MARK 15

Isu Pilate Masang ah

(Mat 27.1-2, 11-14; Luk 23.1-5; Joh 18.28-38)

1Chun, zingkal matak in, thiempu lien chun, dân thuzikte leh upate leh, vaihawm pawl chengcheng chuh kin takin a kimuhpih a, thil a guonggalh tau a. Isu chuh a kân u a, a puidawk u a, Pilate kawmah a pie dawk tau a. 2Tichun, Pilate in a kawmah, “Judate leng na him?” ti’n a dawng a. Isu’n a dâwng a, “Na gen chuh ahi,” a ti a. 3Chun, thiempu liente chun thil tamtakin Isu chuh a hêk u a, 4Khutichun, Pilate in a dawng kit a “Bangma’n na dâwng paw maw? A hun hêkna zozai u hi ngaiin!” a ti a. 5Himahleh, Isu’n bangma’n a dâwng diek puoi, tichun, Pilate in mak a sa mah mah a.

Isu Thi dinga Thutanna

(Mat 27.15-20; Luk 23.13-25; Joh 18.39—19.16)

6Chun, Pilate in Kut ni leh suongkultângte laka khat a nget tâk u chuh a thahdawk seka, 7Chun, mi khat a min Barabbas kiti, hel pawl a tuolthat, migilo dangte tawh suongkul ah a tâng u a. 8Tichun, mipite chuh a hung kikhawm u a, amau a dinga a hih sak sek guola hih dingin a ngên tau a; 9Chun, Pilate in a dawng a, a kawm u ah, “Judate leng hi hun thahdawk sak leng na nuom u?” a ti a. 10Thiempu liente’n mitthîpna zieka ahun puih uh ahi tih a he ngâl a.

11Himahleh, thiempu liente’n mipi chuh Barabbas thahdawk sak zaw dinga ngên dingin mipite a tîlguu a. 12Pilate in mipi chuh a dawng kit a, “Judate leng na tihpau hi la leh, bang ka lawh ta die leh?” a ti a.

13Chun, amau haw chun “Kross ah khêndên in,” ti’n a kiko kit u a.

14Ziephet chun, Pilate in a kawm u ah, “Bang ziekin em, banga a hihkhelh?” a ti a. Tichun, “Kross ah khêndên ah,” ti’n a hah kiko zaw diek u a.

15Khutichun, Pilate in mipi a suklungkim nawp ziekin, Barabbas chuh a thahdawk ta a, chun, Isu chuh a zêp zawhin kross a khetdên dingin a kawm u ah a piedawk ta a.

Sepaihte’n Isu a Chiemnuihnau

(Mat 27.27-31; Joh 19.2-3)

16Khutichun, sepaihte’n, gam vaipawpa In huongsung, Praitoriam kiti achun Isu a puilut u a; amau lawi a mi chengcheng a sam khawm u a. 17Tichun, Isu chuh puon sandup a silh sak u a, linglukhuk a phek u a, a khuksak u a. 18“Chibai, Judate Leng,” ti’n a chibai u a. 19Chun, a luchang mawlh in a khên u a, chil a sietkhum u a; khupdin in, a masangah a bawkkhup u a. 20Chun, chiemnuih bawlnaa a mat zawh un, puonsandup chuh a suohthau a, amah puon a silh sak u a, khetdên dingin a puidawk tau hi.

Isu Khetdêna a Umna

(Mat 27.32-44; Luk 23.26-43; Joh 19.17-27)

