2 THURCHI SUINA 6
6
Mipui kuanga Solomona thuhril
(1 Rng 6.12-21)
1Khanchu, Solomona’n thu a hrila:
“Rengpa’n inthim irsakhaka khan om ki ti, a tia.
2Khannisian ni omna hrangin,
kumtuanga ni omna hrangin nang ki lei sin pe tâk a ni hi,” tiin.
3Khanchu rêng kha a hor heia, Israel mi irbukhai kha sat a vura; Israel mipuihai kha an ngîr chiana. 4#2 Sam 7.1-13; 1 Tsn 17.1-12 Khan, ama’n chu, “Rengpa Israelhai Pathian, ka pa Davida kuanga ama bâi ngêtin, 5Aigupta ram ata ki mi Israelhai ki hruaisuak ni ata Israelhai nam lai ata a tu khua khom hi ki’rhming omna hrang in sin hrangin lan thang ma unga, ki mi Israelhai chunga hruaitu hrang tûte lan thanghai ma ung; 6khannisian ki’rhming omna hrangin Jerusalem hi ki len thang tâka, ki mi Israelhai hruaitu hrangin Davida hi ki inthang tâk a ni, tia lei hriltu, ama kut ngêta hlo’nchuktirtu hi inpâkin om ri se. 7Ka pa Davida khan Israelhai Pathian, Rengpa irhming hrangin in sin a lei tum ngaia. 8Khannisian Rengpa’n ka pa Davida kuang, ‘Ki’rhmingin in sin ni lei tum ngaia, hianga lungrîl ni lei idôn hi ni tho insa; 9khannisian nangma’n chu in hi la sin no chi ni; ni nâipa ni sûng ata irzirin kêng keima in chu a isin hrang,’ a lei ti tâka. 10Khan, Rengpa’n a thuhril chu hlo an chuk pea; Rengpa ki inkung tâk angin ka pa Davida hmun chu ki lei luaa, Israel rêngtoihmuna ki lei toia, Israelhai Pathian, Rengpa irhming hrangin in chu a sin tâka. 11Khataka khan Israel irchihai kuanga a lei inkunga, Rengpa Thu’nkungna Bôm chu ki lei hrê tâka,” a tia.
Solomona chongchaina
(1 Rng 8.22-53)
12Khanchu, Rengpa maichâm kôla Israel irbukhai mithmua khan a ngîra, a bân a phara, 13(Solomona dâr dokâng a sei lam mûk ringa, a lian lam mûk ringa, ar sâng lam mûk thuma sin biak in kotsua taka khan khûksadelin irvân tiang enin a bân a phara.) 14O Rengpa, Israelhai Pathian irnêng le irvâna hin nangma anga zel Pathian om mahai, an lungrîlhaia ni lampui hrôtu ni siahlohai chunga khan thuthung intungin lung ni lei thunghaia; 15ni siahlo ka pa Davida kuanga ni chonginkung ni zoia, a ni a vuan hin ni bâia ni lei ihril tâk chu ni kut leh hlo nin chuktira. 16#1 Rng 2.4 Khasikin O Rengpa, Israelhai Pathian, ni siahlo ka pa Davida kuanga, “Ni’rchihai chu nangma omdân angin an omdân an irdîn photin chu, ki mithmua Israelhai rêngtoihmuna toi hrang chu irhmâi no chi ni,” tia ni lei inkung kha hlo’nchuktir roh. 17Khanchu Rengpa, Israelhai Pathian, ni siahlo Davida kuanga ni thuhril kha hlo’nchuktir ngêt roh.
18 #
2 Tsn 2.6
Khannisianlân, nang Pathian hring chu irnênga mihriamhai laia ni om ngêt hrang ma ni? Irngai ro, irvân irzâ taka khin irleng mak chea, hi keima in sin len vâng hin te irleng le khom irhoi mak chea! 19Nikhomsianlân o Rengpa ki Pathian ni siahloin nang a ikoina le a chongchaina hi irngaitua pe’n lân, ni siahlo chongchaina le nang a inghi hi lei irngaitua pe’n lân. 20#Dhn 12.11 Ama hmun tianga irheia ni siahlo hin a chongchaina irngai pe ro, kha khan ki’rhming chu om a ta, ni itihna hmun ngêia, in sûng tiang a sûn a zâna ni mit nin lêngtir theina hrangin. 21Khan, ni siahlo le ni mi Israelhai hin hi hmun tianga irheia an chongchai sûn hin an izonghai lei ngaitua pehaiin lân, a ni, ni omna hmun irvâna lei irngai pehaiin lân; irngaitua pehaiin ngaidamhai ro.
