Kusintii Andunya 25
25
Ikui Aburahamu
1Hai tako wo Aburahamu í so abo mmu gɔ mɔ, à ya kpoo Ketura. 2Nɔ nŋu mɔ í bíaa amu ŋa. Irii amu ŋau wee. Zimirãa do Yɔkisãa do Medãa do Madiãa do Yisibaki do Sua. 3Yɔkisãa mɔi í bí Seba do Dedãa. Tɔkui Dedãa ŋa mɔ wee. Inɛi Asikuri ŋa do inɛi Letusi ŋa do inɛi Leomi ŋa. 4Amai Madiãa ŋa mɔ wee. Efa do Efɛɛ do Enɔku do Abida do Elida. Inɛ nŋu ŋau bɛ fei tɔkui Ketura ŋai.
5Aburahamu í jɔ̀a Izaaki amaniɛ fei ku jɛ tubuɛ. 6Amma amai abo iyi ihɔ̃ ŋau mɔ í ce nŋa amua ŋa hai waati iyi í wɛɛ si hunde, í bɛi í lele ŋa hai bi Izaaki à nɛ ikpa nunui daakɔ. 7-8Aburahamu í gbo ntɔ ntɔ í ce adɔ̃ cĩɔ do kitaò fɛɛwa do miiu (175) í bɛi í ku í nyi bi balaɛ ŋa. 9Izaaki do Isimaɛli amaɛ ŋau à suu tengii Maree si isai kutai Makpela iyi í wa ikoi Eforɔ̃ɔ amai Sokaa inɛi Hɛtiu. 10Aburahamui í ra ikou bi tɔkui Hɛti ŋa. Bɛi à si nŋu takaɛ kɔkɔi Sara aboɛu. 11Si anyii ikui Aburahamu Ilaaɔ̃ í weea Izaaki amaɛu. Waati bɛɛbɛ kɔkɔi lɔgɔi Lakai-Roiu bɛi í wa.
Dimii amai Isimaɛli ŋa
12Faajii nyaanzei Isimaɛli amai Aburahamu, nŋu iyi Agaa inɛi Ezibiti woo ce icɛi Sarau í bíaa wee. 13Irii amaɛ ŋau mɔ wee si bɛi à mɔmɔ à naò njɛ. Ama yemmaɛ nŋui í jɛ Nebayɔti do ifɔɛ ŋa Kedaa do Adibɛli do Mibusamu, 14do Misema do Duma do Masa, 15do Hadadi do Tema do Yetuu do Nafisu do Kedima. 16Inɛ nŋu ŋau bɛi à jɛ ama maateejii Isimaɛli ŋau. Nɔ inɛ akã nŋa fei í jɛ inɛ ngboi dimi gɔ, nɔ tengi bii à wa iri nŋai à ya kpeò inyau. 17Isimaɛli í cei adɔ̃ cĩɔ do kuntaa do mɛɛje (137) í bɛi í ku í nyi bi balaɛ ŋa. 18Tɔkuɛ ŋai à waa buba si inyau hai Havila hee ku bɔ Suu iyi í wa kɔkɔi ilɛi Ezibitiu bii ì waa bɔ ikpa ilɛi Asiri. Si inɔi tɔkui Aburahamu ŋau fei inɛ nŋu ŋa à nya ara nŋai ikã.
Kubíi Esau do Zakɔbu
19Faajii nyaanzei Izaaki amai Aburahamu wee. Aburahamu í bí Izaaki. 20Iyi Izaaki í ce adɔ̃ ciiji nɔ í so Rebeka í jɛ aboɛ. Rebeka mɔ wa jɛ wecĩi Labãa. Baa nŋai à ya kpe Betuɛli inɛi Aramu. Ilu nŋa mɔi Padan-Aramu. 21Aboi Izaakiu gbɛndai. Ŋɔi Izaaki í tɔɔ Aɔ̃ Lafɛ̃ɛ na iriɛ. Nɔ Aɔ̃ Lafɛ̃ɛ í gba kutɔɔɛ nɔ Rebeka í nɛ asĩ [amma kù mà iyi sika ŋai]. 22Ŋɔi amu ŋau à ya maa tale tale njɛ si inɔɛ bɛ ŋɔi í bee Aɔ̃ Lafɛ̃ɛ í ni, dimii mii wa bam. 23Ŋɔi Aɔ̃ Lafɛ̃ɛ í sɔ̃ɔ í ni,
dimi minjii í wa si inɔɛ,
dimi ŋau aa fɛɛfɛɛ njɛi.
Waati iyi aa na a fita hai inɔɛ,
inɛ akã á re inɛ akã do gbugbã.
Igbãui á na ku sũa ifɔu iri ilɛ.
24Iyi cukpai kubíi abou í kɔ̃, ŋɔi í ba wee ntɔ ntɔ sika ŋai à wa inɔi nŋu. 25Inɛ sinteu í naa nɔ araɛ í nɛ nto nkpa. Nɔ à sɔɔ Esau#25:25 Esau Bii ì gbɔ iriu, í ya jɔ bɛi à waa ni ilu nto do feei Ebɛɛi.. 26Si anyiɛ nɔ inɛ minjisiau mɔ í naa, nŋu mɔ awɔɛ wa mu cicĩisɛi Esau. Nɔ à sɔ nŋu mɔ Zakɔbu#25:26 Zakɔbu Bii ì gbɔ iriu, í ya jɔ bɛi à waa ni cicĩisɛ do feei Ebɛɛi. Cicĩisɛ ku muu mɔ, yaaseɛi í jɛ woo zamba inɛ.. Adɔ̃ kitai Izaaki í nɛ si waati iyi à bí ŋa.
Esau í ta yemma ku jɛɛ
27Ŋɔi adɔ̃ í koo wa baa nɔ amu ŋau à na à dede à la. Nɔ Esau í jɛ tobi jiida, inɔ sakoi í ya maa wa. Zakɔbu mɔ í fita amanɛ sɛ̃ɛ, kpasɛ̃i í ya maa wa waati kãma fei. 28Izaaki í bi Esau í re domi í ya ba mɛɛmui sako ku maa ŋɔ, nɔ Rebeka mɔ í bi Zakɔbu í re.
29Ŋɔi ajɔ nŋu gɔ Zakɔbu wa ce ayɛ nkpa do ilege nɔ Esau mɔ í baa hai tobi do gbɛɛji nla gɔ. 30Ŋɔi Esau í sɔ̃ Zakɔbu í ni, buum ayɛ nkpau bɛ n jɛ, domi ǹ gbɛɛji hee í caa. Ŋɔi í jɔ̀ à waa kpe Esau Edɔmu, waatɔ nkpa.
31Ŋɔi Zakɔbu í jɛaa í ni, bii ì bi bɛɛbɛ, í gbe i taam ama yemma ku jɛɛu wa nnyi.
32Ŋɔi Esau í jɛaa í ni, to, ǹ wa n bi n ku, yoomai í jɛ aranfãanii yemma ku jɛm.
33Ŋɔi Zakɔbu í ni, gbasi do ntɔ titã.
Nɔ í gbasi í taa Zakɔbu yemma ku jɛɛu. 34Ŋɔi Zakɔbu í so ayɛu do pɛ̃ɛ í naa. Esau í jɛ í mɔ nɔ í nɛɛ. Yaase bɛi í ceu bɛ kù saalu yemma ku jɛɛi.
Currently Selected:
Kusintii Andunya 25: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
