DÂN INHNINA 1
1
Thumahruai
1Hi hi Jordan dung sak tiang ramchâra Israelhai an om laia an kuang Mosia thu’nsîr irziakna bu a ni. Jordan dung phâi, Sufa irhôr Tofel khua, Labana khua, Hazerot khua, Dizahab khua hai le Paran ramchâr kâra an om lai a ni. 2Horeb tâng ata Kades-Barnea kha Edom tâng rama fein sûn sômhleikhat fe a ni. 3Aigupta ram an suaksan kum sômminli, tha sômhleikhat, tarik khat nî chu an kuang hril hrang Rengpa ihril murdi chu Mosia khan a hrila. 4#Nam 21.21-35 Rengpa khan Amor mi, Hesbon khuaa rêng Sihona kha an hnêa, Basan rama Astarot le Edrei kho rêng Oga khom an hnê tâka. 5Moab ram, Jordan dung sak tiang an om lai khan Pathian dân le thupêkhai kha Mosia’n an sîrinfel a ni.
6Ama khan, “Horeb tânga kin om lai khom Rengpa kin Pathian khan, Hi tânga hin nin om sôt ta. 7Nin irbu insiat unglân, irtôl irson roi. Amor-hai ram, tâng rama khan fe unglân, a kôlvêl ramhai irfang roi. Jordan dung phâi, tâng ram, sim tiang ram hai, Mediteranean tuipui kam dênin fe roi. Kanaan hai ram, Lebanon tâng pên Eufrates dung dênin fe roi. 8Hi ram hi a ni, nin irchibul Abrahama, Isaka, Jakoba hai le an irchihai kuang pêk ki inkung ram, irfang unglân, van hnê roi duah” a tia.
Mosia’n roirêltu hrang an kung
(Fes 18.13-27)
9Mosia’n mipuihai kuang, Horeb tânga ei om lai khan nangni ki ihril kha. Keima ringotin chu a rik nangni ki tia, zoi ta ma ung. 10Rengpa nin Pathian khan irvâna ârsi dôrin nangni an puangtira. 11Nin irchibulhai Pathian Rengpa khan atûn hin a bâk sângin nangni inpungtir sianlân a inkung angin nangni irhniangtir ri se. 12Nin thubuai irngeitir a sân a intak a ni ta; keima vaia tho zoi thei ni ta ma. 13Mi vâr, thil sût thei le inhriat irzat, nam tin ata inthangsuak unglân, an kuta nangni inhlan ki ti. 14Kha kha thil tho zât tak a ni khom nin inhriat. 15Khanchu, mi vâr le thil inhriat irzat hai, nin nam murdi laia inthangsuakhai kha nangni kin koltira; senkhat chu mi sâng chunga roirêl hrang an nia; senkhat chu irza chunga, senkhat sômringa chunga, senkhat chu sôm chunga: khabana khom nam tina hruaitu hrang nangni phun pe sa ki ti.
16“Anni kha hiang hin ki hrilhaia: Nin mihai laia thubuai om murdi chu ngûk takin irngai unglân, nangni mi vai kâra thu a ni mani, nin laia nam dang om sahai le nin kâr thu mani dik takin, thiarthâk nei loiin rêl ngai roi. 17Indit bîk nei no unglân, tukhom ni sian, hmunkhat zita enin an thu rêl pe ngai roi. Tukhom enbîk nei no roi, nin thurêl inchuk chu Pathian ata zuang suak a ni. Nin ta hranga rêl intak ta hrai chu ki kuang hong intung ngai nin ta, lei rêl ki ti. 18Nin itho hrang danghai khom nangni ki hril kha te.
Kades-barnea ata enirchiktu an tîr
(Nam 13.1-33)
19“Kin Pathian Rengpa thu ang khan kin thoa. Horeb tâng kin suaksana, ramchâr irzat tak le irchel taka Amor-hai omna tâng ram lampui kha kin fe thenga, Kades-barnea kin va tunga. 20Keini chu, ‘Amor-hai tâng ram nin hong tung ta, Rengpa kin Pathianin ram kha, 21en u ta, Rengpa nin Pathianin ram kha nangni a ipêk diam tâk a ni; lût unglân, Rengpa nin pi le puhai Pathianin a lei ihril tâk angin hong lua roi; chi no unglân, zâmirzal sa no roi,’ ki tia.
