Kusintii Andunya 31

Zakɔbu í sa hai bi Labãa

1Iyi ama inɛmɔkɔi Labãa ŋau à yɛ iyi Zakɔbu í na í jɛ ilu amani nla nla, ŋɔi à wasi ku gbagba à ni, Zakɔbu í ko amanii baa nwa fei, nɔ do amani nŋui nŋu mɔ í jɛò ilu amani nla nla. Ŋɔi Zakɔbu í gbɔ kugbagba nŋau. 2Nɔ nŋu takaɛ í ce laakaii wajui Labãa nɔ í ba kù waa yɛa bɛi í ya tako ku maa yɛa wo. 3Nɔ Aɔ̃ Lafɛ̃ɛ í sɔ̃ Zakɔbu í ni, nyi ilɛi idei balaɛ ŋa tengi bii à bíɛ, an wɛɛ do awɔ.

4Nɔ Zakɔbu í bɛ ama a koo a kpe Rasɛli do Lea a na a báa iko bi mɛɛmuɛ ŋa. 5Iyi à to wa, ŋɔi í sɔ̃ ŋa í ni, ǹ yɛ wajui baa nŋɛ kù waa yɛɛm bɛi í ya tako ku yɛɛm wo. Amma do nŋu fei, Ilaaɔ̃ iyi baam í ya tɔɔu í wɛɛ do amu. 6Iŋɛ taka nŋɛ ì nɔ ì mà bɛi ǹ cea baa nŋɛ icɛ do gbugbãm fei. 7Nɔ baa nŋɛ í lɛlɛɛm isɛ fɛɛfɛlo, í kpasi asaiya iyi í nɛ ku sãam isɛ gbɛɛwa. Amma Ilaaɔ̃ kù jɛ ku ceem laalɔ. 8Nŋui í jɔ̀ iyi í ni, angudã bati bati ŋaui aa jɛ titom, asaiyam nii mbɛ, nɔ angudã ŋau nkpɔ fei bɛbɛi bati batii à ya maa bí. Bɛɛbɛ mɔi iyi í naa í ni, angudã foe foe ŋaui aa jɛ titom, angudã ŋau fei à na à lɔsi angudã foe foe ku bí. 9Ilaaɔ̃i í so angudã gaai baa nŋɛ í nam. 10Ǹ ce ala ǹ yɛ waati iyi mɛɛmu ŋau à waa gũ, kombo ŋa iyi à waa gũ ŋau fei foe foei à ya jɛ do bati bati. 11Nɔ amalekai Ilaaɔ̃ í sɔ̃m si alau í ni, Zakɔbu. Nɔ ǹ jɛ ǹ ni, amu wee. 12Nɔ í ni, wu iju i cɔ mɛɛmu kombo ŋa iyi à waa gũ ŋau fei bati bati do foe foe ŋai. Amui ǹ jɔ̀ í jɛ bɛɛbɛ domi ǹ yɛ mii iyi Labãa í ceɛ fei. 13Amui ǹ jɛ Ilaaɔ̃, amu iyi ǹ naa siɛ Betɛli, tengi bii í lɔ kutau í tontoo si ikpo í ceem kuwã. Bɛbɛi dede, i nɛ hai ilɛu ihɛ̃, i nyi ilɛ bii à bíɛ.

14Nɔ Rasɛli do Lea à jɛaa à ni, ikpɛ̃ mii à nɛ si kpasɛ̃i baa nwa má hee má jɛ tubu. 15I kù yɛ í cɔ awa taka nwa bɛi inɛ njooi si na iyi í jɔ̀ í ta wa nɔ í jɛ fiaɛ? 16Amanii baa nwa iyi Ilaaɔ̃ í gba bɛbɛi fei, tutu wai à jɛ do ama nwa ŋa. Bɛbɛi mii iyi Ilaaɔ̃ í sɔ̃ɛ fei nŋui ì nɛ ku ce.

17-18Ŋɔi Zakɔbu í so amaniɛ fei nɔ í tɔtɔɔ mɛɛmu ŋa iyi í ba Padan-Aramu bɛ. Si anyiɛ nɔ í jɔ̀ amaɛ ŋa do aboɛ ŋa à gũ kpookpo ŋa à dasi kpãa à waa nɛ bi baaɛ Izaaki ilɛi Kanaã. 19Wee í ko waati bɛɛbɛ Labãa í bɔ ntoi angudãɛ ŋa ku bu. Ŋɔi Rasɛli í koo í ce ilei iwɛ̃ɛ ŋa. 20Do yaase bɛɛbɛi Zakɔbu í zambaò Labãa inɛi Aramuu í sa í nɛ, kù sɔ̃ɔ ide kãma má. 21Í sa í nɛi do andi mii iyi í jɛ titɛɛ fei, í koo í kua ido nla iyi à ya kpe Efarata, nɔ í nɛ ikpa geete ŋa iyi à wa iri kutai Galaadi ŋa.

