MARK 16

Isu Thawhkitna

(Mat 28.1-8; Luk 24.1-12; Joh 20.1-10)

1Chun, Chawlhni chuh a hung beih phetin, Mari Magdalin leh, Jakob nu Mari, leh Salom te chun, chieh a Isu luong chuh nuh dingin thil gimlim a chawu a. 2Chun, ni sagih ni masapen zingkal matak in, nisa suok zui in thân achun a chieh u a. 3Lampi achun, “Thân kawt apat suong chuh kuo’n ei lik dawk sak ta die aw?” ti’n a kiho u a. (Suong lientak ahi ngâl a.) 4Himahleh, a vak et phet u chun, suong chuh kilik chawnsa’n a mu tau a. 5Khutichun, thân sunga chun a lut u a, tangval khat, puon vam silh, changlam panga chu a muu a; a lau tau a. 6Amah chun a kawm u ah, “Lau kiu, Nazareth Isu, a khetdên u kha hawl na hiu a; a tho kit tai; zie hin a um ta puoi. En mah tiem u, a sielna mun u hih.#Sam 16.10 7Tuhin chieh unla, a sinsakte leh Peter kawmah: Galili gama na mau a chieh ding ahi; na kawm u a a gen guol u khan tak achun mu’n lau, tih hilh u,” a ti a. 8Khutichun, amau chuh kintak in a pawt u a, thân apat chun a tai u a, lau leh kilîng kawm in, Chun, a lauh ziekun kuomah kawmah bangmah a gen puou.

Mari Magdalin kawma Isu Kilâkna

(Mat 28.9-10; Joh 20.11-18)

9Chun, ni sagih ni masapen a zingkal a thawhkit nung in, Mari Magdalin, a sung apat a thitha sagih a nawhdawk sak nu kawmah a kilak masapen a. 10Amahnu chuh a lawite kawmah a chieh a, mithi sun leh kap a umte chuh a va hilh ta a. 11Himahleh, amah chuh a hing kit a, amahnu chun a mui, tih he mahleu a gingcha puou hi.

Nungzui Nih te kawma a Kilâkna

(Luk 24.13-35)

12Chun, zie nung chun, alak u a mi nih gam lam zuona a chieh lai un mêl zatchuom pu’n a kawm u ah a kilak a. 13Amau chuh a vaikit u a, sinsak dangte chuh a hilh u a, himahlele, a gingcha diek puou hi.

Sawmlekhatte kawma Kilâkna

(Mat 28.16-20; Luk 24.36-49; Joh 20.10-23; Nas 1.6-8)

14A nunung pen ah, ankuong a um lai un, sawmlekhatte kawmah a kilak a. A thawhkit nunga amah mute thugen a taksan loh ziek u leh, a lunggil hawu tâk ziek chun amau haw chuh a gai a. 15A kawm u ah, “Khawvel pumpi ah chieh un la, thilsiem tincheng kawmah Chanchin Pha gen un. 16A gingcha a baptistma chang chuh hukdam in um intin, a gingcha lo chuh vang mawhchang in um ina. 17Chun, a gingchate chuh thilmak hihtheihna piek in um un au: Ka min in thithate nawhdawk un tin; pau thak in le pau un au; 18Gulhaw chuh khut in lau intin; a hihloh leh thihna gu bang hita leh dâwn mah leu, suknat in um puo’n au; damlote chungah a khut uh ngau intin, tichun hung dam zel un au,” a ti a.

Isu Van a a Kalna

(Luk 24.50-53; Nas 1.9-11)

19Khutichun, Lalpa Isu’n a kawm u a thu a gen zawhin, van a puih toh in a um a, Pathien changlam ah a va chu ta a.#Nas 1.9-11; Sam 110.1 20Tichun, sinsakte chuh a chieh dawk tau a, gamtin ah Chanchin Pha chuh a gen tau a; chun, Lalpa’n amau haw chuh a kithuohpih a, a thilmak hihteu chun a thugen teu chuh a hihdet zel hi. Amen.#A tawpna hi: Zik khenkhat leh malai pek a kilehna khat achun, châng 9-20 tieng hi hilo in, châng 9-10 chan chauh in a hihtawp a, zie guol hin: (châng 9 Numei chuh Peter leh a guolte kawm achun a chieh a, hilha a um u chuh chawmcha’n a hilh a. 10 Zie nung chun, Isu ngêi chun a sinsakte mang in, kumsawt hukdamna thu gûk leh hing zing chuh, sak leh thang achun a sawl dawk tai.)

Currently Selected:

MARK 16: GANGBSI

Highlight

Copy