21Chun, lampi achun mi khat, a min Simon kiti, a thingtâng apat a khawpi a hung chuh a muu a, zie chuh sepaihte chun Isu kross pu ding chun a pawngmat u a. (Simon chuh Kurini mi, Aleksandar leh Rufas pa ahi.) 22Tichun, Isu chuh Golgotha kiti mun achun a pui u a, zie chuh, “Luguh mun,” tihna ahi. 23Zie tak achun, uain murra tawh kihel dâwn dingin a pieu a; himahleh, Isu’n a dâwn nuom puoh a. 24Chun, a kross ah a khêndên u a, mitin in a chan ding chiet uh hetna dinga phunsan in, a silhlechen haw chuh a kihawm u a.#Sam 22.18 25Chun, Isu a khetdên nau chuh vaiham vel tak ahi a, 26Chun, a hêkna lehkha a chunglam ah “JUDATE LENG” ti’n a zik u a. 27Chun, amah tawh gucha nih, a changlam ah khat, a veilam ah khat a khêndên u a. 28Khutichun, Pathien lehkhathu, Amah chuh migilote laka simkhawm ahi tai tih chuh a guitung tai.#Zik khenkhat achun châng 28 na hi footnote ah a kikawih hi. #Isa 53.12 29Chun, mipi vakvielte chun a luchang uh thing in, “E khai! nang Pathien Ho-In phel a, ni thum sung a tungding kit pa!#Sam 22.7; 109.25 30Kihukdam inla, kross apat in hung kum tang uo!” ti’n a êngho u a. 31Khutibang mah chun, thiempu liente leh dân thuzikte chun le, chiemnuihna a mang in, “Midang bawn hukdam a, amah a kihukdam thei puoi. 32I muh u a, I ginchak theihna dingun, Krista, Israel leng chuh tuhin kross apat in hung kum tha hen,” a tiu a.Chun, mi nih a khetdênpihteu chun le Isu a gai u a.

Isu Thihna

(Mat 27.45-56; Luk 23.44-49; Joh 19.28-30)

33Chun, sun a hung hih phetin, dâkkâl thum sung gam pumpi chungah thim a hung zing ta a. 34Chun, vaimim huonphat vel chun Isu chuh ngeih tak in a kiko a, “Eloi, Eloi, lama sabak-thani?” ti’n, Zie chuh, “Ka Pathien, ka Pathien, bang dinga ei taihsan?” tihna ahi.#Sam 22.1

35Khutichun, a kienga ding khenkhatte chun zie chuh a zak phet un “Ngaitiem u, Elija a sam hi,” a tiu a. 36Chun, mi khat a tai a, spanj uain thuk a dieh in, luong mawlh ah a tâk a, dâwn dingin a pie a, “Khawngai u, amah latha dingin Elija a hung em en hitiu,” a ti a.#Sam 69.21

37Chun, Isu chuh ngeih tak in a kiko a, a thagau a thah ta a.

38Tichun, Pathien Ho-In puonzak chuh a chunglam apat in a nuoi lam chanin a hung kithek suok ta a.#Pdn 26.31-33 39Chun, a masanga sepaih lawiupa ding chun khutia Isu kikoa, a thagau a thah chu a mu a. “Zie pa hi Pathien Chapa a hi kei hi,” a ti a. 40Chun, numei khenkhat gamla taka a na en le a um u a. Amau haw lak achun, Mari Magdalin leh, Mari Jakob neuzaw leh Joseph nu leh, Salom a tel u a. 41Ziete chun Isu Galili a a um lai in a na zui u a, a na zenviel uh ahi. Numei dang tamtak, Jerusalem a a kitawn toh pihte le a um ui.

Isu Vuihna

(Mat 27.57-61; Luk 23.50-56; Joh 19.38-42)

42Chun, nitâk lam a hung hih phetin, Joseph, Arimathai mi a hung a. Amah chuh vaihawm pawlte laka mi zahum tak, Pathien lenggam hung tung ding a na ngak mi ahi. 43Zie chuh, kiginni a hi a, (zie chuh chawlhni ma a ni ahi), Joseph chuh hangsan takin Pilate kawm achun a chieh a, Isu luong chuh a va ngên ta a. 44Chun, Pilate in, Isu a thih zieng chuh a het in mak a sa mah mah a. Sepaih lawiupa a sama, Isu thihna chuh a sawt tam, tih a dawng a. 45Tichun, sepaih lawiupa apat a thu a het zawh phet chun, a luong chuh Joseph a pie dawk ta a. 46Joseph chun patngatpuon a chaw a, a luong chuh a latha a, patngatpuon chun a tuom a; suong kigeikuok thân ah a siel a. Tichun, thân kawt achun suong khat a kawih ta a. 47Chun, Mari Magdalin leh Jose nu Mari chun a en u a, Isu luong kisielna chuh a muu hi.

Currently Selected:

MARK 15: GANGBSI

Highlight

Copy