22Ŋɔi inɛ gɔ í dede wa bɔ bi Labãa. Nɔ í to bi tɛɛ si ajɔ mɛɛtasiaɛ, ŋɔi í sɔ̃ɔ í ni, Zakɔbu í sa í nɛ. 23Nɔ Labãa í dede í gbã inɛi kpasɛ̃ɛ ŋa à waa hãmɛɛ Zakɔbu ŋa, nɔ à nɛ ajɔ mɛɛje à bɛi à maai si ŋa si iri kutai Galaadi ŋa. 24Amma idũ waati iyi Labãa wa sĩ njoo, Ilaaɔ̃ í naa siɛ si ala nɔ í sɔ̃ɔ í ni, laakai, maà ti i ba Zakɔbu do ide gɔ.

25Labãa í da hãmɛi Zakɔbu í koo í baa í to iri kutai Galaadi ŋa í gũ ilei acɔɛ bɛ, nɔ Labãa mɔ í gũ tɛɛ do ti inɛɛ ŋa, si iri kuta ŋau. 26Nɔ í bɔ bi Zakɔbu í beeɛ í ni, na mii í jɔ̀ ì ce bɛɛbɛ. Ì zambam, ì gbã ama inaabom ŋa wa bɛi aru ŋa iyi ì mu. 27Na mii í ce ì sa do ile, ì lɛlɛɛm nii. Na mii í ce i kù sɔ̃m. Baa bii ì sɔ̃m n kaa n ganjiɛ ku nɛ, an jɔ̀ i nɛ mɔm nii do inɔ didɔ̃ nla nla do iri ku kɔ̃, do gãgã do mɔɔlɔ. 28I kù jɔ̀ n tɔɔ amam ŋa do tɔkum ŋa sukudɔ̃. Mii iyi ì ceu ihɛ̃ kucei nnyɛii. 29Ǹ nɛ gbugbã n ceɛ laalɔ iyi ǹ bi fei. Amma Ilaaɔ̃ iyi baaɛ wa tɔɔ í sɔ̃m idũ ana í ni n maà n ti n baɛ do ide gɔ. 30To, ì waa nɛ idei baaɛ si na iyi í jɔ̀ ì waa ce bɛgɛ nŋa, amma na mii í ce iyi ì waa nɛ, ì ce ilei iwɛ̃m ŋa.

31Nɔ Zakɔbu í jɛaa í ni, ntɔi, ǹ sa hai bi tɛɛ domi ǹ wa n ce njoi bii ǹ na ǹ sɔ̃ɛ i maà na i gba ama inaaboɛ ŋa. 32Amma idei iwɛ̃ɛ ŋa iyi ì fɔu, wusɛ bii fei si wajui inɛ nwa ŋa. Bii ì yɛ ngɔgɔ iyi í jɛ tɛɛ, gbaa. Bi inɛm gɔ iyi ì yɛ iwɛ̃ɛ ŋa, kpa lafɛ̃ɛ.

Wee Zakɔbu kù mà mà Rasɛlii í ce ilei iwɛ̃ ŋau.

33Nɔ Labãa í lɔ inɔ ilei acɔi Zakɔbuu do ti woo ce icɛ minji ŋau do ti Lea nɔ kù yɛ ngɔgɔ. Si anyii aŋa fei, waati iyi í fita wa hai ilei acɔi Lea, nɔ í lɔ si ti Rasɛli. 34Wee nŋui í ce ilei iwɛ̃ ŋau, nɔ í sɔkɛ ŋa si gaayii kpookpoɛ nɔ wa buba si antaiɛ. Nɔ Labãa í gbogoo bii fei, kù yɛ iwɛ̃ɛ ŋa. 35Nɔ Rasɛli í sɔ̃ baaɛ í ni, maà mum do. Si bɛi ì mà awa inaabo ŋa, awɔm nii wa mu. Nŋui í jɔ̀ n kaa yɔkɔ n dede.

