Kusintii Andunya 24
24
À dɛdɛa Izaaki abo
1Waati bɛɛbɛ Aburahamu í gbo ntɔ ntɔ, nɔ Aɔ̃ Lafɛ̃ɛ í weea si mii fei. 2Ŋɔi í kpe inɛ ngboi woo ce icɛɛ ŋa, nŋu iyi wa mu amanii kpasɛ̃ɛ fei í sɔ̃ɔ í ni, ǹ wa n tɔɔɛi, dasi awɔɛ si lɛlɛi itãm #24:2 dasi awɔɛ si lɛlɛi itãm Do bɛɛbɛi à ya ceaò inɛ kuwã iyi í nɛ bɛɛrɛ nla nla.. 3Ǹ bi i gbasi do irii Aɔ̃ Lafɛ̃ɛ, nŋu iyi í jɛ Lafɛ̃ɛi lele do ti ilɛ fei, i maà soa amam abo si ama mudɛ̃ɛi Kanaã ŋa bii à wau ihɛ̃. 4Amma bɔ hee ilɛi idem i dɛdɛa Izaaki amam abo wa hai si inɔi nyaanzem ŋa.
5Ŋɔi woo ce icɛu í jɛaa í ni, á yɔkɔ ku jɛ ama inaabou kaa jɛ ku toom wa hee ilɛu ihɛ̃. Asaiya í wɛɛ n bɔò amaɛ hai ilɛ bii ì fita wa?
6Ŋɔi Aburahamu í sɔ̃ɔ í ni, laakai maà na i bɔò amam bɛ. 7Aɔ̃ Lafɛ̃ɛi lele iyi í nyam wa hai kpasɛ̃i baam do hai si ilɛ bii à bím, í gbasi í bam ide ku fɔ í ni dimii amam ŋai á na ilɛu. Nŋui á jɔ̀ amalekaɛ ku cuaɛ nɔ i dɛdɛa amam abo wa hai bɛ. 8Bii abou kù jɛ ku tooɛ wa, awɔ de í kɔ̃ kuwãɛ mbɛ. Amma maà bɔò amam si ilɛu bɛ. 9Iyi Aburahamu í fɔ bɛɛbɛ í tã, ŋɔi woo ce icɛu í dasi awɔɛ si lɛlɛi itãi Aburahamu lafɛ̃ɛɛu. Nɔ í gbasi í ni nŋu á coo fei sãa sãa.
10Ŋɔi í koo í nya kpookpo mɛɛwa hai si inɔi kpookpoi lafɛ̃ɛɛ, do amani jiidai lafɛ̃ɛɛu fei. Nɔ í dede í dasi kpãa í bɔ ilui Nakɔɔ si ilɛi Mezopotami. 11Iyi í to kɔkɔi iluu ŋɔi í jɔ̀ kpookpoɛ ŋa à gulɛ à waa sĩmi kɔkɔi lɔgɔ gɔ bɛ alɛ zakai inaabo ŋa à ya naa inyi ku kpãu. 12Ŋɔi í ni, Aɔ̃ Lafɛ̃ɛ, awɔ iyi ì jɛ Lafɛ̃ɛi Aburahamu lafɛ̃ɛm, ǹ tɔɔɛi, jɔ̀ n ba mii iyi ǹ naa ku dɛ ihɛ̃ nnyi, nɔ i cea Aburahamu lafɛ̃ɛm didɔ̃. 13Wee ǹ wa kɔkɔi lɔgɔu ihɛ̃ nsɛi, nɔ mudɛ̃ɛi ilu ŋau aa naa inyi ku kpã. 14Ama inaabo iyi an tɔɔɛ n ni ku muum inyi n mɔ nɔ ku nyi jɔlɔɛ ku ni n mɔ, nɔ ku mua kpookpom ŋa inyi, jɔ̀ mudɛ̃ɛ iyi bɛ ku jɛ iyi ì cicaa Izaaki woo ce icɛɛ. Bii ì ce bɛɛbɛ an mà iyi ì cea lafɛ̃ɛm didɔ̃.
