Kusintii Andunya 23
23
Sara í ku nɔ Aburahamu í ra tengi bii á suu
1Sara í cei adɔ̃ cifa do mɛɛje í bɛi í ku. 2Í kui si ilui Kiria-Aaba, waatɔ Eborɔ̃ɔ si ilɛi Kanaã. Nɔ Aburahamu í kpata, í ce akũɛ. 3Nɔ í dede hai bi ikui aboɛu, í koo í ba tɔkui Hɛti ŋa ide ku fɔ í ni, 4amu inɛ njooi nɔ ǹ wa si inɔ nŋɛ. Ǹ wa n tɔɔ ŋɛi, i taam inya tengi bii an ya si inɛm ŋa nɔ n koo n si abom nɔu ihɛ̃ tengi bɛ.
5Tɔkui Hɛti ŋa à jɛaa à ni, 6lafɛ̃ɛ nwa, gbɔ ide iyi à waa fɔ. À waa cɔɛi bɛi amai amanlu iyi Ilaaɔ̃ í weea si inɔ nwa. Si ikui aboɛ tengi bii ì bi. Balɛ ŋa iyi à cea ara nwa sɔɔluɛ, kãma nwa kaa kɔ̀ i si aboɛ si bɛ.
7Aburahamu í dede í sɛɛbata si waju nŋa. 8Nɔ í sɔ̃ ŋa í ni, bii ì jɛsi n si ikui abom nɔu ihɛ̃ ŋa, i koo i tɔɔ Eforɔ̃ɔ amai Sokaa ŋa 9ku jɔ̀ɔm isai kutai Makpela, iyi ì wa kɔɔi ikoɛu ku ba ku jɛ bii an si inɛm ŋa si anini nŋɛ, nɔ n sãa fiaɛ zaka bɛi í to.
10Wee Eforɔ̃ɔ inɛi Hɛtiu í wa bɛ wa buba si inɔi inɛɛ ŋa. Ŋɔi í jɛa Aburahamu si wajui inɛi Hɛti ŋa iyi à wa andɛ koofai iluɛu fei í ni, 11aawo, lafɛ̃ɛm. Gbɔ idem. An muuɛ ikou, nɔ n muuɛ isai kuta iyi í wa bɛu. N muuɛi si wajui inɛm ŋa, si ikui aboɛu bɛ.
12Aburahamu í dede í sɛɛbata si wajui inɛ ŋau. 13Nɔ í ba Eforɔ̃ɔ ide ku fɔ si wajui inɛi ilɛ ŋau í ni, ǹ wa n tɔɔɛi, gbɔ idem. Jɛsi i jɔ̀ n sãɛ fiai ikou nɔ n si ikui abom nɔu bɛ. 14Nɔ Eforɔ̃ɔ í jɛaa í ni, 15lafɛ̃ɛm, gbɔ idem. Ilɛ iyi kù lɔ isɔ fũfũ #23:15 isɔ fũfũ Si waati nŋa isɔ fũfũu bɛi í jɛ fia iyi à ya jɛ. Nɔ bii à waa bi à ra iwo à ya wãai. kpɛkɛlɛ cĩɔ mɛɛ mii á ce si gãmɛi amu do awɔ. Awɔ de si aboɛ.
16Aburahamu í jɛsi idei Eforɔ̃ɔ. Nɔ í so isɔ fũfũu si bɛi í tako í fɔu í wãa si wajui inɛi Hɛti ŋa bɛi inɛ í ya ra iwo bi woo nya sĩa. 17Ajɔ nŋu ŋɔi Aburahamu í ra ikoi Eforɔ̃ɔ iyi í wa Makpela do wajui Mareeu. Í ra ikou do isai kuta iyi í wa bɛu, do jĩi ŋa iyi à wa si inɔ ilɛu fei, hee do iyi à wa si itĩ kɔɔ à kaako ilɛu fei. 18Fei ndɛɛ í baa í jɛ ti Aburahamu si wajui inɛi Hɛti ŋa iyi à wa andɛ koofai iluu fei.
19Si anyii nŋu Aburahamu í si Sara aboɛu si isai kuta iyi í wa ikoi Makpela do wajui Maree si ilɛi Kanaã. Mareeui à ya kpe Eborɔ̃ɔ má. 20Ikou do isai kuta iyi í wa bɛu fei iyi í tako í jɛ ti inɛi Hɛti ŋa, í baa í jɛ bi ku si ikui inɛi Aburahamu ŋa.
Currently Selected:
Kusintii Andunya 23: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
