Woo bɛ ŋa 2

Kunaai Hundei Ilaaɔ̃

1Iyi ajɔi jingaui Pantekotu í to, ŋɔi woo dasi Jesu naanɛ ŋau fei à tɔtɔɔ inya akã. 2Gbakã ŋɔi à gbɔ iba gɔ í naa hai lele bɛi fufu nla, nɔ si inɔ ileu fei inɛ ŋa à gbɔ ibau. 3Si anyiɛ ŋɔi à yɛ ngɔgɔ ŋa bɛi amɛi ina ŋa à kpɛ̃ à na à lesi irii aŋa fei akã akã. 4Ŋɔi aŋa iyi à wa bɛ fei à kɔ̃ò Hundei Ilaaɔ̃ nɔ à waa fɔ fee mmu gɔ ŋa, si bɛi Hundei Ilaaɔ̃ í mu nŋa aŋa fei ikã ikã.

5Wee waati bɛɛbɛ Zuifu gɔ ŋa iyi à mà bɛɛrɛi Ilaaɔ̃ à naa hai ilɛ fei à wa Zeruzalɛmu. 6Iyi à gbɔ ibau, ŋɔi zamaa nla nla í sɛi í koo í tɔtɔɔ bɛ nɔ à biti jiida jiida si na iyi í jɔ̀ à gbɔ woo dasi Jesu naanɛ ŋau à waa fɔ feei aŋa ikã ikã. 7Ŋɔi í mu ŋa biti hee í caa, nɔ à bee njɛ à waa ni, inɛ ŋa iyi à waa fɔ ideu bɛ, í jɔ aŋa fei inɛi Galilee ŋai mɛɛ. 8Nɔ bɛirei í ce awa fei à gbɔ à waa fɔ ide do fee nwa ikã ikã. 9Si inɔ nwa inɛ gɔ ŋa à naai hai ilɛi Paati do hai Mɛɛdi do Elami, do hai ilɛi Mezopotami do Zudee do Kapadosi do Pɔntu do hai ilɛi Azii. 10Inɛ gɔ ŋa mɔ hai ilɛi Firizii à naa do Panfili do Ezibiti do hai ikpa Libii iyi í wa kɔkɔi Sirɛni. Inɛ gɔ ŋa mɔ à naa hai Romu. 11Inɛ gɔ ŋa Zuifu ŋai à bí ŋa, inɛ gɔ ŋa mɔ à waa too kucei Zuifu ŋai. Inɛ gɔ ŋa à naa hai ilɛi Kɛrɛti do hai Arabi. Do nŋu fei, awa fei à gbɔ à waa fɔ fee nwa ŋa ikã ikã à waa sisiò mii nla ŋa iyi Ilaaɔ̃ í ce. 12Ŋɔi aŋa fei à biti hee a kù mà bɛi aa lasabu nɔ à bee njɛ à waa ni, yoomai í jɛ yaasei mii nɔu ihɛ̃. 13Amma inɛ gɔ ŋa à yaako woo dasi Jesu naanɛ ŋau à waa ni, inɛ ŋau à mɔ atɛ̃i hee í caa.

Waazo iyi Piɛɛ í ce

14Ŋɔi Piɛɛ í dede do woo bɛ maatakã ŋau ajɔ nɔ wa la hee lele í sɔ̃ zamaau wa ni, iŋɛ Zuifu ŋa do iŋɛ mɔ iyi ì wa Zeruzalɛmu fei, i sotĩ i gbɔ ŋa. 15Ǹ bi i mà ŋa iyi inɛ ŋau ihɛ̃ atɛ̃ kù waa kpa ŋa bɛi ì waa tamaa ŋau bɛ, domi à wɛɛ si daadaakɔ, baa isɔ mɛɛsã kù lɔ titã. 16Amma iyi ì waa yɛ daakɔɔyiu ihɛ̃ ŋa, iyi walii Zoɛli í fɔu mbɛ iyi í ni,

17Ilaaɔ̃ í ni, si ajɔi ankãanyi ŋau an daa inɛ fei si Hundem.

Ama inɛmɔkɔ do ama inaabo nŋɛ ŋa aa ce walii.

