2 RÊNGHAI 18
18
Juda rêng Hezekia
(2 Tsn 29.1-2; 31.1)
1Ela nâipa Hosea chu Israel rêng kum thum an lal kumin, Ahaza nâipa Hezekia chu 2kum sômhni ringa a ni kumin Judahai rêng a changa, Jerusalema kum sômhni kum kuak an lala. A nu chu Zekaria nâinu Abija a ni. 3A pu Davida angin Rengpa mithmua thil sa a thoa. 4#Nam 21.9 Nam dang pathian biakna hmun irsânghai an siata, an lungphunhai khom an khiakpaia, pathiannu Asera illim, thing an iphunhai khom an siatpaia, Mosia dâr mirûl illim siam Nehustan an iti khom kha an siatpaia, kha zoro dênin Israelhaiin dâr mirûl illim ta hranga hâlirvôm thilinhlan ngai a ni. 5Hezekia’n Rengpa Israelhai Pathian irnghatin a oma. Judahai rêng, ama ang hi om mahai, a om khom om ta no nihai. 6A Rengpa intûk indetin a oma, a he khom sêl ngai maka, Mosia kuanga Pathian thupêk kha satakin a izôm ngai a ni. 7Khasikin, Rengpa’n a ompuia, a sin thôna murdi hmang a ichang pe a ni. Assuria hai a doihaia, an thu la nuam loiin a oma. 8Filistia mihai a soisakhaia, an omna murdia a doihaia, khua lian le chîn Gaza le a kôlvêla ramhai khom an mâk zoi ta.
9Hezekia kum minli an lal kumin, Hosea chu Israel rêng kum sari a lei ni tâka, Assuria rêng Salmanesera khan Israel ram a hong doia; Samari khua a hor huala. 10Kum thum an irhual kum Hezekia rêng kum rukna tena chu an lâk tâka, Hosea inlal kum kuakna a ni. 11Assuria rêngin Israelhai chu suaka an hruaihaia, Assuria rama an hruaihaia, Gozan ram Habor tui kôlhaia le Media khuahaia an inomtirhaia.
12Israelhaiin an Pathian Rengpa thu an zôm no sikin, Samari khua chu an ilâk pehai a ni, thuthung a isiam kha an zôm nuam no sikin, Rengpa siahlo Mosia dân an zôm nuam viat no sikin, ar ngai khom irngai nuam mahai, a zôm an tum no sikin.
Assuria mihaiin Jerusalem an nuar
(2 Tsn 32.1-19; Isa 36.1-22)
13Hezekia kum sôm kum minli an lal kumin, Assuria rêng Senakeriba’n Judai ram kul neina khuahai chu a doia, an hnêhaia. 14Lakis khua Senakeriba khuaa om chu Hezekia’n, “Thil ki lei itho indik loi kêng a ni ta. Ni rotsan ta ro, ni izong tak nang pe ki ti,” tiin lekha a thona. Assuria rêngin sumru her sîngkhat le rângachak her sângkhat chôi ro, a ti pea. 15Tempil le rêng sum koka sum om murdi chu a thona, 16Tempil mikota rângachak bêl illimhai khom a khoka, a kutin inkhâr irvôna rângachak kha a khoia, Senakeriba chu a thon tâka. 17Assuria rêngin Jerusalema Hezekia doi hrangin sipai tamtak a tîra, sipai hruaitu lian inthum, Tartana, Rab-saria le Rab-sakea#18.17: Hihai irhming hi anni irhming ni loiin an sin irhming a ni: Tartana hai, sipai hruaitu; Rabsaria-thainuzel hruaitu lian; Rab-sakea rêng bu pêkpu lian tihna a ni. hai a hruaihaia. Jerusalem an hong tungin chu dîl sak tiang ata tui lama puan irsûkna hmun fena lama khan an oma. 18Reng chu an insama, rêng in enkoltu Hilkia nâipa Eliakima lekha irziaktu Sibna, Asafa nâipa, thil irsinsia ngaitu Joa chu a zuang suaka.