22Mi tukhom a khuahai chunga thil tho’nsualin, khomâk irsâmtir nang ta sianlân, hi ina ni maichâm kôla hin hor sâmhai sian, 23nangin irvân ata le’rngaiin lân, mi sual chu a sualna man thei loi inchangtirin lân, mi fel chu a felna thiam inchangtirin ni siahlohai roirêl pehai ro. 24Ni mi Israelhai hin ni chunga thil an tho’nsualna sikin an râlhai ata an doka, nangma tiang an hor heia, nir hming sâmin, hi ina hin chongchaia thil an hong zongin chu, 25nangin irvâna le’rngai pehaiin lân, ni mi Israelhai sualna chu ngaidamin lân, anni le an pi le pu ni ipêkhaina rama khan hruaihai nôk ro. 26Ni chunga thil an tho’nsualna sikin, irvân a pinga, rua tho ta maka, hi hmun tianga irheia an chongchaia nir hming an sâma, anni deng nin theitirhai sika an sualna an irletin chu, 27nangin irvân ata le’rngai pehaiin lân, an fena hrang lampui sa irhmuhaiin ni siahlohai le ni mi Israelhai sualna hi ngaidamin ni mihai irchon hranga ni ipêkna ramhai hin rua zuan thotir ro.
28“Kin rama hin châm a hong tâka, hrihrâi a lênga, phâivua lumin chîmu a sêm insiata, khâi an intâma, râlhai an hong lian le ni mihai dam loiin an hong om tena hai, 29an chongchaina irngai pehaiin lân; ni mi Israelhai irlet ta taka ni tempil tiang an chongchaiin chu, 30an izong kha inhren lân, irvân ata le’rngaiin lân, ngaidamhai ro, nangma vai hin mihriam sûngrîl ngaituana ni hmu theia, 31kin irchihai ni ipêkna rama an om sûng chu nangma hi nang an chia, ni thu an lâk theina hrangin an irhoipui ang takin an chunga tho ro.
32“Nam dang, Israel mi ni loi ram hlataka omhai khomin ni roiinpuizia le ni sinthotheizia an inhriata, ni changpuihai nuam mai ti inhriata hongin, hi in tianga irheia an chongchaiin chu, 33an izong chu irngai pehaiin lân, ni omna irvân ata irngaiin lân, an izong chu tho pehai ro; rammuala mi murdihaiin ni mi Israelhai angin nan hria an ti. Hi ki tempil sina hin chubai nang an hong mûk ti inhria an ti. 34An râlhai doi hranga ni mihai an suaka, kho tiang rengata khom, nangma hranga ki tempil sin tianga irheia an chongchaiin chu, 35irngai pehaiin lân, irvân ata inhren lân, an râlhai chu inhnêpuihai ngêt ro. 36Ni mihaiin nangma ata thilsual an thoa, thilsual tho loi tûte om mahai, ni ningmurin an râlhai nin hnêtira, suaka an hruaihaiin, an ihruaihaina ram hlatak ni khomsian. 37Ni mihai chongchaina chu irngaitua pehaiin lân, kha rama khan an sual an irleta, an sualna le an dik loina thupha an chôiin chu, o Rengpa, an chongchaina chu irngai pehai ro. 38Kha rama an om zoiin an sual an irleta, irsîra an irchihai kuanga ni ipêkna ramhai, nangma hranga ni khopui irtan hai, ni ta hranga ki isin tempil tianga an chongchaiin chu, 39le’rngaiin lân, ni omna irvân ata irngaitua pehai ro, an chunga khonzâna neiin lân, ni mihai sualna murdi ngaidamhai ro.
40“O ki Pathian, ni zuang thîrin lân, hi hmuna kin chongchaina hi ni le’rngaitua pe ro. 41#Ipn 132.8-10 O Rengpa Pathian, zuar siam suakin lân, ni omna hranga hin zuang ro, ni roiinpuizia inlangna bôm leh hong lût ro. O Rengpa Pathian ni ochaihai chu an sin thônahai hi satvurhaiin lân, ni mi irthianghai chu ni thil sa tho pehai hin lômhai sian. 42O Rengpa Pathian, ni sahriak pol hi masan no’n lân, ni siahlo Davida thil sa thohai inhre mai ro,” a tia.
Currently Selected:
2 THURCHI SUINA 6: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.