Awaasũ nŋɛ ŋa aa ya maa ce kuyɛ ŋa,

nɔ mɔkɔ ngbo nŋɛ ŋa mɔ an ba ŋa ide ku fɔ si ala.

18Waati bɛɛbɛ, an dasi Hundem si inɛmɔkɔ do inaabo woo ce icɛm ŋa,

nɔ aa ce walii.

19An nyisi mii maamaake ŋa ikpa lelei Aɔ̃,

nɔ an jɔ̀ inɛ ŋa a yɛ mii maamaake ŋa má si ilɛ.

Inɛ ŋa aa yɛ njɛ do ina do cuai ina.

20Inunu á kuku inya

nɔ cukpa ku kpã bɛi njɛ.

Si anyii nŋui ajɔi Lafɛ̃ɛ á to wa, ajɔ nla ilu amboeu.

21Amma inɛ ŋa iyi à waa kpe Aɔ̃ Lafɛ̃ɛ fei aa ba faaba.#2:21 Cɔ Zoɛli 3:1-5.

22Iŋɛ inɛi Izirɛli ŋa, i sotĩ i gbɔ ideu ŋa. Ilaaɔ̃ í jɔ̀ ì mà ŋa iyi nŋui í bɛ Jesu inɛi Nazarɛtiu wa na maamaake do nyinda ŋa iyi í jɔ̀ Jesu í ce si anini nŋɛ, si bɛi iŋɛ taka nŋɛ ì mà ŋa. 23Jesuu, Ilaaɔ̃ takaɛi í lasabu hai sinte í jilɔɔ si a daa inɛ ŋa si awɔ. Nɔ iŋɛi ì daa ilu dulum ŋa si awɔ ì jɔ̀ à kpakpaɛ si jĩi ku gaau à kpaa ŋa. 24Amma Ilaaɔ̃ í jũu hai si balɛ, í nyaa hai si wahalai iku domi iku kù nɛ gbugbã kãma siɛ hee ku gɛɛɛ bɛ. 25Ideɛi Davidi í kɔ í ni,

ǹ wa n yɛ Aɔ̃ Lafɛ̃ɛ waati kãma fei,

domi í wa awɔ njɛm ku ba n maà n yaya.

26Na ŋɔi í jɔ̀ inɔm wa dɔ̃, nɔ ǹ wa n fɔ ide do inɔ didɔ̃.

Nɔ baa bii í jɛ an ku ǹ nɛ kpãa ku cɔ,

27domi awɔ Ilaaɔ̃ i kaa jɔ̀ hundem bi kuwai iku ŋa.

Bɛɛbɛ mɔi i kaa jɔ̀ arai amu Inɛ Kumáɛ ku sãmi.

28Ì nyisim kpãa iyi wa bɔɔm si kuwɛɛ.

An nɛ inɔ didɔ̃ nla nla si na iyi í jɔ̀ ì wɛɛ do amu.#2:28 Cɔ Iri ku kɔ̃ 16:8-11.

29Si anyii nŋu nɔ Piɛɛ í ni má, iŋɛ kpaasim ŋa, ǹ wa n sɔ̃ ŋɛ nɔ kù nɛ sika kãma, Davidi bala nwa í ku nɔ à suu. Balɛɛ mɔi í wa si anini nwa ihɛ̃ hee do nnyi fei, mà irei. 30Amma si bɛi í jɛ walii, í mà iyi Ilaaɔ̃ í cea nŋu kuwãi ide gɔ do kugbasi í ni tɔkuɛ gɔ á na ku buba si kitãi bommaɛ. 31Davidi í mà mii iyi á na ku ce. Na ŋɔi í jɔ̀ ide iyi í fɔ, iyi í ni Ilaaɔ̃ kaa jɔ̀ hundeɛ bi kuwai iku ŋa nɔ araɛ kaa sãmi, idei kujĩi inɛ iyi Ilaaɔ̃ í cicaui wa fãa. 32Jesuu iyi ǹ wa n fɔ ideɛ, Ilaaɔ̃ í jũu hai si balɛ nɔ awa fei à jɛ sɛɛda. 33Ilaaɔ̃ Baaba í soo lele í wa awɔ njɛɛ nɔ í muaa Hundeɛ iyi í wãaò wo. Nɔ nŋu mɔ í mua awa mɔ Hundeu. Nŋui ì waa yɛ nɔ ì waa gbɔ ŋa bɛ. 34Davidi takaɛ kù bɔ lelei Aɔ̃ amma í ni,

Aɔ̃ Lafɛ̃ɛ í sɔ̃ Lafɛ̃ɛm í ni,

buba awɔ njɛm,

35hee n ce mbɛɛɛ ŋa

bi ku lesi isɛɛ.#2:35 Cɔ Iri ku kɔ̃ 110:1.

