2 THURCHI SUINA 15
15
Reng Asa’n Pathian biak dân a siam insa
1Obeda nâipa Azaria chunga Pathian irtha a zuang tunga. 2Reng Asa irhmupui hrangin a fea, a khêka, “Reng Asa nangni Judai le Benjamina mihaio, ki thu hi irngai roi. Ama tiang nin kop sûng chu Rengpa khom nangni tiang om a ta, nin zongin chu hmu nin ti, nin mâksanin chu nangni masan a ti. 3Israelhaiin chu Pathian tak biak loiin zoro sôttak an oma, ar chutir hrang ochai khom nei mahaia, dân khom inhre mahai. 4Khannisian chardongna an tong zoro’n Israelhai Pathian Rengpa tiang an irheia, ama an zonga, an hmu ngai. 5Kha lai khan ram a buaia, ite mumal a nei no sikin tûte irvâksuak ngam zel om ngai mahai. 6Nam le nam deng an irthei irhlôma, kho sûng le kho sûng deng an irthei irhlôma. Pathianin buaina le chardongna a intungtir a ni. 7Nangni’n chu chi loiin irnaksong unglân, nin sintho ra chu hmu ngêt nin ti,” a tia.
8Reng Asa’n deipu Azaria, Obeda nâipa thu an hriatin chu a’rsongpuia, Judai le Benjamina rama millim om murdi chu a paihai vinga, a pa’n tâng ram khua a ilâk murdi an boipai vinga. Tempil tuala Rengpa maichâm khom a sin insa nôka.
9 Rengpa’n a ompui a nih ti an hriatin, Efraima ram ata Samaria hai ram ata ama tianga kop mi tamtakin Asa an hor hnêla. Asa’n khahai kha Judai ram le Benjamina rama mihai a bukkhômhaia. 10Asa inlal kum sômhleiringa tha thumna khan chu Jerusalema an irbukkhôm nôka. 11Kha ni khan an râllâk sehrât irzasari le kêlbelra sângsari Rengpa kuang an inhlana. 12An irchihai Pathian Rengpa chu lungrîl taka a dik taka biak hrangin thu an thunga. 13Ulian khom nâipang khom, pasal khom nupang khom, Israelhai Pathian Rengpa biak nuam loi chu that hrang a ni, an tia. 14Inring taka khêkin Rengpa irhming sâmin khomâk an irsâma; an thuthung chu an pom khaka, an khêka bekul an tuma. 15A diktakin thu an thung indet tâk sikin, Judai rama mihai chu an lôm tak taka. Rengpa sintho chu a hoi an tia, ama’n a lei poma, hmun tina irngeina an lêngtira.
16A pi rêngnu, Maaki’n Aseri irlim intirom tak a phun sikin rêngnu nina a pai pea; Aseri irlim kha Asa khan a tuka ilhlek hlekin Kidron tui kôla a hâlpai vinga. 17Ram sûnga hmun irsâng pathian dang an ibiakna murdi chu rêng Asa’n pai zoi no khomsian a dam sûng chu, Rengpa vai an tûka. 18A pa Abija’n Pathian kuanga thilpêk murdi chu Asa’n tempila a siaa, ama ngêtin rângachak le tangkarua a inhlanhai khom a sia saa. 19Asa hin kum sômthum ringa roi a rêl sûng chu irdoina om nôk ta maka.
Currently Selected:
2 THURCHI SUINA 15: HRACLBSI
Highlight
Share
Copy
Want to have your highlights saved across all your devices? Sign up or sign in
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.