2 RÊNGHAI 5
5
Inphâr Naamana indam
1 #
Lk 4.27
Suriahai sipai hruaitu ulian Naamana chu Rengpa’n Suria râl inhnêtirtu a ni sikin rêngin a’rngaiirsânga, an hlu oka. Mi hrât le mi hâitak ni khom sianlân inphâr mi a nia. 2Suria sipaihai a papâlin ram kâra an riak ngaia. Israel rama mi nupang nâipangte hi an chela, Naamana dôngma’n a siahlo ni hrangin a hmanga. 3A pi kuang khan, “Ka pu hi Samari khuaa deipu kuanga va fe sianlân chu an phâr hi dam ngêt a ti,” a tia. 4Naamana’n an hriatin chu a pu rêng kuang khan a fea, “Israel rama nupang nâipangtenu khan khaang khan te ni zu ti tâka,” a tia. 5Suria rêngin, “Va fe’n lân, Israel rêngpa hrang lekha nan chôitir ki ti,” a tia. A fe tâka, sumru sîngthum, rângachak sângruk le puan irnêm sil sômkhat a chôia. 6Israel rêng kuang lekha chu a pêka, hiang hin a’rziaka, “Hi lekha chôitu hi, ki siahlo, Naamana hi an phâra, len dam hrangin ki hong itîr a ni,” tiin a’rziaka.
7Israel rêngin lekha irziak kha a tepin chu, a puan an potthêra, “Mi thata indamtir thei Pathian mo ki ni, hi mi hin inphâr indamtir hranga a ni hong iti? a ni doi theina hrang lampui a izong mai a ni,” a tia. 8Reng chardong hraiin a puan an potthêr tah ti Pathian mi Elisa’n a len hriatin chu rêng kuanga mi a tîra. “Itho mo ni puan teh nin potthêra? ki kuang zuang sianlân, Israel rama deipu a om ti inhria a ti,” a tia.
9Naamana chu a sakor le sakor tâlihai hmangin Elisa kuang a fea. 10Elisa’n mi a tîra, “Fe’n lân, Jordan vadung tuia voisari irsilin lân, ni vun diktak ang ni nôk a ta, irthiang ta ni ti,” a tia. 11Naamana chu ningmur hmêl irputin a fea, “Hong suak a ta, ki kôla ngîrin Pathian Rengpa irhming sâmin a natna laihai inthemin, nin dam a tih ki ti laiin. 12Damaska kôla Abana le Pharpar vadung tui chu Israel vadung tui nêkin a irthiang ual mo ni ma?” tiin ningmur takin a fe tâka.
13A siahlo inkhat a honga, “Ka pu deipu khan thil ichiom tak tho roh nang ti khom sianlân, ni itho loi hrang ma ni? var silin lân, irthiang ni ti, nang a iti a ni’nte, var sil ta ro ba?” a hong tia. 14Deipu iti angin Naamana chu Jordan dung a pana, voisari a’rphûma, a vun chu nâipang vun a hong ang pe nôka, a’rthiang tâka.
15A neinun hmang murdihai leh khan Pathian mi kuanga a hong kîr nôka, a hmâikunga a ngîra, “Israel rama ti no hin chu ram danga Pathian om mah ti kin hriat ta, en ro, ni siahlo hin thil nang ki ipêk hi lungkham takin ni la pe ro,” a tia.
16Ama khan, “Matona ki omna ngai mihringhai Rengpa irhming sâmin la thei no ning,” a tia. La ngêt hrangin a ngêna, khannisianlân, nuam pe thei viat maka. 17Naamana’n, “Ni lâk nuam zel no’n chu ni siahlo hi sakuartung inhni pêl inruk irnêng#5.17: Hi zoro lai hin pathianhaiin mâni ram an nei ving tiin an iam, an ram irchôka ngêt biak hrang an ni. ni pe’n lân, ni siahlo hin Rengpa ti no hi chu Pathian tu kuanga khom hâlirvôm thil inhlan ta no ning. 18Khannisianlân, Suria pathian Rimon biak hrangin ka pu a fe zoro hin a hnung ki zui ngaia; khaanga Rimon tempila ki fea, khûksadelin chubai ki mûk khomin Rengpa’n a ni ingaidam a ni,” a tia. 19Ama’n, “Irtharngam takin fe ro,” a tia. Kha tena chu a fe tâka.
20Hlataka a fe mân zel khan, Pathian mi Elisa hnungzui Gehazia’n, “Ka pu hin Naamana chu ite la loiin an fetira, kha Suria mipa’n pêk a itum kha la sianlân a isa hrang, Rengpa irhming sâmin la va’rzûl hi rong, i zât mo khôk la va sut ngêt hrang,” a tia. 21Khanchu Naamana chu Gehazia’n a va’rzûla, Naamana mi inkhatin a ho’rzûl a nih ti a hmu’n chu a tâli ata chumin a lei va dona, a kuang, “A sat lama ni ihong chu ma ni?” a tia. 22Ama khan, “A sa lama chu a ni, ka pu’n, Efraima tâng ram rengata deipu inhni an honga, tangka sum sângthum le puan sil inhni mo pe thei ni?” a ti va ti ro, a tia.
23Naamana khan, “Tangka sum sângruk vai hi ni la pe ro,” a tia. La ngêt hrangin an kunga tangka chu hmarsa inhnia a thuna, puan sil hni leh a siahlohai an pêltirhaia an fe tâka. 24Tâng sîp an hong tungin chu an kut ata a lâkpai pehaia, a ina a hrê zoi hnungin, a tîrhai nôk ta. 25Ama chu in sûnga a lûta, a pu kôla khan a va ngîra, Elisa’n, “Gehazia kho rengata hong mo ni ni?” a tia. Ama khan, “Kho te lua fe ma ung kha te,” a tia.
26Ama khan, “Nang a don hranga a tâli ata a zuang lai khan ki’rtha kha ni kôla khan a iom loi ma ni? tangka le puan kha ni ilâk mo ni ma? grep irhuan, belra le sehrâthai kha, siahlo pasal le nupang irchohai ta roh. 27Naamana inphâr irvei hi nangma le nir chihai chunga nangni kâi pe ta ri se,” a tia. A pu makung ata a suakin chu, ivur anga vârin a vun chu inphârin a tuam invâr pe ta.
Currently Selected:
2 RÊNGHAI 5: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
