Kusintii Andunya 27

Izaaki í weea Zakɔbu

1Si waati iyi Izaaki í gbo ijuɛ í dɛ kù waa yɛ ilu má, ŋɔi í kpe ama yemmaɛ í ni, Esau, amam.

Ŋɔi Esau í jɛ í ni, amu wee.

2Ŋɔi Izaaki í ni, wee ǹ gbo, n kù nɔ n kù mà ajɔ iyi an ku. 3Na ŋɔi í ce ǹ wa n tɔɔɛ nsɛi i dede i so mii ku ce adɛ ŋa waatɔ tongoɛ do biooɛ i bɔ sako i kpaam iŋa wa. 4Bii ì baa nɔ i naa i bandaɛ bɛi ǹ ya n biu i naam wa n ŋɔ, ku ba n weeɛ n bɛi n ku. 5Nɔ Esau í dede í bɔ sako iŋau ku dɛ wa.

Wee Rebeka wa gbɔ bɛi Izaaki wa sɔ̃ Esau. 6Waati iyi Esau í nɛ, ŋɔi Rebeka í sɔ̃ Zakɔbu amaɛu í ni, wee ǹ gbɔ baaɛ í sɔ̃ igbãɛ í ni 7koo kpaa nŋu iŋa wa ku naa ku bandaɛ jiida jiida nŋu ku ŋɔ nɔ nŋu ku weea si wajui Aɔ̃ Lafɛ̃ɛ nŋu ku bɛi ku ku. 8Nsɛi, amam, gbɔ ide iyi an sɔ̃ɛ. 9Koo cɔ si iwo ŋau bɛ i muum iwo minji iyi í sĩa wa bɛ, n ba n ceaò baaɛ bɛi í ya bi. 10Nɔ i gba i kooa baaɛ ku ŋɔ, nɔ ku weeɛ ku bɛi ku ku.

11Ŋɔi í jɛaa iyeɛ í ni, iyi igbãm í bɛi í nɛ nto nɔ amu n kù nɛ ni. 12Bii i kù laakai baam á na ku baabaam, nɔ ku mà iyi ǹ wa n bi n zamba nŋui nɔ kuwee iyi ǹ wa n biu ku bàa ku jɛ ikpe.

13Ŋɔi iyeɛu í sɔ̃ɔ í ni, jɔ̀ ikpeu ku dingaa si irim. Awɔ de, gbɔ idem nɔ i naam iwo ŋau wa. 14Zakɔbu í koo í mu iwo ŋau í naaò ŋa wa bi iyeɛ. Iyeu í banda ŋa si bɛi Izaaki í ya biu. 15Si anyii nŋu nɔ Rebeka í bɔ hee ile í koo í so ibɔ kusĩai ama sinteɛ í koo í daa Zakɔbu ama minjisiaɛ si. 16Nɔ í dĩ batai iwou si ikpai amau do ikpa kɔ̃ɔɛ ŋa iyi kù nɛ ntou. 17Ŋɔi í so ijɛ didɔ̃u do pɛ̃ɛ ŋa iyi í ceu í na Zakɔbu.

18Nɔ Zakɔbu í soo í bɔò bi baaɛ í ni, baam.

Nɔ baau í ni, m̀ḿ, yoo nŋɛi, amam.

19Ŋɔi Zakɔbu í jɛaa í ni, amui Esau, ama yemmaɛ. Wee ǹ ce bɛi ì fãau wa. Dede i buba i ŋɔ mɛɛmui sakom nɔu ku ba i weem.

20Nɔ Izaaki í bee amaɛu í ni, amam, bɛirei í ce ì baa ńya ńya bɛɛbɛ.

Ŋɔi Zakɔbu í jɛaa í ni, Aɔ̃ Lafɛ̃ɛɛi í muum.

21Izaaki í sɔ̃ Zakɔbu í ni, bii bɛɛbɛi, sɛkɛɛ wa amam, n baabaaɛ n cɔ mà awɔi ì jɛ Esau amam do ntɔ. 22Ŋɔi Zakɔbu í sɛkɛɛ si baaɛu. Nɔ Izaaki í baabaaɛ í ni, ide ku fɔi Zakɔbui ǹ wa n gbɔ amma awɔi Esaui ǹ wa n baabaa.

23Kù màa domi awɔi nŋu mɔ í nɛ ntoi bɛi ti Esau igbãɛ. Amma hee ku maa weea titã 24í beeɛ í ni, awɔi Esau amam do ntɔ?

Ŋɔi í jɛaa í ni, oo, amui.

25Ŋɔi Izaaki í ni, naaò mɛɛmui sakou wa n ŋɔ ku ba n weeɛ. Ŋɔi Zakɔbu í sɛkɛɛ siɛ í náa iŋau í ŋɔ nɔ í so vɛ̃ɛ má í náa í mɔ. 26Si anyiɛ ŋɔi Izaaki í sɔ̃ɔ í ni, amam, sɛkɛɛ wa i naa i cɔ̃ɔcɔ̃ɔm. 27Ŋɔi Zakɔbu í sɛkɛɛ siɛ í cɔ̃ɔcɔ̃ɔɛ. Ŋɔi Izaaki í gbɔ inunui ibɔɛ ŋa ŋɔi í weea í ni,

wee inunui amam

í yɛ bɛi inunui iko

iyi Aɔ̃ Lafɛ̃ɛ í weea.