19Rab-sakea’n a kuang khan, “Hezekia hi hong hril ro, rêng roiinpui Assuria khan hiang hin a ti, Tu mo ni la isabei, hianga ni la irsong! 20Hmûrthiam ringotin sipai hrâtna irdoi theihai hi ni la ingam mai mo a ini? Assuria doi hrangin tu ngân mo nang a la hong san hrang? 21Aigupta’n ni la san a tih ni la isôn mai ma ni? thingluang ang mamaia om a ni, ni la inhriat loi ma ni, kiak a ta ni kut kêng nang a la isun pena hrang. Aigupta rêng Faroa chu ama iamtuhai chu ite bêa an ibe loi a ni ta. 22Nin Pathian Rengpa chu kin irnghat nin itihna mo a ini? Judahai le Jerusalem mihaiin Jerusalema vai Rengpa chu biak hrang a nih tiin hmun danga Rengpa maichâm le a biak in hmun insiattu chu Hezekia hi a ni. 23Khanchu, ka pu Assuria rêng leh hin irngei unglân chu; nang a san hrangin sakor sânghni, atûn zel nang pe ki ti, a tia. 24Assuria sipai hruaitu laia nâipang tak khom pha mak chêia, sakor puakpêl, le sakor chung chuang theihai hi nang hong thon nuam viat no ni? 25Nin ram kin hong rûna, ki ilâk hi Rengpa thu a ini loi ma ni? Ama Rengpa ngêtin, hong rûnin lân, la ving ro; a ni iti a ni,” a tia. 26Eliakima, Sebna le Joa haiin, “Suria chongin thu hril ro, kin inhriat thei; Juda chong chu hmang no ro, kul bang bula toihai hin an irngai nuam a ni,” an tia. 27Ama’n, “Assuria rêngin nangni le nin rêng Hezekia kuang ringot thuhril hrangin nin ni itîr ma ni? ni ma, mipui atûna kul bang bula toihai le nangnihai ang dêna mizun le êk la fâk hranghai laia khom thu ki ihril a ni hi,” a tia.
28Khanchu, Rab-sakea a ngîra, Juda chongin a khêka, “Reng roiinpui Assuria thu hi irngai roi, 29Hezekia’n nangni huang no ri se, keima ata hi zôk ual bîk no ni, rêngin a ti. 30Rengpa’n ni san a ti. Assuria rêngin hi khua hi inhnê no ni, tiin Rengpa iam hrangin nangni huang no ri se. 31Hezekia thu irngaiirsâng pe no roi, Assuria rêngin, irngeina siam unglân, hong suak roi, ki hong tung nôk mâka chu mâni grep ra fa unglân, mâni theipui ra lei tûng roi, mâni tui panga tui lei in mai roi. 32Rengin ram sataka, grep irhuan satak taka uain tamna rama nangni lan omtir a ti, baidia siam hrang bu sana rama, oliv kung, le a hriak, le khuaitui tamna rama nangni inomtir a ti, a thu nin zômin chu a hring, a damin la suak nin ta, thi no chin ni. Rengpa’n ni sansuak ngêt a ti, tiin Hezekia’n nangni huang no ri se. 33Assuria rengata irthokin a ram san suakpui thei hrang nam, tu Pathian mo om? 34Hemat le Arpad pathianhai kha khôn mo an om zoi ta? Sefarvaim pathianhai Hena le Iva pathianhai kha khôn mo an om zoi ta? Samari khua sansuak thei mo an om? 35Hi ram murdia pathianhai hin itika khan mo an ram an idok ngai? Rengpa khomin Jerusalem hi sansuak thei ual ni mo?” a tia.
36Rengin, tûte’n sâm no roi a ti sikin, an dâihreka bâi khat khomin ite sâm mahai. 37Reng in sûng enkoltu Hilkia nâipa Eliakima changpuitu Sebna irsinsiatu Asafa nâipa Joa haiin an puan an inpotthêra, an honga, Rab-sakea thu chu Hezekia an hril ta a ni.
Currently Selected:
2 RÊNGHAI 18: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
