2 THURCHI SUINA 14
14
Reng Asa’n Ethiopia mi an hnêna
1Reng Abija chu a thia, Davida khopuia rênghai thâna an phûma. A nâipa Asa chu ama irthûlin an lala. Asa inlal kum sôm sûng chu râl irvei loiin an oma, 2Asa’n thil dik le thil sa, a Pathian Rengpa mithmua a tho ngaia. 3Nam dang maichâmhai le an pathian biakna hmun irsânghai a pai pehaia, an lung millimhai an khoipai pehaia, Aseri irlim an iphun kha an siat pehaia. 4Judai rama mihai chu an irchibulhai Pathian Rengpa nuam lama sintho le a dânhai zôm hrangin a hrilhaia. 5Judai ram sûng kho tina nam dang pathian biakna hmun irsânghai le an mirimhoi hâlna maichâmhai chu a pai pehaia, an lal sûng chu lungthi takin an iom a ni. 6Rengpa khan lungthi takin an omtira, irdoina a om no kâr hin Judai rama kulhai an sintira. 7Judai rama mihai kuang, “Tho ei khuahai hi siam insa nôk ei ta, lung kulhai sin ei ta, râl hrungna kul irsânghai mikot le a kalnahai sin ei ti. Rengpa ei Pathian chu a neitu’n a bê sikin, hi rama hin thu ei la inei a ni; ama ei pom sikin hmun tina râlboiin a ni inomtir a ni hi,” a tia. Khaang khan, kulhai kha an siama, satakin an zoi tâka. 8Reng Asa’n pho le ufeihai chôiin, Judai ram ata sipai nuai thum le Benjamina ram ata irdoi thei, rôppho innghâk le thal chôi sipai nuai hni sîngriat a neia; mi hrât irdoi thei tak tak an ni.
9Ethiopia mi Zera khan sipai nuai sôm irzakhat le sakor tâli irzathum hruaiin Judai ram a hong rûna, Maresa a hong tung rak tâka. 10Lei doi hrangin rêng Asa chu a le’rsiama, Maresa kôla Zefata irhôra khan a le’rsang tâka. 11Asa chu a Pathian Rengpa kuanga a chongchaia, “O Rengpa sipai hrât loihai, hrât taka inchangtir theitu, nangma ang hi tûte om mahai. O Rengpa kin Pathian, ni zuang changpui ro, nangmaa hin kin irnghata, nangma irhming sâmin hi mihai doi hrangin kin irthok a ni. O Rengpa kin Pathian ni nia, mihriamin nang ngam no ri sehai,” a tia.
12 Rengpa’n Ethiopia mihai chu Asa le Juda sipaihai makunga khan an hnêa, an rot zoi tâka. 13Asa le a rualhaiin Gerar dênin an irzûlhaia, Ethiopia mihai chu an thathai oka, a lei pût thei zel om ta mahai. Rengpa le a sipaihai chu an ingamhai viat loi a ni, sipaihaiin râllâk sum tamtak an lâka. 14Gerar le a kôlvêla khopuihai khom an insiat thei ving a ni; khataka mi lei omhai khan Rengpa kha an chi tak taka, khuahai an inmoka, râllâk sum tamtak an lâka. 15Belrapu omnahai an hâla, belra tamtak an chelhaia, saringseihai an chelhaia, Jerusalema an kîr nôk tâka.
Currently Selected:
2 THURCHI SUINA 14: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.