2 RÊNGHAI 7
7
1Elisa’n, “Rengpa thu hi irngai hi ro, nangtûk hiang zoroa hin Samari khuaa baidi a sa chi her thum le barli bai her ruk, tangka sumru inkhat leh ircho thei nin ti, a iti kêng,” a tia. 2Reng hrung ngaitu sipai hruaituin, Pathian mi chu hiang hin a sâma, “Rengpa’n irvân tukver inhongin rua inthotir khomsian, khaang khan chu tung ual le irhoi ma!” a tia. Elisa’n, “A hmu chu hmu thei ni ta, fa thei ual no chi ni,” a tia.
Suria sipai irthek indarna
3Samari khua pên tiang khan inphâr minli hi an oma, “Itho sika mo a thi ringot nghâkin ei iom hi? 4Kho sûnga lûtin lân, khano’nchu phîngchâmin ei ithi hrang kêng, hitaka om mai hi chu. Tho Suriahai hnuaia va irpelût ta ei ti, an nuam le ni thathai sian; a that tak chu ni ngam ual no nihai,” an tia.
5A zîngbup tena chu Suriahai kuanga fe hrangin an irsiama, Suriahai omna an va tungin chu tûte lei om mahaia. 6Rengpa’n Suriahai kha sakor tâli le sakor intân irhâi an hriattirhaia, “Israel rêng hin Hit rêng Aigupta rênghaiin ni doi hrangin an hong irsiam a ni hi,” an ti a ni. 7Khasika, a zîngbupa hin bâk lêng angin an isuak a nia, an in sakuartung le an in tuala thilhai mâksanin an irotsan pher phur a ni ta.
8Inphârhaiin tual an va tungin chu, in inkhata an lûta, an va thup irsiata, a danga an irthon nôka, khaang ngêtin an tho nôka. 9An chonga, “Ei tho dân hi a idik ta loi kêng. A vuan hin zoro a la om, ei dâihreka khovâr ei nghâkin chu an ni la isoisak hrang kêng; khasikin thurchi sa hi rêng in sûng mihai inhrilhai ei ti,” an irtia. 10Khua kul mikota khan an fea, mikot hrungtu kuang khan, “Suriahai tuala kin va fea, tûte lei om mahaia, tûte chongpui hrang lei om mahai. An sakorhai, an sakuartung chu an la khithaia, an inhai khom a om balamin a la om chiana,” an tia.
11Mikot hrungtuhai kha rêng in sûnga an va fea, an hrilhaia; 12zâna rêng chu a thoia, a rualhai kuang khan, “Suriahaiin an ni irdoitir dân hi nangni hril ki ti. An khuaa kin châm hrang hi an inhriata, an in mâksanin ramkâra an irbîk nih a ti, kho sûng ata hong suak an ta, a hringin chelhai ei ta, an khua lua pehai ei tih an irti ni a ti,” a tia.
13A rualhai laia mi inkhatin, “Hi khuaa mi hi ei irchêk ok tâka, ei thi ok tâk sikin, sakor ringa ei la neia, a chunga chuang thei inthang ei ta, hi thu hi van fel ri sehai,” a tia. 14Mi an inthanghaia, rêngin sakor tâli inhni a pêkhaia, Suria sipaihai thurchi inhriat infel hrangin a tîrhaia. 15Kha mihai kha Jordan vadung an va dêna, Suria sipaihai puandiar mâk zen zun an va hmua, an hong kîr nôka rêng kuang an hong hrila. 16Samari mihai chu an khua ata an suaka, Suriahai hmun khuar chu an lût khumhaia. Rengpa iti angin baidi a sa zât her thum le barli her ruk, tangka sumru inkhatin an zuara.
17Israel rêngin ama hrung ngaitu sipai hruaitu kha mikot hrung hrangin a lei phun khera. Elisa hmu hrangin rêng leh an honga, a iti angin sipai hruaitu chu mipuiin an bôma a thi tâka. 18Elisa’n, “Nang, hiang tik zoro hin baidi a sa chi her thum le barli her ruk, tangka dârkhat man ni ti,” a tia. 19Kha sipai hruaitu khan, “Rengpa’n irvân tukver inhongin rua inthotir thei khomsian kha dôrpa kha chu intungtir ual no ni,” a tia. Elisa’n hiang hin a sâma, “A hmu chu hmu thei ni ta, a fâk chu fa thei no chi ni,” a iti a ni kha te. 20Khaang khan a hong om tâka, khua kul mikot kha mipui an bita, an ihneng that a ni ta.
Currently Selected:
2 RÊNGHAI 7: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