15Hee ku maa fɔ ideu ku maa tã ŋɔi Rebeka í faata wa, wa so jɔlɔi inyi. Wee Rebekau amai Betuɛlii. Nɔ Betuɛli takaɛ wa jɛ ama iyi Milika í bía Nakɔɔ, ifɔi Aburahamu. 16Ama inaabou abo kusĩa jiida gɔi, nɔ kù mà mɔkɔ titã. Í bɔ lɔgɔ í koo í kpã inyi si jɔlɔɛ hee í kɔ̃ nɔ í soo wa nɛ. 17Ŋɔi woo ce icɛu í sɛi í koo í báa, í tɔɔɛ í ni, muum inyii jɔlɔɛu n mɔ keeke. 18Ŋɔi í ni, mɔ, lafɛ̃ɛm. Nɔ gbakã í sɔ jɔlɔu í muaa inyiu í mɔ. 19Iyi í mua mɔkɔu inyi í tã, ŋɔi í ni, an kpãa kpookpoɛ ŋa mɔ wa a mɔ a yo. 20Ŋɔi í sinda inyi iyi í gbeu si bi ku mɔi mɛɛmu ŋau, nɔ í sɛi í bɔ lɔgɔ í kpã wa má. Nɔ í kpãa kpookpo ŋau fei. 21Ŋɔi mɔkɔu í cɔɔ nɔ í cokoɛ, ku cɔ bɛi Aɔ̃ Lafɛ̃ɛ í jɔ̀ isɛɛnɛɛu í dɔ̃.
22Waati iyi kpookpo ŋau à mɔ à tã, ŋɔi mɔkɔu í nya lɛlɛawɔi wura wa do isɔi awɔi wura #24:22 í nya lɛlɛawɔi wura wa do isɔi awɔi wura Do feei Ebɛɛ à ni kuwoi lɛlɛawɔ í to sikilii bubu, waatɔ garamu mɛɛfa, ti isɔi awɔu mɔ í to sikilii mɛɛwa, waatɔ garamu cĩɔ do kulesi. minji gɔ ŋa í naa. Kuwoi lɛlɛawɔ í to garamu mɛɛfa, ti isɔi awɔu mɔ í to garamu cĩɔ do kulesi. 23Ŋɔi í ni, ceem gaafara, awɔ amai yooi. Inya í wa kpasɛ̃i baaɛ n na n sɔ bɛ amu do inɛm ŋa?
24Ŋɔi Rebeka í jɛaa í ni, amu ama inaaboi Betuɛlii, inɛ iyi Milika í bía Nakɔɔ. 25Ŋɔi í sɔ̃ɔ má í ni, kpasɛ̃ nwa fɔfɔ do taka fei wa kɔ̃i, inya í wa bɛ bii aa sɔ ŋa.
26Ŋɔi mɔkɔu í gulɛ í saabu Aɔ̃ Lafɛ̃ɛ. 27Í ni, ǹ wa n saabuɛ Aɔ̃ Lafɛ̃ɛ, Lafɛ̃ɛi Aburahamu, si na iyi í jɔ̀ ì cea lafɛ̃ɛm didɔ̃ do bɔɔcĩi ntɔ ntɔ. Amu takam ì bɔɔm hee si kpasɛ̃i nyaanzei lafɛ̃ɛm ŋa.
28Ŋɔi ama inaabou í sɛi í koo í sisia inɛi kpasɛ̃i iyeɛ ŋa ideu. 29-30Wee Rebeka í nɛ wecĩɛ gɔ à ya kpoo Labãa. Wecĩɛu í yɛ lɛlɛawɔu do isɔi awɔ ŋau si awɔi Rebeka, í nɔ í gbɔ ide iyi í fɔ, bɛi mɔkɔu í sɔ̃ɔ. Ŋɔi í sɛi í bɔ lɔgɔ bii mɔkɔu í wa, nŋu do kpookpoɛ ŋa. 31Ŋɔi í sɔ̃ mɔkɔu í ni, dede ka bɔ kpasɛ̃, awɔ iyi Aɔ̃ Lafɛ̃ɛ í weeɛ. Na mii í ce aa maa leekĩ waduude ihɛ̃. Wee ǹ ceɛ bi ku sɔ kpasɛ̃ do tengi bii kpookpoɛ ŋa mɔ aa wa.
32Iyi mɔkɔu í to kpasɛ̃ bɛ, Labãa í jɔ̀ à fũ asoi kpookpo ŋau nɔ à na ŋa fɔfɔ do taka à jɛ. Nɔ à bu inyi wa ku ba mɔkɔu do inɛɛ ŋa iyi à suu wau a wiɛ kutɔ nŋa ŋa. 33Nɔ à naa à jilɛ nŋa sɔnda. Amma mɔkɔu í ni, n kaa n jɛ titã bii kù jɛ ǹ fɔ ide iyi ǹ wa n nɛò wa ǹ kpa iriɛ. Ŋɔi Labãa í ni, to, fɔ ideɛ.
