Woo bɛ ŋa 1

À cea woo bɛ ŋau kuwãi Hundei Ilaaɔ̃

1Baakɔɔm, Teofili,

Si tia sintem ǹ kɔ mii iyi Jesu í ce do cio iyi í ya maa kɔa inɛ ŋa si fei hai sinteɛ, 2hee í koo í to ajɔ iyi Ilaaɔ̃ í soo lele. Hee ku maa nɛ, inɛ ŋa iyi í cica wo à jɛ woo bɛ ŋau, í ba ŋa ide ku fɔ do gbugbãi Hundei Ilaaɔ̃ í sɔ̃ ŋa bɛi aa ce. 3Si anyii kujĩɛ hai si balɛ, í nyisi ŋa araɛ si afei ajɔ ciiji isɛ fɛɛfɛlo ku jɛ nŋa sɛɛda iyi kù nɛ sika sika iyi nŋu í wɛɛ. À yɔɔ nɔ í ce nŋa faajii bommai Ilaaɔ̃. 4Ajɔ nŋu gɔ, si bɛi Jesu do mɔcɔɛ ŋa à wa inya akã í sɔ̃ ŋa í ni, i maà tekĩ hai Zeruzalɛmu ŋa, amma i degbe amua iyi Ilaaɔ̃ Baaba í wãò ŋɛu, amua iyi ǹ tako ǹ sɔ̃ ŋɛ ideɛu. 5Zãa nŋu, inyii í dasi ŋɛ wo, amma si ajɔ minjiu ihɛ̃ aa da nŋɛ si Hundei Ilaaɔ̃.

Jesu í nɛ lele

6Ŋɔi woo bɛ ŋa iyi aŋaò Jesu ŋa à wa inya akãu à beeɛ à ni, Lafɛ̃ɛ, bɛbɛii aa teese i jilɛ bommai Izirɛli? 7Ŋɔi Jesu í jɛ nŋa í ni, kù jɛ baa nŋɛ i mà ajɔu walakɔ i mà yaase bɛi mii ŋau bɛ á na ku ce ŋa. Ilaaɔ̃ Baabai í jilɛ iyi bɛ ŋa do yiikoɛ. 8Amma aa ba gbugbã ŋa waati iyi Hundei Ilaaɔ̃ á naa si ŋɛ. Aa jɛa inɛ ŋa sɛɛdam ŋa si ilui Zeruzalɛmu, do si ilɛi Zudee fei, do si ilɛi Samari hee ku bɔ do kɔɔi andunya fei. 9Iyi Jesu í fɔ ideu í tã, ŋɔi à waa cɔɔ nɔ à ba wee í nɛ ikpa lele nɔ kudũi ijĩ gɔ í jɔ̀ a kù yɔɔ má.

10Waati iyi à waa cɔɔ wa nɛ ikpa lelei Aɔ̃, ŋɔi gbakã à yɛ woo dasi ibɔ fũfũ minji gɔ ŋa bɛ à waa leekĩ kɔkɔ nŋa. 11Ŋɔi inɛ ŋau à ni, iŋɛ inɛi Galilee ŋa, na mii í ce ì leekĩ ì waa cɔ lele ŋa. Jesuu bɛ iyi Ilaaɔ̃ í so ikpa lele hai bi tu ŋɛu á nyi wa má do yaase bɛi ì yɔɔ í nɛò leleu ŋa.

Nsũi Zudasi

12Iyi inɛ ŋau à fɔ bɛɛbɛ à tã, ŋɔi woo bɛ ŋau à sinda wa hai geetei Olivie bii à wau à nyi wa Zeruzalɛmu. Iri kutau í wa kɔkɔi iluu zakai kiloo akã. 13Iyi à to Zeruzalɛmu ŋɔi à gũ lelei ile kukpɛkɛ bii à ya maa wau. Aŋa iyi à tɔtɔɔ bɛu wee. Piɛɛ do Zãa do Zaaki do Anderee do Filipu do Tomaa do Baatelemi do Matie do Zaaki amai Alifee do Simɔɔ inɛi igbɛi Zelɔtu do Zudu amai Zaaki. 14Do anu akãi inɛ ŋau fei à ya tɔtɔɔ a maa ce kutɔɔ do himma, aŋa do ifɔi Jesu ŋa do Maari iyeɛ do inaabo gɔ ŋa má.

15Ajɔ nŋu gɔ woo dasi Jesu naanɛ ŋau à tɔtɔɔ má. Kukpɔ nŋa í to zakai amanɛ cifa. Ŋɔi Piɛɛ í dede í leekĩ si anini nŋa í ni, 16iŋɛ kpaasim ŋa, Hundei Ilaaɔ̃i í jɔ̀ Davidi í fɔ idei Zudasi wo, nŋu iyi í cuaa inɛ ŋa iyi à mu Jesuu, nɔ ideu kù nɛ bɛi á ce iyi kù ce. 17Zudasiui í tako í jɛ inɛ akã nwa wo, nŋu mɔ í ya dasi icɛ nwa awɔ.

18Fia iyi í ba na laalɔ iyi í ceu í raò iko gɔ. Ŋɔi í cuku, iriɛ í tako í to ilɛ nɔ inɔɛ í la, ifũɛ fei í fita. 19Ŋɔi inɛ ŋa iyi à wa Zeruzalɛmu fei à gbɔ ideu. Na ŋɔi í jɔ̀ do fee nŋa à waa kpe ikou Akedama, waatɔ Ikoi njɛ.

20Ideɛ iyi à kɔ si tiai iri ku kɔ̃ ŋau wee.

Jɔ̀ ideɛu ku kpɔò bomma.

Inɛ gɔ ku maà buba bɛ má.#1:20 Cɔ Iri ku kɔ̃ 69:26.

Nɔ à kɔɔ má à ni,

jɔ̀ inɛ gɔ ku gba agbɛɛ si icɛɛ.#1:20 Cɔ Iri ku kɔ̃ 109:8.

21-22Debɛi, ka dasi inɛ gɔ si inɔ nwa ku jɛ nsũi Zudasiu. Nɔ í gbe lafɛ̃ɛ ku jɛ inɛ iyi í yɛ kujĩi Lafɛ̃ɛ Jesu hai si balɛ bɛi awa mɔ. Nɔ lafɛ̃ɛ ku jɛ inɛ akãi inɛ ŋa iyi à ba wa kuwɛɛ waati kãma fei si waati iyi Jesu í wɛɛ do awa si andunyau ihɛ̃, hai waati iyi Zãa í dasiɛ inyi hee í koo í bɔ lele. 23Ŋɔi à cica amanɛ minji gɔ ŋa, irii inɛ akãi Zozɛfu iyi à ya kpe Baasaba, walakɔ Zusitu, inɛ minjisiau mɔ Matiasi. 24Ŋɔi à ce kutɔɔ à ni, Lafɛ̃ɛ, awɔ iyi ì mà idɔi inɛ fei, nyisi wa inɛ iyi ì cica. Si inɔi mɔcɔ minjiɛ ŋau ihɛ̃ 25nyisi wa inɛ iyi ì bi ku jɛ nsũi Zudasi si icɛi woo bɛ ŋau, icɛ iyi Zudasi í jɔ̀ nɔ í koo í lɔ tengi bii í jɔ a dasiɛ. 26Ŋɔi à ta nŋa kpasa. Nɔ kpasau í so Matiasi. Ŋɔi à dasiɛ si inɔi woo bɛ maatakã ŋau.

Currently Selected:

Woo bɛ ŋa 1: MKL

Highlight

Copy