Kusintii Andunya 29

Zakɔbu í to bi Labãa

1Si anyiɛ Zakɔbu í dede hai Betɛli bɛ í lɔ si isɛɛnɛɛ í bɔ ikpa ilɛi inɛi nunui daakɔ ŋa. 2Iyi í maai Harãa, ŋɔi í yɛ lɔgɔ gɔ inɔ sako, nɔ angudã gaa mɛɛta wa sũ kɔkɔɛ. À waa sũ kɔkɔi lɔgɔui domi bɛi à ya mua mɛɛmu ŋa inyi a mɔ. Wee kuta iyi à biiò andɛi lɔgɔu í la. 3Bɛi mɛɛmu fei í ya tɔtɔɔ à bɛi à tale kutau hai andɛi lɔgɔ bɛ a na ŋa inyi a mɔ. Bii à tã nɔ à sindo kutau si agbɛɛ andɛi lɔgɔu má.

4Ŋɔi Zakɔbu í bee woo degbe angudã ŋau í ni, iŋɛ kpaasim ŋa, hai iwoi ì naa ŋa.

Ŋɔi à jɛaa à ni, awa inɛi Harãa ŋai.

5Ŋɔi í bee ŋa í ni, ì mà Labãa amai Nakɔɔ ŋa?

Ŋɔi à jɛ à ni, oo. À màa.

6Ŋɔi í bee ŋa má í ni, wa nɛ baani?

Nɔ à jɛ à ni, oo. Wa nɛ baani. Rasɛli amaɛi wa naa bɛ do angudãɛ ŋa.

7Ŋɔi Zakɔbu í ni, nunu wee wa la titã, awaati kù to bɛi aa tɔtɔɔ mɛɛmu nŋɛ ŋa. Do nŋu fei i mu nŋa inyi a mɔ nɔ i koo i degbe ŋa má ŋa.

8Ŋɔi à jɛaa à ni, a kaa ka yɔkɔ, í gbe hee bii woo degbe angudã gaa ŋau fei à tɔtɔɔ. Waati bɛɛbɛi aa ka tale kutau hai andɛi lɔgɔu ka bɛi ka na angudã ŋau inyi.

9Si waati iyi wa ba ŋa ide ku fɔu bɛ, ŋɔi Rasɛli í to wa do angudãi baaɛ ŋa. Rasɛlii í jɛ woo degbe angudã ŋau. 10Iyi Zakɔbu í yɛ Rasɛli do angudã gaai Labãa asiɛu, ŋɔi í koo í tale kuta iyi í wa si andɛ lɔgɔu nɔ í jɔ̀ angudã ŋau à mɔ inyi. 11Ŋɔi Zakɔbu í koo í ya Rasɛli í coo fɔɔ, nɔ cikãaju wa baa si ijuɛ. 12Nɔ í sisia Rasɛli iyi nŋuu nyaanzei baaɛi, amai Rebekai nŋu wa jɛ.

Ŋɔi Rasɛli í sɛi í koo í sisia baaɛ ideu. 13Iyi Labãa í gbɔ baaui Zakɔbu amai wecĩɛ, ŋɔi í sɛi í koo í kòo. Í yaa í coo fɔɔ, nɔ í bɔòɛ kpasɛ̃. Ŋɔi Zakɔbu í sisia Labãa ide iyi nŋu wa nɛò fei. 14Ŋɔi Labãa í ni, ntɔ ntɔ, awɔ nyaanzem nii, awaɛ fei à jɛ njɛ akã. Ŋɔi Zakɔbu í ce cukpa akã bi Labãa bɛ.

Zakɔbu í cea Labãa icɛ na irii Rasɛli do Lea

15Si anyii cukpa akãu ŋɔi Labãa í sɔ̃ Zakɔbu í ni, aa ceem icɛ ngbɛ si na iyi í jɔ̀ à jɛ nyaanze akã? Sɔ̃m bɛi aa gba sim. 16Wee Labãa í nɛ ama inaabo minji. Irii inɛ ngboui í jɛ Lea, ifɔu mɔ Rasɛli. 17Wee ijui Lea kù waa nɛ baani#29:17 kù waa nɛ baani Do feei Ebɛɛ yaasei ide ŋau ku gbɔɛ í gaabu., amma Rasɛli abo kusĩai, araɛ do wajuɛ fei í sĩai jiida.

18Zakɔbu í bi Rasɛli, nɔ í sɔ̃ Labãa í ni, an ceɛ icɛ adɔ̃ mɛɛje na irii Rasɛli ama inaaboɛu.

