LUKE 1

Deihtak Theopilas

1Mi tamtakin, I lak uh a thil hungtung kigen khah, a theihtawp un zik a na guo tau a. 2Zie thil haw a tûng apat phuongte leh mute chun, ei hilh tâk guol u khan a zikuh a. 3Khutichun, nang zahum, Theopilas, zie thil haw chuh abul apat chingthei takin ka sut a. Zieziekchun, zie thil haw chuh kizawm zelin, nanga dinga hun zik pha dingin ka ngaihtuoh hi. 4A thu hun sinsak hawu kha a dikna bukim na het theihna dingin ka tih ahi.

Baptist Johan Pienna

5Judia gam leng Herod lal lai in, thiempu Abija lawi laka mi, a min Zakaria kiti, thiempu khat a um a. Amah chun thiempu Aron chi inkuon laka mi zi’n a nei a, a min chuh Elizabet ahi.#1 Kh 24.10 6A nih uh chun Pathien mitmuh in diktat takin a um sek uh a, bukim takin Lalpa thupiek leh a dante chuh a zawp sek ui. 7Himahlele, Elizabet chuh a chîng a hih ziekin cha a nei puou, a nih uh chun upa tak gel ahi ta ngâl u a. 8Chun, tihi ahi a, ni khat chuh Zakaria chuh, ni chenga a nasep hun in, Pathien Ho-In achun thiempu nasemin a um a. 9Thiempute hih dân ngeina guolin amah chuh, maichâm a lut leh gimlim hâl chuh a chanvo ahi. Khutichun, Lalpa Ho-In achun a lut a, 10gimlim a hâl lai chun, mipite chuh pawlam ah a guolin a paucham u a. 11Chun, Lalpa vânsâwlchâk khat, gimlim hâlna maichâm sik changlam panga dingin, a kawmah a kilak a. 12Amah chuh Zakaria’n a muh phetin, a lungzîng a, a lau mah mah ta a. 13Himahlele, vânsâwlchâk chun a kawmah, “Zakaria, lau ki’n, Pathien in na pauchamna khah a he a puo, na zi Elizabet chun chapa hun hinsak intin, a min dingin Johan na sak ding ahi. 14Tichun, nang lâwpin kipâk in na tin; amah a pien tieng mi tamtak le kipâk un au. 15Lalpa mitmuh in milien hi’n tin, uain leh zu himhim dâwn puo’n a. A nu sunga kipatin Thagau thiengtho in dim ina,#Kis 6.3 16Tichun, Israel mipi tamtak, Lalpa a Pathien uh lam ah puikit ina. 17Thiemgau Elija guola hât leh thilhih thei takin Lalpa masang achun chieh intin. Pate leh chate chuh puikhawm kit intin; mi, thu-awilo te chuh thil dik lam ah kai hêi kit intin; Lalpa mite chuh amah a dinga kisazo dingin hilh ina,” ti’n.#Mal 4.5-6 18Chun, Zakaria’n vânsâwlchâk kawm achun, “Zie chuh bangti’na ka het ding? Kei ka têk ta a, ka zi le a têk ta ngâl a,” a ti a. 19Chun, Vânsâwlchâk chun a dâwng a, a kawmah, “Gabriel, Pathien ânga ding sek ka hi a; hun hopih ding leh, zie chanchin pha chuh hun hilh dinga ei sawl ka hi.#Dan 8.16; 9.21 20Himahleh, ka thugen haw, a hun taka hungtung ding chuh na ginchak loh ziekin, zie thil haw chuh a hungtun masang sieh thipkêi in na tin, pau le pau thei puon la,” a ti a.

21Zielai a mipi, Zakaria ngaka umte chun, bangti dana Pathien Ho-In sunga zie chanpi hi hung um ahi ta die! ti’n mak a sa ten tau a. 22Chun, a hung pawt phet chun, amau haw a hopih thei ta puoh a, ziephet chun, Ho-In sung achun kilâkna a mui tih, a he tau a. Thumal khat le a gen thei ta puoh a, a khuta thawh in, a kawm u ah a gen ta a. 23Chun, Pathien Ho-In a amah panna ding hun tiem chuh a beih phetin, Zakaria chuh In lam ah a chieh kit ta a. 24Zie nung chawmkhat hal chun, a zi Elizabet chuh a hung gai ta a, 25Mi laka ka minsie selna’n, Lalpa’n ei panpih tai, ti’n, In nusieh lo in tha nga a um ta a.

