kutai Seii ŋa si ilɛi Edɔmu. 5Í ni a koo a sɔ̃ Esau a ni, Zakɔbu woo ce icɛɛ í koo í buba bi Labãa hee do nnyi fei, 6amma bɛbɛi wa baa. Í nɛ kɛtɛ do gbankɛlɛ do angudã ŋa do inɛmɔkɔ woo ce icɛ do inaabo ŋa. Ŋɔi í ni ka naa ka sisiiɛ ku ba i gba nŋu do inɔ didɔ̃, awɔ lafɛ̃ɛi nŋu.

7Ŋɔi amaacɛɛ ŋa iyi í bɛ ŋau à koo bi Esau à sɔ̃ɔ ideu. Nɔ à baa bi Zakɔbu à ni, à to bi Esau igbãɛ, nŋu mɔ wa naa ku koɛ do amanɛ cĩɔ mɛɛ. 8Ŋɔi njo í mu Zakɔbu, zigiɛ í da ntɔ ntɔ. Ŋɔi í kpɛ̃ inɛ ŋa iyi à wa bi tɛɛu ikɔ minji do angudãɛ ŋa do kɛtɛɛ ŋa do kpookpoɛ ŋa. 9Í ce bɛɛbɛi domi wa lasabu si idɔɛ í ni, baa bii í jɛ Esau í naa í cuku si ikɔ akã í jɔɔ igũi, ikɔ iyi í gbeu mɔ á yɔkɔ ku fita baani.

10Ŋɔi í ce kutɔɔ í ni, Aɔ̃ Lafɛ̃ɛ, Lafɛ̃ɛi Aburahamu balam do Lafɛ̃ɛi Izaaki baam, awɔi ì ni n nyi ilɛi idem bii à bím nɔ i ceem mii jiida. 11Amu woo ce icɛɛ n kù to bɛi an yɛ didɔ̃ nlaɛ do bɔɔcĩiɛ iyi ì waa nyisim. Golo nŋu akãi ǹ wa n mu si awɔm ǹ kuaò idoi Zuudɛ̃ɛ wo, nɔ nsɛi si kubaam, inɛm do mɛɛmum ŋa à kpɔ ntɔ ntɔ hee à kpɛ̃ à ce wuaa minji. 12Ǹ wa n tɔɔɛ i faabam hai si awɔi igbãm Esau, domi ǹ wa n ce njo ku maa na ku jɛ wa igũ, amu do iyei amu ŋau do amu ŋau ajɔ. 13Maà jɔ̀ ku ce bɛɛbɛ domi awɔi ì ni aa ceem mii jiida, nɔ i jɔ̀ dimii amam ŋau a kpɔ bɛi sãai ido iyi inɛ gɔ kaa yɔkɔ ku ka ŋa.

14Nɔ Zakɔbu í sũ inyau. Nɔ si mii ŋa iyi í nɛ fei í nya iyi á mua Esau igbãɛu. 15Í so iwo iye cĩɔ minji do iwo kombo kɔnfia do angudã iye cĩɔ minji do angudã kombo kɔnfia, 16do kpookpo iye kuntaa do ama ku mɔmɔ nŋa ŋa do kɛtɛ iye ciiji do kɛtɛ kombo mɛɛwa do gbankɛlɛ iye kɔnfia do gbankɛlɛ akɔ mɛɛwa. 17Í so nŋu ŋau bɛ fei í daa woo ce icɛɛ ŋa si awɔ gaa do gaa ikã ikã nɔ í sɔ̃ ŋa í ni, i cuam ŋa nɔ i jɔ̀ afe ku wa si gaa ŋau ikã ikã. 18Nɔ í sɔ̃ inɛ sinteu í ni, bii igbãm Esau í naa í koɛ, bii wa beeɛ hai bi inɛ iyi ì waa baa, walakɔ bii ì waa bɔ, bii í ni mɛɛmui yooi ì waa tasi waju bɛ, 19sɔ̃ Esau i ni, ti Zakɔbu woo ce icɛɛi, amua iyi í sambaɛ wa mbɛ. Nŋu takaɛ í wa anyi wa baa. 20Ide dimi akã bɛɛbɛ mɔi í sɔ̃ inɛ minjisiau do inɛ mɛɛtasiau do inɛ ŋa iyi à waa too mɛɛmu ŋau fei. Í ni, bii ì ko Esau i sɔ̃ɔ bɛɛbɛ ŋa. 21I sɔ̃ɔ i ni Zakɔbu woo ce icɛɛ wa baa do anyi nŋɛ. Zakɔbu í ce bɛɛbɛi domi nŋu takaɛ í lasabu si idɔɛ í ni, bii Esau í yɛ amua iyi wa cuam nɔu idɔɔkɔ̃ɛ á sũ. Si anyiɛ awaò aa ka yɛ njɛ ijuò iju. Bii i kù laakai mɔm á kom nii do inɔ didɔ̃. 22Amuau í cuaa, nɔ í gbe bɛ í sũ idũu.

Zakɔbu do mɔkɔ gɔ à kò ibu Peniɛli

23-24Ŋɔi Zakɔbu í dede idũu í gbã abo mɛɛɛ ŋau do ama maatakãɛ í so ŋa í koo í kuaò idoi Yabɔku do mii iyi í nɛ fei. 25Nɔ Zakɔbu í gbe bɛbɛi nŋu akã.

Ŋɔi mɔkɔ gɔ í naa aŋaò à kò ibu hee iju wa bɔ ku má. 26Waati iyi aŋaò à waa kò ibuu, mɔkɔu í yɔɔ iyi nŋu kaa yɔkɔ ku kɛkɛɛ, ŋɔi í cã gontaɛ, nɔ kũkũi gontau í sɛkɛɛ.

27Ŋɔi mɔkɔu í ni, jɔ̀m n nɛ domi iju wa má mbɛ.

Amma Zakɔbu í sɔ̃ɔ í ni, bii i kù weem, n kaa n jɔ̀ɛ i nɛ.

28Ŋɔi mɔkɔu í beeɛ í ni, irei iriɛ.

Nɔ í jɛ í ni, amui Zakɔbu.

29Ŋɔi mɔkɔu í ni, a kaa kpeɛ Zakɔbu má. Izirɛlii #32:29 Izirɛli Bii ì gbɔ iriu, í ya jɔ bɛi à waa ni, í kò ibu do Ilaaɔ̃ do feei Ebɛɛ. aa ya kpeɛ bɛbɛi domi ì ko ibu do Ilaaɔ̃ ì kãmiaɛ nɔ ì kãmia amanɛ ŋa mɔ.

30Ŋɔi Zakɔbu í ni, suuru, sɔ̃m iriɛ.

Nɔ í jɛaa í ni, na mii í ce ì waa bee irim. Si anyiɛ nɔ í weea.

31Ŋɔi Zakɔbu í sɔ inyau Peniɛli#32:31 Peniɛli Yaasei iriui í jɛ wajui Ilaaɔ̃., domi í ni, ǹ yɛ Ilaaɔ̃ ijuò iju nɔ do nŋu fei ǹ wɛɛ si hunde. 32Waati iyi inunu wa la ŋɔi Zakɔbu í dasi kpãa í nɛ í lɔ Peniɛli. Nɔ wa sukutɛ na gontaɛu. 33Ŋɔi í jɔ̀ baa nsɛi inɛi Izirɛli ŋa a ci ya ŋɔ atĩi gonta, domi si tengi bɛi Ilaaɔ̃ í cã Zakɔbu.

Currently Selected:

Kusintii Andunya 32: MKL

Highlight

Copy