Kusintii Andunya 26

Izaaki do Abimelɛki

1Si anyii ikui Aburahamu, ari nla nla gɔ í naa si ilɛu, bɛi í tako í ce si waatii Aburahamu. Nɔ Izaaki í bɔ ilui Geraa bi Abimelɛki ilaalui inɛi Filisi ŋa. 2Amma hee ku maa koo bɛ Aɔ̃ Lafɛ̃ɛ í naa siɛ í sɔ̃ɔ í ni, maà bɔ ilɛi Ezibiti, buba si ilɛi ilu iyi an nyisiɛ. 3Buba bɛ an wɛɛ do awɔ, nɔ n weeɛ, domi awɔ do tɔkuɛ ŋai an na ilɛ ŋau ihɛ̃ fei, nɔ akabuu iyi ǹ dĩ do Aburahamu baaɛu an coo. 4An jɔ̀ dimiɛ ŋa a kpɔ bɛi leleaɔ̃ ŋa, nɔ aŋai an na ilɛ ŋau ihɛ̃ fei. Hai bi tu ŋai inɛi andunya fei á baò kuwee. 5An ce bɛɛbɛi si na iyi í jɔ̀ Aburahamu í gbɔ idem, í ce mii iyi ǹ sɔ̃ɔ fei, kù donda woodam baa akã. 6Na ŋɔi í jɔ̀ Izaaki í buba si ilui Geraa.

7Aboɛu abo kusĩai jiida jiida. Iyi inɛi ilu ŋau à yɔɔ, ŋɔi à waa beeɛ ide si gãmɛɛ, nɔ í sɔ̃ ŋa í ni, wecĩm nii. Í ni bɛɛbɛi si na iyi í jɔ̀ wa ce njoi ku ni aboi nŋui domi wa tamaa aa na a kpa nŋu na iriɛ. 8Si bɛi Izaaki í kpɛ ilu bɛ, ŋɔi Abimelɛki ilaalui inɛi Filisi ŋau wa cɔ ilu wa hai bi fɛrɛntii ileɛ, nɔ í yɛ Izaaki do Rebeka aboɛu à waa jɛ bɔndɔ. 9Nɔ Abimelɛki í kpe Izaaki í ni, ntɔ ntɔ Rebeka aboɛi. Bɛirei í ce ì ni wecĩɛi. Nɔ Izaaki í jɛaa í ni, ǹ fɔ bɛɛbɛi ku ba inɛ ŋa a maà a na a kpam na iriɛ. 10Ŋɔi Abimelɛki í ni, bɛirei í ce ì ce nwa bɛɛbɛ. Í gbe keeke wo inɛi ilum gɔ ku sũò aboɛu, nɔ i dasi wa dulum.

11Si anyii nŋu nɔ í jilɛa inɛi ilɛɛ ŋau fei woodau ihɛ̃ í ni, inɛ iyi í lesi inɛɛu ihɛ̃ awɔ, walakɔ aboɛu, aa kpa lafɛ̃ɛi.

Izaaki do Abimelɛki à dĩ akabuu

12Adɔ̃ nŋu bɛi Izaaki í gbɛ̃ amaajɛ ŋa si ilɛi ilui inɛ ŋau, nɔ amaajɛ iyi í na í da í re baa zaka bɛi í tako í gbɛ̃u ikɔ cĩɔ, domi Aɔ̃ Lafɛ̃ɛ í weea. 13Amaniɛ ŋa í kpɔ wa kɔ̃ɔsi nɔ í na í jɛ ilu amani nla nla. 14Í nɛ angudã ŋa do iwo ŋa, do kɛtɛ gaa ŋa do woo ce icɛ ŋa nkpɔ nkpɔ. Na mii ŋau bɛi, inɛi Filisi ŋau à cóo. 15Ŋɔi lɔgɔ ŋa iyi woo ce icɛi baaɛ ŋa à tu hai waati iyi baau í wɛɛ si hunde, à dĩ fei ndɛɛ do sãa. 16Nɔ Abimelɛki ilaalu nŋau í sɔ̃ Izaaki í ni, ì re wa do gbugbã bɛi hee í caa, nɛ hai ihɛ̃. 17Izaaki í nɛ hai bɛ nɔ í kã iri ikpa angbɔɔi Geraa í koo í buba bɛ. 18Nɔ í teese í wa lɔgɔ ŋa iyi à tu si waatii Aburahamu baaɛu fei, lɔgɔ ŋa iyi inɛi Filisi ŋa à dĩ si anyii ikuɛu, nɔ í na ŋa iri dimi akã bɛi à tako à sɔ ŋau. 19Ajɔ nŋu gɔ woo ce icɛi Izaaki ŋa à waa tu lɔgɔ si angbɔɔu nɔ à yɛ isɔ̃ gɔ bɛ. 20Nɔ woo degbe mɛɛmui inɛi ilui Geraa ŋau à ya maa dɛ ijai woo degbe mɛɛmui Izaaki ŋai a maa ni, awai à nɛ inyau. Ŋɔi í jɔ̀ Izaaki í sɔ lɔgɔu Esɛki, waatɔ ija, domi à ja sii. 21Woo ce icɛi Izaaki ŋau à nyi à tu lɔgɔ mmuɛ má, nɔ à waa dɛ ijaɛ si nŋu mɔ má, nɔ í sɔ lɔgɔ nŋu mɔ Sitina, waatɔ ide hai jɛ. 22Nɔ Izaaki í tekĩ hai bɛ í koo í tu lɔgɔ mmuɛ. Tengi bɛ a kù baa do ija má, nɔ í sɔɔ Rehobɔti, waatɔ kucĩ, domi í ni, Aɔ̃ Lafɛ̃ɛ í dasi wa tengi bii í cĩ bɛbɛi, nɔ aa ka kpɔ jiida si ilɛu ihɛ̃.

