2 RÊNGHAI 19
19
Rengin Isaia ar donna
(Isa 37.1-7)
1Reng Hezekia’n kha thu kha an hriatin chu a puan an potthêra, bora puan a sila, Rengpa tempila a lûta. 2Reng in sûng enkoltu Eliakima, changpuitu Sebna le ochai laia ulianhai chu bora puan sil deipu Isaia kuang a tîra. 3Reng Hezekia’n hiang hin a tia. “A vuan hin kin ta hrangin lungzîngna a itung a ni ta, an ni hmumâka, an ni hnuaisia ok ta a ni. Nâi nei zoro a tunga nuhai an irzal ngôi ngôi angin kin iom a ni ta. 4Pathian hring êsêl hranga Assuria rêng itîr, Rab-sakea ihril ang kha, Rengpa ni Pathianin nang len hre suak a ti; Rengpa ni Pathianin inhriatin deng nan theitir khomsian, kin mihriam a la damhai ta hrangin, nangma’n chongchai ro,” an va tia. 5Reng Hezekia mi a itîrhai khan Isaia kuang an va tunga, 6Isaia’n an kuang, “Rengpa’n hiang hin a ti; Assuria rêng siahlohaiin an ni imanêp dân thu ni inhriat kha chi ual no roh. 7Irngai ro, a lungrîl indôptir ki ta, thu nan hretir ki ti; a rama kîr nôk a ta, a ram sûnga ngêt chemseiin thatpai an ti, tiin nin pu makunga hril roi,” a tia.
Assuria rêngin a râi nôk
(Isa 37.8-20)
8Rab-sakea chu a chuma, Lakis ata Assuria rêng chu a’rsona Libna khua a doi ti an hriatin chu, kha lam kha a pana, a va hmua, 9Ethiopia rêng Tirhaka thurchi Assuria rêng chu an hrila. Ama doi hrangin a hor thok a nih ti an hriatin Hezekia kuanga tirtôn a tîra, lekha a thona, 10“Judai ram rêng Hezekia kuang, ni iam ngai ni Pathianin Assuria rêng kuta Jerusalem chu pe no ni, tiin nang ni huang no ri se. 11Assuria rênghaiin a ram lua murdia an sinthohai le, an ram an insiat thu chu nin hriata. Nangma hi mi nin zôk thei ual bîk hrang ma ni? 12ka pahaiin an insiathai nam Gozan, Haran, Rezep le Telasar-ah om Edom mihai kha an pathianhaiin an isan theihai hrang mo? 13kho tiang mo Hamath hai rêng, Arpad rêng Sefarvaim khuaa om rêng Hena rêng Iva rênghai kha an iam ta va ti ro,” an tia.
14Rual koi fe lekhathon chôitu kha Hezekia’n a lei hmu’n chu a lekhathon a tepa, Rengpa tempila a lûta, Rengpa makunga khan a phara. 15#Fes 25.22 Hezekia chu Rengpa makunga a chongchaia, “O Rengpa, Israelhai Pathian, cherub chunga toi, nang hi Pathian tak chu ni ni, ram murdi luatu le roirêltu ni nia, irnêng le irvân khom hi nangma isiam a ni. 16Rengpa ni mikuar sungin lân irngai ro. O Rengpa, mengin lân, hei en ro; Pathian hring hnuaisia hranga Senakeriba’n thu a ihrilhai hi irngai ro. 17O Rengpa Assuria rênghaiin nam tin an doia, an ramhai an insiat pehaia. 18An pathianhai chu meia an hâl pehaia, khahai kha chu pathian chu ni mahaia, mihriam kuta siam thing le lung mamai an ni, siat thei thil chu an ni. 19O Rengpa, hi a kut ata hi ni sansuakin lân; khanchu, rammual hmun tina mihaiin nang vai hi Pathian Rengpa ni nih ti nan hrethei an ti,” a tia.
Reng kuanga Isaia chongbe
(Isa 37.21-38)
20Amoza nâipa Isaia’n Hezekia kuanga mi a tîra, a kôla ni chongchaina chungchâng le Assuria rêng Senakeriba chungchânga 21Israelhai Pathian Rengpa thuhril chu, hi hi a ni.
Zion nâinu’n nang en nuam maka, nang an nuisana.
Jerusalem nâinu’n nang a rotsana a lu nang an thik khuma.
22Tu mo nin nuisana,
nang a inlâp pe?
tu hrangin mo ni hnuk irhâi ni inringtir?
Tu kôla mo mualphoi ni irlâk loi?
Israel mi irthianghai lai ata a ni.
23Ni siahlohai hmangin “Rengpa ni hnuaisiaa,
tâli tamtak le tâng irsânghaia ni luia,
Lebanon tâng hmun tin ki’rfanga,
Sidar thingkung irsâng ki ngôta,
Meisâr thing sa zâthai ki iphûr ngai a ni.
A tâng irsânghaia ramrîlhai khom ki’rfang vinga.
24Tui ki sun suaka,
ki in ngai a ni,
Aigupta tuihai ki kezaphain ki sira.
ki sir chîl ta,” ni tia.
25Tian ata ki lei itho nuam a nia,
lan hre mak che mo?
Atûna thil hong tung hi tiana ki lei irêl zoi tâk a ni.
Kulnei khuahai nin siatpaia.
26A sûnga omhai an thâiindôp lam le beidong taka mual an inphoi dân,
ram le muala hloisûl pâr In chung laia phâizôl anga omhai le,
phâivua lum isêm inthêmhai khom ki lei irêl sai tâk a ni.
27Ki chunga ni hla irkhenhai,
ni toi le ni lûthai khom ki irêl sai a ni.
28Ki chunga hin ni chiar ngaia,
ni mualinphoi dân ki len hriat ta,
ni hnâra hin hnâr infôktirna irbun ki ta.
Pat ritui hmuam angin,
ni hongna lam tiang kaizang ki ti tiin.
29Reng Hezekia kuanga, “Hi hi ni hrangin irsinsiana ni a ti. Kumin hin farhli tûng nin ta, nakum khom kha farhli ngêt kha la tûng nin ti. A kum thumna tena chu ansuangrua song nin ta, a ra irhmal ta nin ti. Grep ling unglân, a ra fa ta nin ti. 30Judai rama la dam sunhai chu theikung, inthûk taka irzungthâka ra irkukhak ang la ni an ti. 31Jerusalem ata la dam suak hrang an oma, Zion tânga a thi zoi loi an iom ngêt hrang a ni. Rengpa sathnem irngaina’n hi thil hi a itho ngêt hrang a ni.
32Khasikin Assuria rêng chungchânga Rengpa’n hiang hin a ti, “Hi khopuia hin lût no nia, sîrkhat khom sir no nia, pho leh khom doi no nia, irnêng irkulna khom tuk ual no ni. 33A hongna lama ngêt kîr nôk a ta, khua lût viat no ni. Rengpa thu suakin a ti. 34Hi khua hi keima le ki siahlo Davida sikin hrung ki ta, ki inzôk hrang a ni,” a tia.
35Kha zâna khan, Rengpa tirtôn chu Assuria hai tuala khan a fea, mi nuaikkhat le sîngriat a thathaia, zînga an thoiin chu mi ruakin a sip zit tâka. 36Assuria le Senakeriba chu an chîna, Ninevi khuaa an om ta. 37Nisroka tempila Pathian a biaka, a kûn lai takin a nâipa Andramelek le Sarezera haiin khandaiin an tuk thata, Ararat rama an rotsan tâka. A nâipa Esarhadona chu ar thûlin an lal nôk ta.
Currently Selected:
2 RÊNGHAI 19: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
