2 RÊNGHAI 6
6
Hrei irhmang hmu nôkna thu
1Deipu irchuhaiin Elisa kuang khan, “Kin omna in hi a chîn hrai sikin, 2Jordan tui kôla fe’n lân, ei omna hrang in lian ual zu sin kin ti,” an tia. “Fe roi,” a tia.
3Anni laia mi inkhatin, “Lungkham takin nang khom zuang ro,” a tia. “O, a ni le zuang ki ti,” a tia. 4An rêngin an fe tâka, Jordan dung an zu tungin chu thing an tana. 5Mi inkhat thing a tan lai takin, a hrei ar khek pea, tuia a tâk pea, “Ka pu itina hrang ma ni ta, mi ta kêng kin ihmang,” a tia. 6Pathian mi khan, “Kho taka mo a itâk?” a tia. A tâkna lai tak chu an khîk irhmua. 7Thing ôn a tana, a zu dêngnaa, hrei chu a hong kêlsuaa, “La ta ro,” a tia; a hon bana a lâk tâka.
Suria sipaihai an dok
8Suria rêngin Israel rêng doi a tuma, kho hmun tianghai hin mo an inruanghai hrang ti a rualhai leh an hrila. 9Pathian mi Elisa’n, Israel rêng kuang khan, “Hi hmunhai hin chu fe no roi, Suria rênghaiin nangni an inruang hrang kêng a ni,” a ti pe thiaia. 10Israel rêngin Pathian mi iti pena hmuna omhai chu a hrila, an le’rtûng irman vinga; voi tamtak an hrilhai a ni.
11Suria rêng chu irmang a phana, a rualhai a koihaia, “Israel tianga kop ei laia hin tu mo a ini nin hril roi” a tia. 12A hruaituhai laia mi inkhat hin, “Keini laia hin hianga milung inchong inkhat lua om ma ung, an chungtakpu, Israel laia, deipu Elisa’n, ni in sûnga ni thu hril murdi khom, Israel rêng a ihril mai a ni,” a tia. 13Ama khan, “khôn mo a om va zong roi, mi tîr ki ta, va chel roi,” a tia. “Dothan khuaa a om” an tia.
14Khanchu, sakor le tâlihai irfûkin sipai tamtak a tîra, kha khua kha zâna an va irhuala. 15Pathian mi siahlo ruatharte an laia a ngîra, zînga a thoiin chu, a suaka sipai tamtak le sakor leh tâli hmangin an khua an irhual chu a hmua, a pu kuang khan, “Ka pu dik loi kêng a ni ta! itin mo ei itho ta hrang? eini tianga ni san hrang an tam,” a tia. 16Khan, Elisa’n, “Chi no ro, anni tianga kop nêkin eini tianga kop an tam ual,” a tia. 17Elisa a chongchaia, “O Rengpa ni mit ni zuang inmeng pe ta ro,” a tia. Rengpa’n ruathartepa mit chu a zuan vâr pea, a hmuhaia, Elisa omna hmun sak tiang pang chu mei sakor le mei tâli om rem rum a hmua. 18Elisa chu, Rengpa kuang a chongchaia, “An mit inchotir pehai ro,” a tia. Elisa iti angin an mit an chotir pehaia. 19Elisa’n an kuang, “Hi hi lampui ni mah, nin mihriam hong zong omna khua lak ni maka, a omna hmuna nangni hruai ki ti,” a tia. Samari khuaa a hruaihai tâka.
20Samari khua an va tungin chu, Elisa’n, “O Rengpa hihai mit hi invâr pehaiin lân hmu ta ri sehai,” a tia. Rengpa’n an mit an vâr pehaia, an hmu thei tâka. An thîrin chu Samari khua a ni pehai tâka. 21Israel rêngin Elisa kuang, “Thatpaihai ning mo,” a tia. 22Elisa’n, “Khandai le thala nin irdoipuia nin ichelhai lua that loiin te, an fâk hrang bu le tui pehaiin lân fâkin inhai sianlân, an pu kuang tiang inkîrtirhai ro,” a tia. 23Bu tamtak a er pehaia, an nêka, an khop tena chu an suahaia, an pu kuang tiang an fe ta. Suria rêng sipaihaiin chu Israel ram chu doi ngam ta mahaia.
Samari khua an irhualna thu
24Zoro sôt ian hnunga chu Suria rêng Benhadada’n sipai a bukhaia, Samari khua panin ar hualpuihaia. 25An irhual sôt tâk sikin Samarihai chu a sân an châm tâka, sakuartung lu inkhat hi tangka sômriatin an zuara, phervali gram khat irzahni hi tangka ringa man a nia.
26Israel rêng chu kul bangbul irfangin a fea, nu inkhat hin, “Ni changpui ro, o rênginthang ki rêngpa,” a tia. 27“Rengpa’n nang a san no’n chu bu le khura sahriak khom nei ta ma ung hi te,” a tia. 28Rengin, “Imo ni itihna?” a tia. Ama khan, “Hi nupang hin ni nâi kha hong hruaiin lân, a vuan fâk ei ta, nangtûk ki nâi fa nôk ei ti, a tia. 29#Dhn 28.57; Chap 4.10 Ki nâi chu kin suanga, kin fâk tâka. Nangtûk chu ni nâi hong hruaiin lân, fa ei ti ki tia; khannisianlân a nâi chu a thuppaia,” a tia.
30Rengin kha thu kha a hon hriatin chu a puan an potthêra; kulbang ar fang maia, mipuiin an enin chu a puan hnuaia bora puan a sil chiana. 31“A vuan misa a tâk mân hin Safata nâipa Elisa lu hi ki lâk no zelin chu Rengpa’n a nuam a ningin ni soisak ri se,” a tia. 32Elisa chu a in sûnga a toia, ulian danghai leh rêngin mi a tîra, kha an mi tîrpa tung mân Elisa’n ulianhai makunga khan, “Irngai roi, hi mi that ngaipa hin ki lu la hrangin mi a hong itîr a ni. A mi hong tîrpa chu in khârkhum unglân, lei danh khak roi. Kha a hong zuitu irhâi khan a pu rêng kalchôi irhâi mo ni mah?” a tia. 33A lan sîr laiin rêng chu a hong tung zel tâka. “Hiang dôra chardong nin lâktirtu chu Rengpa a nia! itin mo Rengpa thu ki la irngai mai hrang,?” a tia.
Currently Selected:
2 RÊNGHAI 6: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