Ŋɔi Labãa í dɛdɛ í gbɛɛji, amma kù yɛ ngɔgɔ. 36Nɔ idɔi Zakɔbu í kɔ̃ò Labãa hee wa baa ku ja í beeɛ í ni, taale mii ǹ ceɛ, mà dulum yoomai ǹ ce hee ì hãmɛɛm wa do idɔɔkɔ̃. 37To, ì wusɛ jĩnɛm fei. Mii ì yɛ bɛ iyi í jɛ tɛɛ. Nyisim si wajui inɛm ŋa do inɛɛ ŋa nɔ a kiiti wa. 38Adɔ̃ kɔnfiai ǹ ce ideɛ bɛ. Hai angudã do iwoɛ ŋa fei, baa akã nŋa inɔɛ kù nya. Nɔ n kù ŋɔ angudã komboɛ baa akã. 39Nɔ baa ajɔ akã n kù naa n kù nyisiɛ ikui angudã gɔ walakɔ iwo iyi mɛɛmui sako gɔ í kpa, si bɛi ǹ nɛ asaiyaɛ. Amu takam nii ǹ ya n sãaɛ si. Nɔ í tilasim n sãaɛ si baa mɛɛmu ŋa iyi à ce ile ŋa dasã walakɔ idũ. 40Dasã inya ku gbãa sim, nɔ idũ tũtũ ku kpam hee baa njoo n ci ya sũ. 41Adɔ̃ kɔnfiai ǹ ce kpasɛ̃ɛ bɛ, ǹ ceɛ icɛ adɔ̃ maatɛ̃ɛ na irii ama inaaboɛ ŋau, nɔ ǹ nyi ǹ ceɛ icɛ adɔ̃ mɛɛfa má na irii mɛɛmuɛ ŋa, nɔ ì lɛlɛɛm ì kpaasi fiam isɛ gbɛɛwa. 42Bii kù jɛ ǹ wa n tɔɔ Ilaaɔ̃ Lafɛ̃ɛi balam Aburahamu, nŋu iyi baam Izaaki mɔ wa ce njo, bii kù jɛ na irii Ilaaɔ̃u bɛ, ngbɛi aa lelem wo. Amma Ilaaɔ̃ í yɛ wahalam do icɛ ŋa iyi ǹ ce nɔ ana si alaɛu í sɔ̃ɛ dee dee ku jɛm.

43Nɔ Labãa mɔ í jɛaa í ni, aboɛ ŋau bɛ amam ŋai, nɔ ama nŋa ŋa iyi à bí à jɛ tɔkum ŋa, nɔ mɛɛmuɛ ŋau bɛ mɛɛmum ŋai, mii iyi ì waa yɛ ihɛ̃ fei tom nii. To, hai nnyi mii an yɔkɔ n cea amam ŋa walakɔ ama nŋa ŋa iyi à bí ŋau má. 44Na nŋu nsɛi, naa awaɛ ka dĩ akabuu, nɔ ka jilɛ nyinda gɔ ihɛ̃ iyi á jɛ sɛɛda nwa.

45Nɔ Zakɔbu í so kuta nla gɔ í tu isa í lɔɔ. 46Nɔ í sɔ̃ inɛɛ ŋau má í ni a ko kuta ŋa wa má. Iyi à ko kuta ŋau nɔ à timbiɛ, aŋa fei à bɛi à buba kɔkɔi kuta ŋau à waa jɛ. 47-48Nɔ Labãa í ni, kuta ŋau ihɛ̃ iyi à timbi nnyi ku jɛ sɛɛdai awaɛ. Nŋui í jɔ̀ í kpe inyau Yegaa-Sahaduta#31:47-48 Yegaa-Sahaduta Bii ì gbɔ iriu, í ya jɔ bɛi à waa ni, kutai sɛɛda do feei inɛi Aramu ŋa., nɔ Zakɔbu í kpoo Galeɛdi#31:47-48 Galeɛdi Bii ì gbɔ iriu, í ya jɔ bɛi à waa ni, kutai sɛɛda do feei Ebɛɛ.. 49Nɔ à kpe inyau Misipa#31:49 Misipa Bii ì gbɔ iriu, í ya jɔ bɛi à waa ni, ile kugboka bii woo degbe ilu ŋa à wa do feei Ebɛɛ. má, domi Labãa í ni, Aɔ̃ Lafɛ̃ɛ ku maa cɔ awaɛ fei si waati iyi a kaa ka na ka wa inya akã. 50Bii í na í jɛ ì waa kpã ama inaabom ŋa iju, walakɔ ì so abo mmu gɔ ŋa má, mà iyi kù jɛ amanɛi í jɛ sɛɛda nwa, amma Ilaaɔ̃i.

51Nɔ í nyi í sɔ̃ Zakɔbu má í ni, kuta ŋau ihɛ̃ iyi à timbi do nla akãu ihɛ̃ iyi à lɔ 52aŋai à jɛ sɛɛda si gãmɛ nwa iyi n kaa n kua n naa bi tɛɛ n na n ceɛ laalɔ má. Bɛɛbɛ mɔi awɔ mɔ i kù nɛ kpãai i kua i naa bi tom i na i ceem laalɔ má. 53Ilaaɔ̃ Lafɛ̃ɛi Aburahamu do iwɛ̃ iyi í jɛ Lafɛ̃ɛi Nakɔɔ a jɛ woo kiiti nwa ŋa.

Nɔ Zakɔbu í gbasi do Ilaaɔ̃ iyi baaɛ Izaaki wa ce njo. 54Si anyiɛ nɔ Zakɔbu í ce kuwee si antaii iri kutau nɔ í kpe inɛɛ ŋa wa a na a jɛ. Iyi à jɛ à tã nɔ à sũ antaii iri kutau.

Currently Selected:

Kusintii Andunya 31: MKL

Highlight

Copy