23Si anyiɛ Izaaki í nɛ hai bɛ wa bɔ ikpa Bɛɛseba. 24Idũi ajɔ iyi í to bɛu Aɔ̃ Lafɛ̃ɛ í naa siɛ í sɔ̃ɔ í ni, amui ǹ jɛ Lafɛ̃ɛi Aburahamu baaɛ. Maà ce njo domi ǹ wɛɛ do awɔ. An weeɛ nɔ an jɔ̀ dimiɛ ŋa a kpɔ na irii Aburahamu woo ce icɛm. 25Ŋɔi Izaaki í ma bi kuwee si inyau, nɔ í ya maa tɔɔ Aɔ̃ Lafɛ̃ɛ bɛ. Tengi bɛi í gũ ilei acɔɛ ŋa nɔ woo ce icɛɛ ŋau à tu lɔgɔ mmuɛ bɛ má.

26Abimelɛki í dede í koo siɛ hai Geraa í bɔ ku cɔɛ, nŋu do Ahuza iyi wa jɛ minjisiaɛ, do Pikɔlu iyi wa jɛ inɛ ngboi soogeɛ ŋau. 27Nɔ Izaaki í bee ŋa í ni, bɛirei í ce ì naa bi tom ŋa, iŋɛ iyi ì cém nɔ ì lelem ì nyam hai bi tu ŋɛ. 28Nɔ à jɛaa à ni, à yɔɔ iyi Aɔ̃ Lafɛ̃ɛ í wɛɛ do awɔi. Na ŋɔi í jɔ̀ à ni á sĩa awaɛ ŋa ka dĩ akabuu nɔ ku jɛ do kugbasi. 29Gbasi ntɔ ntɔ iyi i kaa ce nwa laalɔ kãma, si na iyi í jɔ̀ awa mɔ a kù kpãɛ iju wo, jiida nŋu akãi à ceɛ, à jɔ̀ ì nɛ do laakai ku sũ. Nɔ nsɛi Aɔ̃ Lafɛ̃ɛ í weeɛ. 30Nɔ Izaaki í ce nŋa sɔnda jiida, à jɛ nɔ à mɔ. 31Nɔ à dede daadaakɔ à dĩ akabuu nŋa do kugbasi. Nɔ Izaaki í jɔ̀ à nɛ do laakai ku sũ. 32Ajɔ nŋu mɔi woo ce icɛi Izaaki ŋau à naa à sɔ̃ɔ idei lɔgɔ iyi à waa tuu à ni, lɔgɔu í ce inyi. 33Nɔ Izaaki í sɔ lɔgɔu Sibea, waatɔ kugbasi. Na ŋɔi í jɔ̀ baa nnyi à waa kpe iluu Bɛɛseba, waatɔ lɔgɔi kugbasi.

Esau í so abo ŋa

34Esau mɔ í nɛ adɔ̃ ciiji waati iyi í so abo minji. Aboɛ ŋau aŋa fei inɛi Hɛti ŋai. Iri nŋa ŋa wee. Zuditi amai Beri do Basimati amai Elɔ̃ɔ. 35Amma aboɛ ŋau à jɔ̀ inɔi Izaaki do Rebeka í fɔ hee í caa.

Currently Selected:

Kusintii Andunya 26: MKL

Highlight

Copy