Isu Pienna ding genlawkna

26Chun, a tha gupna achun Pathien in, vânsâwlchâk Gabriel chuh Galili gama khuo khat, Nazareth kiti achun nungak thiengtho khat kawmah a sawl a. 27Amah chuh, leng David suona mi khat, Joseph kiti tawh kihuol lai ahi a, zie nungak min chuh Mari ahi. 28Tichun, vânsâwlchâk chuh a kawmah a lut a, a kawmah, “Na chungah thamuonna um hen! Lalpa chuh na kawmah a um a, nasa takin a hun vangsak hi!” a ti a. 29Vânsâwlchâk thugen chun Mari chuh nasa takin a subuoi a, a thugen chuh bang tihna ahi die! ti’n a ngaihtuoh a. 30Vânsâwlchâk chun a kawmah, “Mari, lau ki’n, Pathien deihchuom na hi. 31Ngai ah, gai in na tin, chapa hun nei inla, a min dingin ISU na sak ding ahi. 32Amah chuh milien hung hi’n tin, Chungnung pên Pa Chapa ti’n au. Lalpa Pathien in a kawmah a suonpau David chutphah chuh pie’n tin,#2 Sam 7.12, 13, 16; Isa 9.7 33Jakob suonte chungah kumkhuotuong in lal intin, a gam in tâwp ni nei ta puo’n a,” a ti a. 34Chun, Mari’n vânsâwlchâk kawm achun, “Ziehaw chuh bangti’n ahi thei die, nungak thiengtho ka hi ngâl a?” a ti a. 35Vânsâwlchâk chun a dâwng a, a kawmah, “Thagau Thiengtho na chungah hungtung intin, Pathien thilhih theihna chuh na chungah um intin, zieziekchun, nau thiengtho hung pieng ding chule Pathien Chapa ti’n au. 36Chun, ngaitie, na behnu Elizabet khan le a têk nung in chapa a vawp tai! Nau nei thei lo ahi a tih u khah, tu tha hi a tha gupna ahi tai. 37Pathien kamsuok. himhim thilhih theilo in um puo’n a,” a ti a.#Tsb 18.14 38Chun, Mari’n, “Ngaitie! Lalpa suoknu ka hi, na thugen guol zelin ka chungah hungtung hen,” a ti a. Chun vânsâwlchâk chun a taihsan ta a.

Mari’n Elizabet a va vehna

39Zie zawh chawmkhat hal chun, Mari chuh a kipan a, Judia gama thingtâng khuo khat achun a chieh ta a. 40Zakaria In ah a lut a, Elizabet chuh a va chibai ta a.

41Chun, tihi ahi a, Elizabet in Mari hopih chuh a het phetin, a gil sunga nausen chuh a hung tawi a. Tichun, Elizabet chuh Thagau Thieng tho in a dim a; 42Aw ngeih tak in, “Nang chuh numei chengcheng laka hampha pên na hi ie! na gil a gah, nausen chule a hamphai! 43Ka Lalpa nu ka kawma na hung hi bangti dân ahi ta? 44Ngaitie, nei chibai thawm ka bil a a lut lut in, ka gil sunga nausen chuh kipâkin a kichawm hi! 45Chun, Lalpa’n na kawma a thugen chuh guitung ahi tih, na ginchak chuh, mi hampha na hi na lâwm lâwm e!” a ti a.

Mari Pahchakna La

46Chun, Mari’n,

“Ka hin in Lalpa a limbawl a.#1 Sam 2.1-10

47Ka thagau le ei hukdampa Pathien chungah a kipâk mah mah ta a.

48A suoknu nam chawm zie a mu a, a lungsiet a;

Ngai ah, tu a kipatin khangthak chengcheng in hampha ei sa ding ahi.

49Pathien hât khan ka chungah thil lopi tak ei hih saka,

A min le a thiengtho hi.

50Amah kihchate chung achun a zahngaihna chuh akhang-akhangin a latsak zel sek a.

51A bân tha hattak chuh a sulang a.

Mi kiletsakte thiltup chuh a hihzak sak ta a.

52Leng lopi takte chuh a lalchutphah uh apat chun a luoi tha a,

dinmun niemte chuh a chawisâng ta a.

