Kusintii Andunya 30

1Iyi Rasɛli í yɛ nŋu kù waa bía Zakɔbu, ŋɔi í dedeò igu nŋu do igbãɛ, ŋɔi í sɔ̃ Zakɔbu í ni, jɔ̀ amu mɔ n bíiɛ. Bii kù jɛ bɛɛbɛ an ku.

2Ŋɔi idɔi Zakɔbu í kɔ̃ò Rasɛli í sɔ̃ɔ í ni, amui ǹ jɛ Ilaaɔ̃ ǹ bɛi ǹ ganjiɛ ku bí?

3Ŋɔi Rasɛli í ni, to. Biliha woo ce icɛm nɔu wee, gbã i lɔòɛ ku bíim ama. Hai bi tɛɛ bɛi an baò ama ka maa wɛɛò. 4Ŋɔi í so Biliha woo ce icɛɛu, í na Zakɔbu, nɔ Zakɔbu í sũòɛ. 5Nɔ Biliha í nɛ asĩ í bía Zakɔbu ama inɛmɔkɔ. 6Ŋɔi Rasɛli í ni, Ilaaɔ̃ í kiitim. Í gbɔ kutɔɔm nɔ í muum ama inɛmɔkɔ. Ŋɔi í jɔ̀ í sɔ amau iri Dãa#30:6 Dãa Bii ì gbɔ iriu, í ya jɔ bɛi à waa ni, í kiiti do feei Ebɛɛ.. 7Ŋɔi Biliha í nɛ asĩ má, ŋɔi í bía Zakɔbu ama inɛmɔkɔ minjisia. 8Ŋɔi Rasɛli í ni, ǹ ba igbãm ku ja jiida jiida ǹ kãmiaɛ. Ŋɔi í sɔ amau Nɛfitali#30:8 Nɛfitali Bii ì gbɔ iriu, í ya jɔ bɛi à waa ni, ǹ ja igũ do feei Ebɛɛ..

9Iyi Lea í yɛ iyi nŋu kù waa bí má ŋɔi í so Zilipa woo ce icɛɛu í na Zakɔbu. 10Nɔ Zilipa í bía Zakɔbu ama inɛmɔkɔ. 11Ŋɔi Lea í ni, irei ì gbɔ iri didɔ̃m. Ŋɔi í sɔɔ Gadi#30:11 Gadi Bii ì gbɔ iriu, í ya jɔ bɛi à waa ni, irei ì gbɔ iri didɔ̃ do feei Ebɛɛ.. 12Ŋɔi Zilipa í bía Zakɔbu ama inɛmɔkɔ minjisia. 13Ŋɔi Lea í ni, amu ǹ gbɔ ididɔ̃, domi inaabo ŋa aa kpem woo gbɔ ididɔ̃. Ŋɔi í sɔɔ Azɛɛ#30:13 Azɛɛ Bii ì gbɔ iriu, í ya jɔ bɛi à waa ni, ididɔ̃ do feei Ebɛɛ..

14Ŋɔi ajɔ akã si waatii bilee ku mu, Rubɛ̃ɛ í dede í bɔ sako ŋɔi í ka isoi jĩi gɔ wa iyi à ya kpe mandagɔɔ#30:14 mandagɔɔ À waa tamaa jĩi gɔi iyi á yɔkɔ ku sobi inaabo ŋa a ba asĩ. í baa Lea iyeɛ wa. Ŋɔi Rasɛli í sɔ̃ Lea í ni, suuru muum isoi jĩi ndii amaɛu bɛ wa.

15Ŋɔi Lea í jɛaa í ni, iyi ì gba mɔkɔm ku toɛ hee nsɛi? Ŋɔi ì waa bi i gba isoi jĩi ndii amam má?

Nɔ Rasɛli í ni, bii bɛɛbɛi, mɔkɔ nwa á baɛ ku sũ idũuyi na isoi jĩi ndii amaɛu bɛ.

16Alɛu iyi Zakɔbu wa baa hai iko, Lea í dede í koo í kòo nɔ í sɔ̃ɔ í ni, amui aa sũò nnyi domi do isoi mandagɔɔi amam nii ǹ raɛ do. Idũu Zakɔbu í lɔòɛ.

17Si bɛɛbɛ Ilaaɔ̃ í gbɔ kutɔɔi Lea, nɔ í nɛ asĩ í bía Zakɔbu ama inɛmɔkɔ miiusia. 18Ŋɔi í ni, Ilaaɔ̃ í sãam ribam si na iyi í jɔ̀ ǹ so woo ce icɛm ǹ na mɔkɔm. Ŋɔi í sɔɔ Isakaa#30:18 Isakaa Bii ì gbɔ iriu, í ya jɔ bɛi à waa ni, ribam do feei Ebɛɛ.. 19Si anyii Isakaa Lea í nɛ asĩ má nɔ í bía Zakɔbu ama inɛmɔkɔ mɛɛfasia. 20Ŋɔi í ni, Ilaaɔ̃ í ceem amua jiida. Bɛbɛi mɔkɔm á mà bɛɛrɛm domi ǹ bíaa ama inɛmɔkɔ hee mɛɛfa. Nɔ í sɔɔ Zabulɔ̃ɔ#30:20 Zabulɔ̃ɔ Bii ì gbɔ iriu, í ya jɔ bɛi à waa ni, bɛɛrɛ do feei Ebɛɛ.. 21Si anyiɛ nɔ í bí ama inaabo nɔ í kpoo Dina.