36Na ŋɔi í jɔ̀ í sĩa iŋɛ inɛi Izirɛli ŋa fei i mà iyi ihɛ̃ ŋa sãa sãa. Jesu iyi ì kpakpa si jĩi nɔu bɛ ŋa, nŋui Aɔ̃ í ce Lafɛ̃ɛ do Kirisi.

37Iyi inɛ ŋau à gbɔ bɛɛbɛ ŋɔi ideu í to si ŋa ntɔ ntɔ, nɔ à bee Piɛɛ do woo bɛ iyi à gbe ŋau à ni, iŋɛ kpaasi nwa ŋa, bɛirei aa ka ce. 38Ŋɔi Piɛɛ í sɔ̃ ŋa í ni, iŋɛ fei i kpaasi idɔ nŋɛ i jɔ̀ a dasi ŋɛ inyi do irii Jesu Kirisi ku ba Ilaaɔ̃ ku kpa idei dulum du ŋɛ, nɔ aa ba amuai Ilaaɔ̃ má ŋa iyi í jɛ Hundeɛ. 39Bɛɛbɛi á ce si na iyi í jɔ̀ Ilaaɔ̃ í ce nŋɛ kuwãɛ, iŋɛ do ama nŋɛ ŋa do inɛ ŋa iyi à wa hee jĩijĩ fei, inɛ ŋa iyi Aɔ̃ Lafɛ̃ɛ nwa á kpe fei.

40Do ide ikã ikã nkpɔ nkpɔi Piɛɛ í jɛ nŋa do sɛɛda nɔ í mu nŋa gbugbã í ni, i nya ara nŋɛ ikã hai bi inɛ laalɔi nsɛi ŋau ihɛ̃ ku ba i ba faaba ŋa. 41Ŋɔi à dasi inɛ ŋa iyi à gba idei Piɛɛu inyi. Ajɔ nŋu zaka bɛi amanɛ dubu mɛɛta í kɔ̃ɔsi si inɔi woo dasi Jesu naanɛ ŋau. 42Nɔ à ya gbɔ cio iyi woo bɛ ŋau à ya maa kɔ ŋa siu fei, nɔ à ya maa wɛɛ do anu akã, à ya maa jɛ ijɛ iyi aa yeò gigii ikui Jesu, nɔ à ya maa ce kutɔɔ ajɔ.

Kuwɛɛi inɛ ŋa iyi à dasi Jesu naanɛ

43Ŋɔi ideu í to si inɛ fei, nɔ Ilaaɔ̃ í jɔ̀ woo bɛ ŋau à wasi maamaake nkpɔ nkpɔ ku ce. 44Woo dasi Jesu naanɛ ŋau fei à ce anu akã nɔ mii iyi à nɛ fei ti aŋa feii í jɛ. 45Waati iyi inɛ gɔ í nɛ bukaatai ngɔgɔ fei à ya ta iko nŋa ŋai do mii ndu ŋa ŋa nɔ a na lafɛ̃ɛ fiau zaka bɛi í nɛ bukaataɛ. 46Ajɔ fei à ya tɔtɔɔi si bantumai kpasɛ̃i Ilaaɔ̃. À ya tɔtɔɔ a maa jɛi si inɔ kpasɛ̃ nŋa ŋa do inɔ didɔ̃. Muafiti ci ya wa si. 47À ya maa saabu Ilaaɔ̃ nɔ inɛ fei í mà bɛɛrɛ nŋa. Ajɔ fei inɛ ŋa à ya dasi naanɛi nɔ a ba faaba. Bɛɛbɛi Lafɛ̃ɛ Jesu í ya maa kɔ̃ɔsi kukpɔi woo dasiɛ naanɛ ŋau waati kãma fei.

Currently Selected:

Woo bɛ ŋa 2: MKL

Highlight

Copy