53Gilkielte chuh thil phatak chun a sutai a,

Neizote chuh khut ngawnin a sawl mang ta a.

54Ei suonte kawma a thutiem chuh a vawp zing a,

A suok, Israel te panpih dingin a hung ta a.

55Abraham leh a suonte kawma,

kumlekhuo a zahngaihna latsak ding chuh a hezing ngâl a,” ti’n.#1 Sam 2.1-10; Tsb 17.7

56Chun, Mari chuh Elizabet kawmah tha thum val a um a, chun In lam ah a chieh kit ta a.

Baptist Johan Pienna

57Tichun, Elizabet chuh a nau neih phat a hung hi ta a, tichun, chapa a hun nei ta a. 58Chun, a invengte leh a ulenau te chun, Lalpa’n a lungsiet mah mah hi tih a he tau a, a kipahpih chiet tau a. 59Chun, tihi ahi a, a ni giet ni chun nausen zektan ding chun a hung uh a, a min dingin a pa Zakaria min mah sak a guou a.#Tpd 12.3

60Himahlele, a nu chun, “Hilo e! a min chuh Johan sak zawk ding ahi,” ti’n a dâwng a. 61Amau haw chun a kawmah, “Na behte lak ah zie tawbang min pu chuh kuomah a um kha puou hi,” ti’n a dâwng u a. 62Tichun, a pa kawm achun alim a thawh in, naupang min dingin bang sak a nuom em tih a dawng u a. 63Chun, lehkha zikna pêk a ngên a, “A min chuh Johan a hi ie,” ti’n a zik a. A bawnu chun mak a sa mah mah uh a. 64Chun, phulo-halo in a kam leh a lei chuh a hung kiphel a, Pathien pakcha’n a hung pau dawk pai zieng a. 65Chun, a invengte chengcheng chuh lauhna’n a dim tau a. Zie thu haw chuh Judia gam, thingtâng gam cheng achun a kithang suok ta a. 66Mi tin; a hepha chan chun, “Zie nausen hi bangti’n a hung um ta phet dem!” ti’n a lungthim un a ngaihtuoh chiet tau hi. Lalpa thilhih theihna chuh a chungah a um hi tih a kichien ngâl a.

Zakaria Thugenlawk na

67Chun, a pa Zakaria chuh Thagau Thiengtho in a hung dim ta a,

tichun, Pathien thu a hun gen ta a:

68“Lalpa, Israel Pathien chuh pahchak in um hen!

A mite a hung veh a; tatna a siem sak ta a.

69A suokpa David suona kipat chun,

Hukdamna ki ei siem sak ta ngâla.

70Lei kisiem tûng apat thiemgau thiengthote kama a gen guol khan.

71Ei doteu lak leh ei mudahte chengcheng laka pat hukdam in I um u a.

72Amah chun ei suonteu kawm akhan,

lungsietna latsak ka ting,

ka thugawlh thiengtho chuh hezing ing ka, a ti him a.

73Khutichun, ei suonpau Abraham kawma kihâksiel in,

I melmateu lak apat ei hukdam ding thu a tiem a;

74Lau lo a na I sep theih na dingun,

75Khutia chuh, I damsung chenguh a,

a masanga thiengtho leh diktat taka I um theihna dingun.

76“Ahi, bawipu, nang hi Chungnung pên pa Thiemgau tih hin la.

A lampite guonggalh lawk dinga Lalpa masanga chieh ding na hi ngâla.#Isa 40.3; Mal 3.1

77I Pathien uh lunggil a lungsietna vangin,

A gitloh nau ngaihdamna’n;

78I Pathien u chuh zahngaihna hau leh nunnem tak ahi ngâl a;

Zieziekchun, chunglam apan in hukdamna ni no suok in ei hun tawh ina;#Mal 4.2

79Thimnuoi leh thihna lima chute salhvak ding leh,

Lungmuonna lampi a kal ei suon sak dingin.” ti’n.#Isa 9.2 #Isa 9.2

80Tichun, nausen chuh a hung khang lien a, taksa leh lungthim lama le a hung khang lien deuh deuh ta a. Israel mipite laka a hung kilat dawk masang cheng chun, thalek gam ah a um zing a.

Currently Selected:

LUKE 1: GANGBSI

Highlight

Copy