22“Khannisian, nin rêngin nin honga, ‘Ram chu enirchika kin fena hrang hai, khopui kin lûtna hrang thurchi hai ni hong nôk hrangin, ei matona, mi va tîrin lân; nin tia. 23Kha khan a sân a nin lômtira; khanchu nin laia mi sômhleihni, nam khata inkhat kin thangsuaka. 24An taka, tâng rama khan an hong kâia, Eskol irhôr an tunga, an eninfel zita. 25Thei rahai kha an hong chôia, thu an hong intunga, Rengpa kin Pathian ni pêk ram chu a sân a lei sa’, an tia.
26 #
Dhn 9.23; Heb 3.16 “Khannisianlân, nin fe nuam noa, Rengpa nin Pathian thupêk kha nin hnôl tâka. 27Nin chiara, ‘Rengpa hin a ni ikhôkmâk a ni, Aigupta ram ata a ni hruai suaka, Amor-hai kuta a ni ipêk hrang a ni, nin siatpai a lei itum a ni hi te. 28Ithoa mo kin hong ife hrang, khi taka omhai chu eini nêkin lian le irsâng tak tak an nia, an khuahai lak a liana, irvân phâkin kul nei an ni; an pathianhai khom kin hmu, tia ei urênghaiin an hong insîr kha kin chi a ni’ nin tia. 29Annihai kha chi no unglân, zâmirzalpui no roi, 30Rengpa nin Pathian kha nin mahruaitu a nia, ama khan nangni doipui a ti; Aigupta rama nin hmu ngeia nin ta hrangin thil a tho ngai ang khan a itho thiai hrang a ni. 31#Tîr 13.18 Ramchâra nin fe sûng khom khan lam tinrênga nangni a hruaia, pa’n a nâi a ipuak angin hi hmun hi nangni a ipuak intung a nih ti nin inhriat mai a ni,” ki tia. 32#Heb 3.19 Hi thila hin Rengpa nin Pathian kha nin iiam ngam loi a ni; 33nin maton a hruai thiaia, nin irbûk irbeina hrang nangni a zong suak pea, zâna mei vâr, sûna sûm indingin nangni a ihruai ngai a ni.
Israel mihai a hrem
(Nam 14.20-45)
34 #
Heb 3.18
Rengpa’n nin irhâi a len hriata, a sân a ning an mur a ni. 35“Hi irlo sual tak laia inkhat lua’n, ram satak an pahai kuanga, pêk a inkung kha hmu viat no nihai. 36An laia mi inkhat Jefunea nâipa Kaleba vai hin hmu a ti, a isirna ram ka kai kha a nâihai irchon dongtum thiai hrangin ki ti, Rengpa kha a zui ngit sikin,” tiin thu an kung ngita. 37Nangnihai sikin Rengpa kha ki chunga khom ning an mura, “Nang khomin ram kha hmu no chi ni, 38Nuna nâipa, ni sinthotu Josua rêk hi chu hmu a ti: inthor ual ro, hi ram hi Israelhai an luatir hrang a ni. 39Nin nâi le tehai, râl man mai mai hrang nin itihai, a sia a sa lan hre phâk loihai rêk hi chu, kha rama khan lût an ta, nei an ti. 40Nin rengin kîr nôk unglân, Tuipui Sen tiang panin ramchâra fe roi,” a tia.
41Nangni’n chu ki kuang, “Rengpa chunga thil sual kin itho a ni, tâng rama khan hong doi kin ti,” nin tia. Hriamhrei nin chôi senga, tâng rama hong fe chu a sâna ol hrangin nin bêa. 42Rengpa’n ki kuang: “Hong fe no roi, hong doi sa no roi, nin laia om ma ung, nangni lei that ngêt an ti,” tiin hril roh a ni ti a ni. 43Kha kha nangni ki hrila, irngaitua nuam mak chêia; Rengpa thupêk kha zôm nuam mak chêia, tâng rama khan nakhrâtin nin hong fe tâka. 44Kha laia tâng rama om Amor mihai khan nangni an lei doia, khuaiin mi a irzûl ang dênin nangni an lei irzûla. Horma tung thaiin nangni an irzûla, Edom tâng rama nangni an inhnê tâk a ni. 45Rengpa tiang nin irheia, a kuang nin chapa; khannisian Rengpa khan nin irhâi len hre nuam maka, lei irngaitua nuam sa ma. 46Khanchu, Kades-barnea khan sôttak nin om tâka.
Currently Selected:
DÂN INHNINA 1: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