34Ŋɔi í ni, amu woo ce icɛi Aburahamui. 35Aɔ̃ Lafɛ̃ɛ í weea lafɛ̃ɛm jiida jiida, nɔ í jɛ ilu amani nla nla. Í mua angudã do kɛtɛ ŋa do isɔ fũfũ do wura do woo ce icɛ inɛmɔkɔ do inaabo ŋa do kpookpo do gbankɛlɛ ŋa. 36Sara, aboi lafɛ̃ɛm, nŋui í bía ama inɛmɔkɔ hee si agboɛ, nɔ andi mii iyi í nɛ fei í so í na amau. 37Nɔ lafɛ̃ɛm í ni n gbasi do ntɔ n maà n na n soa amai nŋu abo si inɔi mudɛ̃ɛi Kanaã ŋa si ilɛ bii nŋu í wau bɛ. 38Amma í ni n bɔ kpasɛ̃i baai nŋu do nyaanzei nŋu ŋa n dɛdɛa amai nŋu abo wa. 39Ŋɔi ǹ sɔ̃ lafɛ̃ɛm ǹ ni, bii i kù laakai ama inaabou kaa na ku jɛ ku toom wa. 40Nɔ í jɛɛm í ni Aɔ̃ Lafɛ̃ɛ iyi nŋu wa tɔɔ si kuwɛɛi nŋu fei á bɛ amalekaɛ wa ku sim nɔ ku jɔ̀ isɛɛnɛm ku dɔ̃ ku ba n soa amai nŋu abo wa si kpasɛ̃i baai nŋu do nyaanzei nŋu. 41Nɔ í ni bii ǹ bɔ bi nyaanzei nŋu ŋa ǹ fita si ikpe mbɛ. Bii ǹ nɔ ǹ to bi nyaanzei nŋu ŋau baa bii a kù nam mudɛ̃ɛ gɔ wa, do nŋu fei ǹ kɔ̃ kuwãm nii mbɛ.
42Iyi í fɔ bɛɛbɛ í tã, ŋɔi ǹ dasi kpãa wa, nɔ nnyi ǹ to wa bi lɔgɔu. Waati iyi ǹ to wa bɛ, ŋɔi ǹ ce kutɔɔ ǹ ni, Aɔ̃ Lafɛ̃ɛ, awɔ iyi lafɛ̃ɛm Aburahamu wa tɔɔ, jɔ̀ isɛɛnɛm nɔu ku dɔ̃. 43Amu wee kɔkɔi lɔgɔu ihɛ̃. Waati iyi inaabo ŋa aa naa inyi ku kpã, an tɔɔ mudɛ̃ɛ gɔ n ni ku muum inyi keeke wa hai si jɔlɔɛ n mɔ. 44Bii mudɛ̃ɛu í jɛɛm í ni n naa n mɔ, nɔ í kpãa kpookpom ŋa, jɔ̀ mudɛ̃ɛu bɛ ku jɛ abo iyi ì cicaa amai lafɛ̃ɛm.
45Hee ǹ ce kutɔɔ si idɔm ǹ maa n tã gbakã ŋɔi ǹ hɔ̃nnɛ Rebeka í lesi jɔlɔ si kɔngɔɛ, í naa andɛ lɔgɔu í kpã inyi wa. Ŋɔi ǹ tɔɔɛ ǹ ni, muum inyi n mɔ. 46Ŋɔi í sɔ jɔlɔɛ gbakã í ni n mɔ nɔ í ni nŋu á kpãa kpookpom ŋa wa má a mɔ. Ǹ mɔ nɔ í kpãa aŋa mɔ a mɔ. 47Ŋɔi ǹ beeɛ ǹ ni, awɔ amai yooi. Ŋɔi í jɛɛm í ni nŋu amai Betuɛlii, inɛ iyi Milika í bía Nakɔɔ. Iyi í ni bɛɛbɛ, ŋɔi ǹ daa si lɛlɛawɔ si imɔ nɔ ǹ nyi ǹ daa si isɔi awɔ má si awɔɛ. 48Nɔ ǹ sɛɛbataa Aɔ̃ Lafɛ̃ɛ, nŋu iyi í jɛ Lafɛ̃ɛi Aburahamu lafɛ̃ɛm nɔ ǹ saabuɛ do bɛi í sobim si bɔɔcĩi ku jɛɛ hee ǹ to bi tɔkui ifɔi lafɛ̃ɛm ku ba n soo koo jɛ aboi amaɛ. 49Nsɛi, bii ì bi i cea lafɛ̃ɛm didɔ̃ do bɔɔcĩi ŋa, i sɔ̃m. Bii i kù waa ce ŋa mɔ i sɔ̃m n bɔ waju.
