2 RÊNGHAI 9
9
Israel rêng hrangin Jehua sahriak nâlin a omna thu
1Kha zoroa khan deipu Elisa’n deipu ruatharte nâipang tak hi a koia, “Irsiamin lân, hi sahriak bûr hi chôiin lân, Ramot Gileada va fe roh. 2Ni va tungin chu Nimsia tupa Jehosafata nâipa Jehua zong suakin lân, a omna ina lûtin lân, a rualhai lai ata in sûngrîla hruai lûtin lân, 3a lu chunga hi oliv hriak hi buak pe’n lân, ‘Rengpa’n Israelhai rêng hrangin sahriak nang a ibuak a ni ta, tin lân. Mikot inhongin lân suakpatin lân, ir-ial ta no ro,’ a tia.
4Deipu ruatharte nâipang chu Ramot-gilead-ah khan a fea. 5A va tungin chu sipai hruaituhai an le’rbukkhôma. “Ni kuanga thu hril hrang ki nei, sipai hruaitu,” a tia. Jehua’n, “Kin laia hin tu hi mo ni ichongpui nuam?” a tia. Ama khan, “O sipaihai hruaitu nang kha ni nih nang ki ichongpui nuam chu,” a tia. 6#1 Rng 19.16 A thoia, in sûnga a lûta, a lua sahriak a buaka, “Israelhai chunga rêng hrangin sahriak nang ki buak ta a ti a ni,” a tia. 7“Ni pu Ahaba in mihai that ni ta, ki siahlohai thisen, Rengpa siahlohai thisen Jezebeli insuakhai thisen phuba chu an chunga ki ilâk hrang a ni. 8Ahaba irchihai chu thatpaihai hlet ni ta, nâipang khom ulian khom pasal chu hek ving an ti. 9Ahaba in mihai chu Nebata nâipa Jeroboama in mihai le Ahija nâipa le Baasa in mihai ang khan soisakhai ki ti. 10#1 Rng 21.23 Jezebeli chu Jezreel-a uihaiin a hme fa an ta; tûte a phûm hrang om loiin,” a tia. Inkhâr kha an honga, a suakpat tâka.
11Jehua chu a puhai lai ata a hong suaka, mi inkhatin, “I thurchi ma ni tâk? mi’ntopa kha i lo hranga ni hong ihruai mo?” a tia. Jehua’n, “A izong chu nin inhriat kha te,” a tia.
12Anni khan, “Inhre ma ung dua, hril ro ba,” an tia. Rengpa’n “Israel rêng hrangin sahriak nang ki buak ta kêng a ni, a iti mo ni ma,” Jehua’n a tia. 13Sipai hruaitu danghaiin an puan an kheka, Jehua omna hrangin an dâpa, bekul an tuma, “Jehua hi rêng a ni ta,” an tia.
Israel rêng Jorama thatna thu
14Nimsia tupa, Jehosafata nâipa Jehua’n Jehorama chu a khitphiara. 15Jorama chu Suria rêng le Ramot khuaa irdoi lai khan sipai lei nei tâk a nia. Jezreel khuaa lei irngam hranga fe a ni, Jehua’n a rualhai kuang khan, “Keima tiang nin kopin chu Ramot khuaa irthokin Jezreel mihai kôla tûte thurchi hril hrangin insua no roi,” a tia. 16A tâli chunga a chuanga, Jezreel khua panin a fea, Jorama chu la dam infel maka, Juda rêng Ahazia’n a va pana a lei om lai tak a ni. 17Jezreel in irsâng chunga râl entu khan Jehua le a rualhai hong lai chu a hmuhaia, “Sakor chunga chuang mi tuhai mani ki hmu,” a tia. Jorama’n, “Râl an ini le ni loi eninfel hrangin sakor chuang thei mi inkhat va tîr roi,” a tia. 18An itîrpa chu Jehua hai omna a va tunga, “Rengin rual sa anga hong ni ini le ni loi an hriat nuam,” a tia. Jehua’n, “Nangma inhriat ite nang ma, hnung tiang khan fe nôk ro,” a tia. 19Râl hrungtu khan, “Mi honghai khan, ei mi tîr chu a va huanghaia, hong kîr nôk ta ma,” a tia. 20An hruaitu khan, a tâli chu invêt angin a chalaia Jehua angin a om a tia.