28Ilaaɔ̃ ku fãaɛ mandi wa hai lele,

nɔ ku muuɛ amanii ilɛ

ku ba i ba amaajɛ ŋa do vɛ̃ɛ hee ku caa.

29Inɛ nkpɔ ku jirimaɛ

nɔ dimi nkpɔ ku gulɛɛ.

Awɔi aa jɛ lafɛ̃ɛi inɛɛ ŋa

nɔ aŋa fei a ya gulɛɛ.

Inɛ iyi í ceekpeɛ

Ilaaɔ̃ á ceekpe lafɛ̃ɛi,

inɛ mɔ iyi í weeɛ,

Ilaaɔ̃ á weea lafɛ̃ɛi.

Esau wa tɔɔ kuwee

30Iyi Izaaki í cea Zakɔbu kuwee í tã, ŋɔi Zakɔbu í nɛ. Waati iyi í nɛ gbakã ŋɔi Esau igbãɛ mɔ í baa hai adɛu. 31Ŋɔi Esau takaɛ í ce ijɛ didɔ̃ í kooò bi baaɛ ŋɔi í sɔ̃ɔ í ni, baam, dede i ŋɔ mɛɛmui sakou ku ba i weem.

32Ŋɔi Izaaki í bee í ni, awɔi yoo.

Ŋɔi í ni, amui Esau ama yemmaɛ.

33Ŋɔi Izaaki í daki ntɔ ntɔ í ni, debɛi yooi í naam mɛɛmui sako wa ǹ ŋɔ nɔ ǹ weea ì bɛi ì to wa. Lafɛ̃ɛ á nɔ ku ce baakai.

34Iyi Esau í gbɔ ideu hai si gɛlɛi baaɛ ŋɔi í dɔ̃ anu hee lele do inɔ kufɔ nla nla nɔ í sɔ̃ baaɛu í ni, baaba, cea amu mɔ kuwee.

35Ŋɔi Izaaki í ni, ifɔɛ í naa í zambam í gba kuweeɛ tã.

36Ŋɔi Esau í ni, Zakɔbu woo zamba inɛ iyi à waa kpoou, à sɔɔ iriu à baai ntɔ ntɔ. Í zambam nii bɛbɛi hee isɛ gbeeji. Í gba yemma ku jɛm, wee nnyi má í gba kuweem. I kù jɔ̀ɔm mbɔi kuweeu gɔ?

37Ŋɔi Izaaki í jɛaa í ni, wee ǹ coo ku jɛ lafɛ̃ɛɛ, nɔ andi mii iyi í jɛ nyaanzeɛ ŋa fei woo ce icɛɛ ŋai aa jɛ. Nɔ ǹ weea má ǹ ni á ya ba amaajɛ ŋa do vɛ̃ɛ hee ku caa. To, mii an yɔkɔ n ceɛ má, amam.

38Ŋɔi Esau í bee baaɛ í ni, debɛi andi kuweeu bɛi ì nɛɛ baaba. Cea amu mɔ kuwee. Ŋɔi Esau í dɔ̃ anu wa kpata.

39Ŋɔi Izaaki baaɛu í sɔ̃ɔ í ni,

tengi bii aa buba á jĩò baakai ilɛ,

nɔ ilɛɛ kaa nɛ mandi.

40Aa maa wɛɛi na saabui taakubaɛ,

nɔ dimiɛ ŋa aa jɛ arui dimii ifɔɛ ŋa.

Amma aa na a ce igũ a kɔ̀ò ara nŋa.

Ajɔ nŋui aa fita ŋa hai si aru ku jɛ i nɛ ara nŋɛ.

Zakɔbu í sa í nɛ bi Labãa

41Ŋɔi Esau í cé Zakɔbu na kuwee iyi baa nŋa í ceaa. Nɔ í fɔ í ni, ikui baam í maai wa. Si anyii ikuɛ an kpa Zakɔbu ifɔm nɔui.

42Ŋɔi à koo à sisia Rebeka bɛi Esau ama sinteɛu í fɔ. Ŋɔi Rebeka í kpe Zakɔbu ama minjisiaɛu í sɔ̃ɔ í ni, wee igbãɛ wa bi ku sã idɔɔkɔ̃ɛ ku kpaɛ. 43Nsɛi, awɔ amam, gbɔ idem. Dede i sa i bɔ ikpa ilui Harãa bi Labãa wecĩm. 44Nɔ i ce ajɔ minji bi tɛɛ bɛ hee laakaii igbãɛu ku sũ, 45nɔ idɔɔkɔ̃ iyi wa muɛ do ku kita nɔ ku gbɛjɛ mii iyi ì ceaa. Waati bɛɛbɛi an jɔ̀ i baa, domi bii kù jɛ bɛɛbɛ an na n kua iŋɛ minji fei si ajɔ akã.

46Ŋɔi Rebeka í sɔ̃ Izaaki í ni, ǹ gbɛɛji do kuwɛɛm na irii ama inaaboi Hɛti ŋa iyi Esau amam í so. Bii Zakɔbu mɔ í so abo dimi bɛɛbɛ si inɔi ama inaaboi ilɛ ŋau ihɛ̃, kuwɛɛi mii an maa n wɛɛ má.

Currently Selected:

Kusintii Andunya 27: MKL

Highlight

Copy