Kusintii Andunya 28

1Nɔ Izaaki í kpe Zakɔbu í weea í sɔ̃ɔ í ni, maà na i so abo si mudɛ̃ɛi ilɛi Kanaã ŋau ihɛ̃. 2Na nŋu, dede i bɔ Padan-Aramu kpasɛ̃i Betuɛli baai iyeɛ bi Labãa asiɛu nɔ i so abo bɛ si inɔi amaɛ ŋa. 3Nɔ Ilaaɔ̃ ilu gbugbã fei ku weeɛ, ku jɔ̀ i bí amu ŋa nɔ i jɛ balai dimi nkpɔ nkpɔ. 4Nɔ ku weeɛ bɛi í weea Aburahamu, awɔ do dimii amaɛ ŋa fei, nɔ ilɛu ihɛ̃ iyi Ilaaɔ̃ í wãò Aburahamu bii ì waa jɛ isɛ mmuu ku jɛ titɛɛ. 5Izaaki í jɔ̀ Zakɔbu í nɛ ikpa Padan-Aramu bi Labãa amai Betuɛli inɛi Aramu. Labãau wecĩi Rebekai. Rebekau mɔ í jɛ iyei Zakɔbu do Esau.

Esau í so abo mmu gɔ

6Esau í yɛ iyi Izaaki í weea Zakɔbu nɔ í ni ku bɔ ikpa Padan-Aramu koo dɛ abo bɛ. Í nɔ í gbɔ hai waati iyi í ceaa kuweeu í ni ku maà na ku so abo si inɔi ama inaaboi ilɛi Kanaã ŋau bɛ. 7Í nɔ í yɛ iyi Zakɔbu í gbɔ idei iyeò baaɛ, nɔ í nɛ ikpa Padan-Aramu. 8Ŋɔi Esau í mà iyi daai ama inaaboi ilɛi Kanaã ŋau ci ya dɔ̃a Izaaki baai nŋu si. 9Ŋɔi í dede í bɔ bi nyaanzei Isimaɛli amai Aburahamu nɔ í so Mahalati wecĩi Nebayɔti í ce abo nɔ í dasiɛ si inɔi aboɛ ŋa iyi í nɛ wou.

Ala iyi Zakɔbu í ce Betɛli

10Waati iyi Zakɔbu í gbɔ idei baaɛu, ŋɔi í dede hai Bɛɛseba í dasi kpãa wa nɛ ikpa ilui Harãa. 11Si isɛɛnɛɛu, ŋɔi í to inya gɔ nɔ bɛi wa bi ku sũ domi idũ í dũ. Ŋɔi í so kuta gɔ í ce mii ku lesi iriɛ í bɛi í sũ. 12Ŋɔi í laala í yɛ wee akpaa gɔ wa leekĩ ilɛ nɔ í koo í kã hee lelei Aɔ̃. Nɔ í yɛ amalekai Ilaaɔ̃ ŋa à gũ à wasi ku kita si akpaau. 13Aɔ̃ Lafɛ̃ɛ wa leekĩ si antaiɛ í ni, amui ǹ jɛ Aɔ̃ Lafɛ̃ɛ, Lafɛ̃ɛi Aburahamu balaɛ do Lafɛ̃ɛi Izaaki baaɛ. Ilɛ bii ì waa sũò bɛ, awɔi an na do dimii amaɛ ŋa. 14Dimii amaɛ ŋa aa kpɔ bɛi sãa nɔ aa tɛi hai nunui daakɔ hee ku bɔ nunui alɛ do hai awɔ njɛi kpãai nunu hee ku bɔ awɔ cangai kpãai nunu. Hai bi awɔ do amaɛ ŋai dimi fei á baò kuwee si andunyau ihɛ̃. 15Ǹ wɛɛ do awɔ, an nɔ n maa n degbeɛ bii ì waa bɔ fei, nɔ n baaɛ wa si ilɛu ihɛ̃ má. N kaa n fũ siɛ awɔ, an ceɛ bɛi ǹ sɔ̃ɛu fei.

16Iyi Zakɔbu í jĩ ŋɔi í ni, Aɔ̃ Lafɛ̃ɛ í wa inyau ihɛ̃ ntɔ ntɔ amma n kù mà wo. 17Ŋɔi njo í muu nɔ í ni, inyau ihɛ̃ í nɛ njo. Kpasɛ̃i Ilaaɔ̃i ihɛ̃ do andɛ koofai lele.

18Ŋɔi Zakɔbu í dede daadaakɔ í so kuta iyi í lesi iriu, í lɔɔ ilɛ bɛ, nɔ í nikã ikpo si antaiɛ. 19Nɔ í sɔ inyau Betɛli, waatɔ kpasɛ̃i Ilaaɔ̃, amma Luzii à ya tako a kpoo wo. 20Si anyiɛ ŋɔi Zakɔbu í ce kuwã í ni, bii Ilaaɔ̃ í wɛɛ do amu nɔ í degbem si isɛɛnɛm nɔu ihɛ̃, nɔ í muum ijɛ do jaaɛ iyi an dasi, 21nɔ ǹ nyi idei baam baani, nŋui á jɛ Aɔ̃ Lafɛ̃ɛm. 22Kuta iyi ǹ lɔu ihɛ̃i í jɛ sɛɛda iyi tengi ihɛ̃ bi kuwai Ilaaɔ̃i. Mii iyi í nɔ í muum fei si mii mɛɛwa an nya akã n muaa.

Currently Selected:

Kusintii Andunya 28: MKL

Highlight

Copy