22Ilaaɔ̃ kù gbɛjɛ idei Rasɛli í gba kutɔɔɛ, nɔ í ce nŋu mɔ iyei ama. 23Ŋɔi í nɛ asĩ í bí ama inɛmɔkɔ nɔ í ni, Ilaaɔ̃ í nyaam anyɔ. 24Ŋɔi í sɔɔ Zozɛfu#30:24 Zozɛfu Bii ì gbɔ iriu, í ya jɔ bɛi à waa ni, ku kɔ̃ɔsi do feei Ebɛɛ. waatɔ ku kɔ̃ɔsi. Nɔ í ni, Aɔ̃ Lafɛ̃ɛ ku kɔ̃ɔm si ama inɛmɔkɔ má.

Zakɔbu í baa í jɛ ilu amani

25Si waati iyi Rasɛli í bí Zozɛfu gbakã, ŋɔi Zakɔbu í koo í sɔ̃ Labãa í ni, jɔ̀ n nyi ilɛi idem. 26Nam abom ŋa do amam ŋa n nɛ, domi na iri nŋai ǹ ceɛ icɛ, ì nɔ ì mà dimii icɛ iyi ǹ ceɛ. 27Nɔ Labãa í sɔ̃ɔ í ni, ǹ wa n tɔɔɛ suurui, gbe bi tom ihɛ̃, domi iwɛ̃m ŋa à sɔ̃m à ni na iriɛi Aɔ̃ Lafɛ̃ɛ í weem. 28Sɔ̃m jiai fia bɛi ì bi, an sãɛ. 29Nɔ Zakɔbu í sɔ̃ɔ í ni, ì mà yaase bɛi ǹ ceɛ icɛ, ì nɔ ì yɛ bɛi mɛɛmuɛ ŋa à kpaasi na irim. 30Waati iyi ǹ to wa, mɛɛmuɛ ŋau a kù kpɔ, amma iyi ǹ to wa Aɔ̃ Lafɛ̃ɛ í weeɛ, nɔ mɛɛmuɛ ŋau à baa à ce gaa nla nla. Kù to ì jɔ̀ amu mɔ bɛi ǹ ce icɛ na nyaanzem ŋa? 31Nɔ Labãa í jɛaa í ni, fɛloi an sãɛ. Nɔ Zakɔbu í ni, i kù nɛ nkãma ku sãam. Bii í jɛsi ide iyi an sɔ̃ɛu an yɔkɔ n degbe angudã do iwoɛ ŋau má bɛi ǹ tako ǹ wa n degbe ŋa wo. 32Jɔ̀ n lɔ inɔi mɛɛmuɛ ŋau nnyi n cɔ cɔ cɔ angudã do iwo ŋa iyi nto nŋa í yɛ bati bati, do angudã dũdũ ŋa. Aŋai an nya ikã, nɔ nŋui á jɛ fiam iyi aa sãam. 33Bii í kɔ̃ɔsi naa i cɔ gaam, aa mà sãa sãa bii ǹ takiiɛ. Iwo iyi kù nɛ bati bati walakɔ angudã iyi kù jɛ dũdũ fei, aa mà iyi ǹ ce ileɛi.

34Nɔ Labãa í ni, to, ǹ jɛsi ide iyi ì fɔ.

35Ajɔ nŋu bɛ nɔ Labãa takaɛ í cica iwo kombo bati bati ŋau, do iwo iye bati bati ŋau fei do iyi à nɛ fũfũ ŋau, do angudã ŋa iyi à nɛ dũdũ dũdũ. Nɔ í so inɛ nŋu ŋa í na amaɛ ŋa. 36Nɔ amaɛ ŋa à gbã ŋa à nɛ, à ce isɛɛnɛ sisɔ zakai ajɔ mɛɛta.

Nɔ Zakɔbu takaɛ mɔ wa gbã angudãi Labãa ŋa iyi à gbeu. 37Ŋɔi í koo í da amaawɔi jĩi tũtũ #30:37 jĩi tũtũ Jĩi ikã ikã mɛɛtai í dɛdɛ. Irii jĩi ŋau wee. Pepilie do amandi do palatani. Amaawɔi jĩi ŋau bii à fɔ kpaka nŋa í ya fũuta jiida. gɔ ŋa nɔ í fɔ fɔ fɔ kpaka nŋa í jɔ̀ bii gɔ ŋa ku ba a ce bati bati. 38Nɔ í koo í jilɛ ŋa bi ku mɔ inyii mɛɛmu ŋau ku ba bii à naa inyi ku mɔ à ya yɔɔ, domi tengi bɛi à ya gũ. 39Mɛɛmu ŋau à ya maa gũ si wajui jĩi bati bati ŋau, nɔ à ya maa bí bati bati. 40Nɔ í nya ama angudã ŋau ikã, amma iyi à gbe ŋau fei í ya jɔ̀ à wa wajui mɛɛmu dũdũ do mɛɛmu bati batii Labãa ŋaui waati iyi à waa gũ. Do yaase bɛɛbɛi í ya nya mɛɛmu ŋa iyi aa na a jɛ titɛɛu, ci ya tɔtɔɔ ŋa do ti Labãa ŋau. 41Waati iyi mɛɛmu kaasãanɛ ŋau à na à waa gũ fei Zakɔbu í ya naa ku jilɛ jĩi bati bati ŋaui si bi ku mɔ inyi nŋau, ku ba a ya na a gũ si wajui jĩi ŋau. 42Amma ci ya jilɛa angudã kusu ŋau ku ba kusu ŋau a jɛ ti Labãa, kaasãanɛ ŋau mɔ a jɛ titɛɛ. 43Do yaase bɛɛbɛi Zakɔbu í na í jɛò ilu fia jiida, í nɛ angudã do iwo bututu, do inaabo woo ce icɛ ŋa do inɛmɔkɔ ŋa, do kpookpo ŋa do gbankɛlɛ ŋa.

Currently Selected:

Kusintii Andunya 30: MKL

Highlight

Copy