2 THURCHI SUINA 7
7
Tempil inhongna
(1 Rng 8.62-66)
1 #
Lev 9.23-24
Reng Solomona a chongchai zoiin chu irvân ata mei a zuang tâka, thilinhlanhai chu a kâng irvôm tâka; tempil sûng chu Rengpa roiinpuina’n a sip tâka. 2Rengpa in sûng chu a roiinpuina’n a sip zoi tâk sikin, ochaihai chu Rengpa tempila khan lût thei mahaia. 3#1 Tsn 16.34; 2 Tsn 5.13; Ezr 3.11; Ipn 100.5; 106.1; 107.1; 118.1; 136.1; Jer 33.11 Irvân ata mei zuang tâk le a in sûng chu Rengpa roiinpuinaa isip chu Israel mihaiin an hong hmuin chu, tuala an hmâi irnêng enin an inboka, Pathian chubai an mûka, a satnahai le a khonzâna nei kumtuangna sikin an inpâka. 4Solomona le a mihaiin Rengpa kuang thil an inhlana. 5A fâkhai hranga thilinhlanna hrangin sehrât sînghni le sânghni, kêlbelra nuaikhat le sînghni an hlana. Khaanga thoin Solomona le a mihaiin tempil chu an inhong tâka. 6Ochaihai chu an omna hrang hmun indanga khan an ngîra, Levi irchihai chu Davida ipêk thil tum inring theihai leh Rengpa inpâkna hla, Kumtuanga lung ni thungtu a nih ti hla, Davida’n sak hranga a iti ang ngêtin an sak tâka, ochaihai khomin mipui ngîrhai makunga bekul an tuma.
7A tual irkul sûng kholâi khom Solomona’n an honga, hâlirvôm thilinhlanhai, bu le bâl thilinhlanhai, fâkrua thilinhlan, sa marhai an roa, dâr maichâm a isin kha hihai murdi inhlanna hrangin a chîn hraia, a’rleng ta loihai chu tuala an ihâl ngai a ni.
8Reng Solomona le Israel mi tinhai khan, kairêng kût sûn sari sûng an hmanga, Israel ram hmâr tiang a hekna Hamath khêl le sim tianga Aigupta tuidung kâra mi murdi chu an hor buka, mi tamtak an ni. 9Maichâm lômna khan sûn sari a nanga, kairêng kût hin sûn sari dang a nang nôka. Kût sûn hnungkhôn taka khan kût chînna inkhôm roiinpui tak an neia. 10Zîng nôk tha sarina sûn sômhni sûn thum nî chu Solomona’n mipuihai chu an chîntirhaia; Rengpa’n Israelhai chu sat a vura, Davida hai, Solomona hai sat a vurhai sikin mipuihai chu an lôm tak taka.
Solomona kuanga Pathian inlâr nôkna
(1 Rng 9.1-9)
11Reng Solomona’n a iti angin tempil le a in a sin zoi hnungin chu, 12zâna Rengpa chu a kuang a zuan lâr pea, “Ni chongchaina ki len hriata, tempil hi ki kuanga thil nin hong irhlanna hmun hrangin kin thanga. 13Khua inlumtirin mo, chîmu fâk insiat hrang khâi inpungtirin mo, hri kin lêngtir tika mo, 14ki’rhming irputin ki mihai thuhnuairôl taka ki kuang an hong chongchaia, an ni hong pana, an sualna ata an irleta irvân ata len hria ki ta, an sualnahai ngaidamhai ki ta, an ramhai khom indingpuihai ki ti. 15Tempil hi vêl mai ki ta, hi hin an chongchaiin chu ki mikuara lût a ti; 16kumtuanga an ni biakna hrang hmun hrangin kin thanga, ki’rthiangtir tâk sikin vêl mai ki ta, hrung mai ki ti. 17Nang khom, ni pa Davida thu angin ni thoa, ki thupêkhai ni zôma, ki itihai ni zôma, omdân hrang ki iti angin ni omin chu, 18#1 Rng 2.4 ni pa Davida kuanga ki chonginkung intung ki ta, ar chihai chu Israelhai rêng chang mai an ti, ki lei iti a ni. 19Nangni hranga ki thupêkhai, ki chonginkunghai nin ngaisak noa, zôm nuam loiin, pathian danghai nin biaka, an sin nin tho pehaiin chu, 20nangni ki ipêkna ram ata hi nangni paisuak ki ta, nin ni ibiakna hrang hmun, ki tempil ki irthiangtir sai khom hi irzêltir nôk ki ta, mi tinin innuisan an ta, hmusit ok an ti.
21“Atûn chu hi in hi mi tinin irngaiirsâng an ta, kha tena chu a kôla fe murdihaiin ar khêl tih an ta, Itina mo Rengpa hin hi ram le hi tempil hi hianga a isoisak hi! ti an ti. 22Mi senkhatin, an irchi suanpârhaiin Aigupta ram ata hruaisuaktu Rengpa an Pathian chu an mâksan sika a ni hi teh; pathian danghai an poma an sin an tho pehai sikin Rengpa hin a isoisak a ni, tiin sâmhai an ti,” a tia.
Currently Selected:
2 THURCHI SUINA 7: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.