19Ŋɔi Labãa í ni, í sĩa n muuɛ do iyi an mua mɔkɔ mmu gɔ. Bii bɛɛbɛi, buba ka wɛɛ. 20Bɛɛbɛi Zakɔbu í buba í ce icɛ adɔ̃ mɛɛje na irii Rasɛli, nɔ í jɔai bɛi ajɔ minji si na iyi í jɔ̀ í nɛ kubii Rasɛli jiida jiida.

21Si anyiɛ ŋɔi Zakɔbu í sɔ̃ Labãa í ni, nam abom n dasiɛ kpasɛ̃ domi ajɔm í kɔ̃. 22Ŋɔi Labãa í tɔtɔɔ inɛi ikpa fandiɛ ŋa fei nɔ í nya kujɛ. 23-24Amma iyi alɛ í lɛ Leai í gbã í daa Zakɔbu si ile nɔ í so ama inaabo woo ce icɛɛ gɔ iyi à ya kpe Zilipa í na Lea ku jɛ woo ce icɛɛ. Ŋɔi Zakɔbu do Lea à tɔtɔɔ. 25Iyi iju í má daadaakɔu ŋɔi Zakɔbu í ba wee Leai. Nɔ í sɔ̃ Labãa í ni, mii ì ceem bɛ ya. Kù jɛ na irii Rasɛlii ǹ ceɛ icɛ ba. To, na mii í ce ì zambam.

26Ŋɔi Labãa í ni, si kucei awa a ci ya tako a gba ifɔ abɔdɔ̃ a jɔ̀ igbã. 27Tambɔ azumai abɔdɔ̃u gbakã awɔ do Lea. Si anyiɛ an naɛ ifɔu mɔ nɔ i ceem icɛ mmu má na irii nŋu mɔ adɔ̃ mɛɛje.

28Ŋɔi Zakɔbu í ce bɛɛbɛ. Í tambɔ azumau nŋu do Lea. Si anyiɛ Labãa í bɛi í muaa Rasɛli má í jɛ aboɛ. 29Biliha ama inaabo woo ce icɛɛi í na Rasɛli ku jɛ woo ce icɛɛ. 30Iyi Zakɔbu í sũò Rasɛli ŋɔi í buu jiida jiida í re Lea. Nɔ í cea Labãa icɛ má adɔ̃ mɛɛje.

Amai Zakɔbu ŋa

31Aɔ̃ Lafɛ̃ɛ í yɛ iyi Zakɔbu kù bi Lea. Ŋɔi í coo iyei ama, nɔ Rasɛli í jɛ gbɛnda. 32Iyi Lea í nɛ asĩ nɔ í bí ama inɛmɔkɔ í sɔɔ Rubɛ̃ɛ#29:32 Rubɛ̃ɛ Bii ì gbɔ iriu, í ya jɔ bɛi à waa ni, cɔ ama inɛmɔkɔ do feei Ebɛɛ.. Nɔ í ni, Aɔ̃ Lafɛ̃ɛ í yɛ anyɔm. Bɛbɛi mɔkɔm á bim. 33Ŋɔi í nɛ asĩ má nɔ í bí ama inɛmɔkɔ nɔ í ni, Aɔ̃ Lafɛ̃ɛ í gbɔ iyi a kù bim, na ŋɔi í jɔ̀ í muum inɛ ihɛ̃ má. Nɔ í sɔ nŋu mɔ Simeɔ̃#29:33 Simeɔ̃ Bii ì gbɔ iriu, í ya jɔ bɛi à waa ni, í gbɔ idem do feei Ebɛɛ.. 34Ŋɔi í nɛ asĩ má, nɔ í bí ama inɛmɔkɔ nɔ í ni, bɛbɛi mɔkɔm á dĩ do amu, domi ǹ bíaa ama inɛmɔkɔ hee mɛɛta. Ŋɔi í jɔ̀ í sɔ amau Levii#29:34 Levii Bii ì gbɔ iriu, í ya jɔ bɛi à waa ni, ku teese ku dĩ do feei Ebɛɛ., waatɔ ku teese ku dĩ. 35Ŋɔi í nɛ asĩ má nɔ í bí ama inɛmɔkɔ nɔ í ni, bɛi ǹ saabu Aɔ̃ Lafɛ̃ɛ. Ŋɔi í jɔ̀ í sɔɔ Zudaa#29:35 Zudaa Bii ì gbɔ iriu, í ya jɔ bɛi à waa ni, ku saabu do feei Ebɛɛ., waatɔ saabu. Nɔ í leekĩ kubíɛ.

Currently Selected:

Kusintii Andunya 29: MKL

Highlight

Copy