21Reng Jorama’n, “Ki tâli sinsiam unglân,” a tia. An sinsiam zoiin chu Juda rêng Ahazia le an tâlihaia chuangin Jehua var hmupui hrangin an suaka. Nabota irhuana an va hmua. 22Jorama’n, “Jehua, a sat lama ni ihong chu ma ni?” a tia. Jehua’n, “Ni nu Jezebeli’n millim biak le irdoi hmang thu inthang kâra hin thil sa lam hril hrangin itin mo a ini thei hrang?” a tia. 23Jorama’n, “Ahazia hi, hi mihai hin that an itum a ni,” tiin a khêka, a tâli a kai irhêla, an tâna. 24Jehua’n a thalngul chu a thei dôra irnak songin a kaidoka, Jorama hnung tiang a kâpa, a thalin a milung irbutak a va toka, a tâli chunga khan a thi tâka. 25Jehua’n a hnung zuitu Bidkara kuang khan, “A ruak so Nabota irhuana pai roi. Jorama a pa Ahaba hnungzui, a sakor kin chuang laia Ahaba chungthu Rengpa ihril kha inhretir mai roh. 26#1 Rng 21.19 Nabota le a nâihai mizâna an thi dânhai kha kin hriat mai a ni; khasikin hi hmuna hin ki la isoisakhai hrang a ni; a iti kha, Jorama ruak chu a lâka, Nabota irhuan sûnga, Rengpa iti angin pai roi,” tiin a hnungzuitu kha a hrila.
Juda rêng Ahazia thatna
27Juda rêng Ahazia’n hi thilhai hi a hmu’n a tâli leh Beth Hagan tiang a fea, Jehua’n, a’rzûla, a rualhai kuang khan, “A tâlia chuangpu so that roi,” a tia. Ibleam kho kôla Gur pana a fe laiin an kâp inphopa,#9.27: Hebraiin chu “Pop” ti hi inlang mah. Megido tiang a fea; kha hmun khan a thipui tâka. 28A rualhaiin a ruak chu tâli chunga chôiin Jerusalema an chôi tâka, Davida khopui rêng thâna, an phûm ta.
29Ahaba nâipa Jorama kha Israel rêng kum sômhleikhat a ni kumin Ahazia hi Judai ram rêng a ni.
Rengnu Jezebeli thina thu
30Jehua’n, Jezreel a hong tung ti Jezebeli’n an hriatin chu a mit an hânga, a sam sinsiam indanglamin rêng in irsângtak ata a thîra. 31Kul mikota Jehua hong lût lai khan, “Ama puhai thattu Zimria,#9.31: Sipai hruaitu inkhat, (1 Rng 16.6-12)-a khan rêng Ela a thata, Juda rêng a chang ta, kha mi ang kha tiin a koi a ni. khan a sat lama hong mo ni ni?,” tiin a khêka.
32Jehua chu a hor heia, “A ni san hrang mo nin om?” a tia. Hruaitu inhni inthum tukvera an hong suaka. 33Jehua’n an kuang, “Zuang namtha roi,” a tia. Khanchu, Jezebeli chu an namthâka, a thisenin a sûta, bang le sakorhai khom a sût chita, a ruak khom an inrâk phiar saa. 34In sûnga Jehua a lûta, bu a nêka, “Kha nupang sualnu ruak kha phûm roi, rêng nâinu a ni sikin,” a tia. 35Phûm hrang an va fea, a lu, a ru le a kut le ke ti no chu hmu hrang om ta mah. 36#1 Rng 21.23 Jehua an hong hril nôka, “A siahlo Tisbe mi Elija bâia Rengpa ihril, Jezebeli chu Jezreel khuaa uihaiin fa an ta, 37an ifâk mihlia chu tu ruak mo a inih ti inhre thei loi rakin ar thek indara a iti kha a hong itung a ni ta,” an tia.
Currently Selected:
2 RÊNGHAI 9: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