50Ŋɔi Labãa do Betuɛli à jɛ à ni, hai bi Aɔ̃ Lafɛ̃ɛ mii ŋau ihɛ̃ fei wa naa. A kaa ka yɔkɔ ka ni ide kãma, bii jiidai walakɔ bii laalɔ mɔi. 51Rebeka wee si wajuɛ. So i nɛòɛ koo jɛ aboi amai lafɛ̃ɛɛ, si bɛi Aɔ̃ Lafɛ̃ɛ í fɔ. 52Iyi woo ce icɛi Aburahamu í gbɔ ide nŋa ŋɔi í sɛɛbataa Aɔ̃ Lafɛ̃ɛ. 53Ŋɔi í nya mii ŋa iyi à ce do isɔ fũfũ do iyi à ce do wura do acɔ ŋa, í mua Rebeka. Nɔ í mua iyeu do wecĩu mɔ mii jiida ŋa má. 54Si anyii nŋu mɔkɔu do inɛɛ ŋa à jɛ à mɔ, nɔ à sũ.
Iyi à dede daadaakɔ ŋɔi mɔkɔu í ni, i jɔ̀ n sinda n bɔ ide bi lafɛ̃ɛm bɛɛbɛ.
55Ŋɔi wecĩi Rebeka do iyeɛ à ni, jɔ̀ ama inaabou ku ce baa waati keeke bi tu wa ihɛ̃ titã. Bii í ce baa ajɔ mɛɛwa i bɛi i nɛ ŋa.
56Ŋɔi í jɛ nŋa í ni, i maà jɔ̀ n kpɛ ihɛ̃ má, domi Aɔ̃ Lafɛ̃ɛ í jɔ̀ isɛɛnɛm nɔu í dɔ̃. Na nŋu, i dam bɛɛbɛ n nyi bi lafɛ̃ɛm.
57Ŋɔi à ni, ka kpe ama inaabou takaɛ ka gbɔ bɛi á fɔ. 58Ŋɔi à kpe Rebeka à beeɛ à ni, ì jɛsi i too mɔkɔu?
Nɔ í ni, oo. An tooɛ.
59Ŋɔi à jɛsi Rebeka wecĩ nŋau do inaabo woo ce icɛ iyi í bíiɛ a nɛ do woo ce icɛi Aburahamuu do inɛ ŋa iyi à suu wau. 60Ŋɔi à weea Rebeka à ni,
awɔi ì jɛ wecĩ nwa,
Ilaaɔ̃ ku jɔ̀ i jɛ iyei zamaa nla nla,
nɔ dimii amaɛ ŋa a kãmia mbɛɛ nŋa ŋa,
a gba ilu nŋa ŋa.
61Iyi à fɔ bɛɛbɛ à tã, ŋɔi Rebeka do ama inaabo woo ce icɛɛ ŋa à dede à gũ kpookpo à too mɔkɔu. Do yaase bɛi woo ce icɛi Aburahamuu í so Rebeka í nɛò mbɛ.
62Wee si waati nŋu Izaaki í dede hai lɔgɔi Lakai-Roi í koo í buba ilɛi Negɛbu. 63Ajɔ nŋu gɔ ŋɔi í fita zakai alɛ wa dabii si sako wa lasabuò. Ŋɔi í wu iju í cɔ do wajuɛ nɔ í ba wee kpookpo ŋa à faata wa à waa naa ikpa bi tɛɛ. 64Ŋɔi Rebeka takaɛ mɔ í wu iju í cɔ do wajuɛ nɔ í yɛ Izaaki. Ŋɔi í kita hai si antaii kpookpou. 65Nɔ í bee woo ce icɛu í ni, mɔkɔ yoomai í fita wa hai inɔ sako wa naa ku ko wau ihɛ̃.
Ŋɔi woo ce icɛu í ni, lafɛ̃ɛm nii. Iyi Rebeka í gbɔ bɛɛbɛ ŋɔi í so fuugɛsɛ í biiò iriɛ.
66Ŋɔi woo ce icɛu í sisia Izaaki ide ŋa iyi í ceu fei. 67Izaaki í so Rebeka í jɛ aboɛ í bɔòɛ ilei acɔ iyi í tako í jɛ ti Sara iyeɛu, nɔ í buu jiida jiida. Abou í tũ idɔi Izaaki si anyii ikui iyeɛu.
Currently Selected:
Kusintii Andunya 24: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
