2 THURCHI SUINA 13
13
Abija le Jeroboama irdoina
(1 Rng 15.1-8)
1Israel rêng Jeroboama kum sômhleiriat an lal kumin Abija chu Judai rama rêng a changa, 2Jerusalema kum thum an lala, a nu chu Gibea kho mi Uriela nâinu Mikaii a ni. Abija le Jeroboama chu an irdoia, 3Abija chu sipai hâi inthang nuaiminli a hmanghaia, 4Efraima tâng ram Zemaraim tâng sîpa Abija a ngîra, Jeroboama le Israelhai chu an khêka, “Ki thu hi lei irngai roi, 5Rengpa, Israelhai Pathianin, Davida le a’rchihai kuang Israel mihai chunga rêng nina chu thuthung neiin a pêk tâka, ti nin la inhriat loi ma ni? 6Davida nâipa, Solomona siahlo Nebata nâipa Jeroboama chu a pu kuang ata tehel a zonga, mi chanlamboihaiin an inpâka. 7Solomona nâipa Rehoboama chu ite bêin bê maka; ama lak nâipang a nia, annihai ngam hrangin a lungrîl la puihling maka. 8Davida irchihai kuang rêng thuneina Rengpa ipêk khôkmâkin nin sipai tam le Jeroboama sehrât irlim, nin pathian hranga a isiam songin nin hong pûta. 9Rengpa ochaihai le Levi irchihai kha nin inhnot dokhaia, nam danghai tho dân angin ochai hrang nin inkunghaia. Sehrâtchal hong kaihai chu kêlbelra sari mani, hong hôlhai kai chu, kin ochai tiin nin lei hmang nuamhai ngaia.
10“Keini’n chu kin Pathian Rengpa sin kêng kin itho, la irheisan ngai ma ung, Arona irchia ochaihaiin an thotum an thoa, Levi irchihaiin an ihruaihai a ni. 11Zîng tin le khohloi tina Rengpa ta hrangin mirimhoi an hâla, hâlirvôm thilinhlanhai khom an inhlan ngai a ni. Bai kathâr#13.11: kathâr ti omzia chu “irthiangliai demnaboi, nam irthiang tihna ang hi a ni.” chu dokâng irthianga an sia mai ngaia, khohloi tiang chu rângachak meiser khom an la ihâl mai ngai a ni. Keini’n chu Rengpa thupêk kin la zôm mai ngai a nia, nangni rêkin chu nin imâk tâk a ni. 12Pathian chu a ni hruaitu a nia, a ochaihai khom irdoina bekul tum hrangin an irsiam diam a ni. O Israelhai, nin irchibulhai Pathian Rengpa hi lei doi no roi, zoi no chin ni,” a tia.
13Khaang khan Jeroboama’n a sipai senkhathai chu Juda sipai hnenghai hrangin a siahaia, senkhat chu an hnung tianga doihai hrangin an fetirhaia. 14Judahaiin an hong thîrhaia, an râlhaiin an irhualhai tâka, Rengpa chu an koia, ochaihaiin bekul an tuma, 15Judahai chu an khêklula, Abija’n a hruaihaia, an doia, Pathianin Jeroboama le Israelhai chu an hnêhai tâka. 16Israelhai chu Judahai makunga an intâna, Pathianin Judahai chu an hrâttirhai tâka. 17Abija le a sipaihaiin Israel sipaihai chu an doktirhai tâka. Israel sipai sahai nuairinga vêl an thathai a ni. 18Judahaiin an irchihai Pathian Rengpa chu an irnghatna a ni sikin Israelhai an inhnêna a ni.
19Abija’n Jeroboama sipaihai chu a’rzûlhaia, an khopui senkhat Bethel hai, Jesana hai, Efron hai le a kôlvêla khuahai a sutpaihaia. 20Abija dam sûngin Jeroboama chu ngîrsuak thei ta maka, Rengpa’n a ithatpai tâk a ni.
21Abija chu a hong hrât sit sita, dôngma sômhleiminli a neia, nâipasal sômhni inhni le nâinupang sômhleiruk a neia. 22Abija thurchi dang, a thuhril le a sin thohai chu deipu Idoa thurchi irziakna lekhabua a chuang.
Currently Selected:
2 THURCHI SUINA 13: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.