2 RÊNGHAI 8
8
Sunam nupang hong kîrna
1 #
2 Rng 4.8-37
Rengpa’n kum sari sûng Israel rama châm a tâk hrang thu, Elisa’n Sunam nupangnu nâi a indam pe nu kha a hrila, an in mihai leh hmun danga irson hrangin a hrila. 2Pathian mi thu chu a zôma, an rêngin Filistia rama an fea, kum sari an va om tâka.
3Kum sari a hek hnungin chu nupangnu chu Israel rama a kîr nôka, rêng kuang khan a in le a ramhai chu ni pe kîr nôk ta roh tiin a hrila. 4Reng le Elisa hnungzui Gehazia chu an lei chonga, Elisa thil irkhêl tho chu rêngin an hriat nuama, a le’rdona. 5Elisa’n mithi an hringtir nôkna thu Gehazia’n a hril lai takin nupangnu kha rêng makunga a hong ngîra. Gehazian, “Ka pu, ki insîr nupang kha hi nu hi a ni; Pathian mi Elisa’n a inhring nôk khom kha a nâipa a ni,” a tia. 6Rengin a dik le dikloi ar dona, “O a dik,” a tia. Rengin a thu ngaitua infel hrang hruaitu inkhat an thang pea. “A inei ngai murdi pe kîr nôkin lân, a om no kâra a ram ata thil thar suak khom a man hrang dôr insâpin pe ro,” a ti pea.
Elisa le Suria rêng Benhada
7Suria rêng Benhada dam loi lai takin Elisa chu Damaska khua a hong lûta, “Pathian mi a hong tiin an hrila. 8Rengin Hazaela kuang khan, ‘Imo khôk thilpêk hrang chôiin lân, Pathian mi var hmupui ro, ki la idam suak hrang le damloi hrang, Rengpa ni var don pe ro,’ a tia. 9Khanchu, Hazaela chu var hmupui hrangin a fea, Damaska khuaa thil sa le hluhai a chôia, saringseiin voisôm minli pêla tam a chôia, a fea a kuang khan, ‘Ni nâipa Suria rêng Benhadada’n, a ni hong itîr a ni, a natna ata hi la dam ning mo? a ti,’ a tia.
10Elisa’n a kuang, “Fe nôkin lân, la dam suak ngêt a ti, ti va hril roh. Khannisianlân, Rengpa’n voikhat chu a la ithi ngêt hrang a nih ti a nir hmutir,” a tia. 11Hazaela chu inzak hmêl irputin a hei ena; Pathian mi chu a chapa. 12Hazaela chu, “Ka pu, itho mo ni chapa,” a tia. Ama’n hiang hin a sâma, “Israel mihai chunga thil saloi ni itho hrang ki hmu sikin, an kulhai la hâl pehai ni ta, an ruathartehai khandaiin tukhai ni ta, an nâitesuihai hnuai changa vîk thathai ni ta, an kho nupui, nâi vonghai khom an phînga irkhit thathai tum ni ti,” a tia. 13#1 Rng 19.15 Hazaela’n, “Kei ni siahlo hin an nihai ang tho thei hrangin mo ni ni ibe?” a tia. Elisa’n, “Rengpa’n Suria rêng ni ichang hrang a nir hmutir a ni,” a tia. 14Elisa’n a mâksana, a pa kuang a va fea, “Ama’n Elisa’n imo nang a lei ti pe?” a tia. “Ni la idam suak ngêt hrang ti thu a hril,” a tia. 15Zîng nôka chu Hazaela’n puan a lâka, tuia a phûma, rêng kha a’rkhûa a thatpai ta. Hazaela chu Benhada irthûlin Suria rêng a chang nôk ta.
Juda rêng Jehorama
(2 Tsn 21.1-20)
16Israel rêng Ahaba nâipa Jorama rêng inlal kum ringana tena chu Jehosafata nâipa Jehorama chu Judai rama rêng a changa. 17Kum sômthuminhni a niin an lal irphuta, Jerusalema kum riat an lala. 18A dôngma chu Ahaba nâinu a ni. Ahaba irchihai om dân ang ngêtin Israel rênghai omdân saloi lâkin a oma. Rengpa mithmua thil saloi a thoa. 19#1 Rng 11.36 Rengpa’n Judahai chu thathai zoi nuam maka, a siahlo Davida kuanga, “Ni’rchihai chu rêng hong chang mai an ta, ti a lei tep ving tâk sikin. 20#Irp 27.40 Jehorama inlal lai tak hin Judai ramhai chunga Edom-hai tehel an zonga, an bingin rêng an neia. 21Jehorama chu Zair tiang panin a sakor tâli chôiin a fea, Edom-haiin an irhuala zân laia a tâli chalaituhai leh an intân suak thei hrâma, a sipaihai chu an indarh chita, an mâni in tiang an rot nôka. 22Khatak ata chu Edom-hai hi Judahai hnuaia om nuam ta mahaia, hi zoro ngêt hin Libna khuahai khom tehel an zong phut nôk sa a ni.
23Jehorama sintho dang murdi chu Juda rênghai thurchi irziakna lekhabua a chuang. 24Jehorama chu a thia, Davida khopuia rêng irphûmna thâna an phûma, a nâipa Ahazia chu a’rthûlin an lal nôk ta.
Juda rêng Ahazia
(2 Tsn 22.1-6)
25Israel rêng Ahaba nâipa Jorama rêng kum sômhnina tena Jehorama nâipa Ahazia chu Judai rama rêng a changa. 26Kum sômhni inhni a niin an lal irphuta, Jerusalema kum khat an lala, a nu chu Ahaba nâinu Athali, Israel rêng Omria tunu a ni. 27Ahazia’n Ahaba nâinu dôngma’n a nei sikin Ahaba urêng danghai angin Rengpa mithmua thilsual a thoa. 28Reng Ahazia le Israel rêng Jorama chu Suria rêng Hazaela doi hrangin an inthuruala. Gilead biala Ramot khuaa, an sipaihai an irdoia; Jorama’n irdoina khan sâbe a neia. 29A damna hrang zongin Jezreel khuaa a honga, Ahazia’n a va pana.
Currently Selected:
2 RÊNGHAI 8: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
