MARK 14

Isu Matna dinga Phielgukna

(Mat 26.1-5; Luk 22.1-2; Joh 11.45-53)

1Chun, ni nih zawh chuh, Chiehkân Kut leh Chângthâk Chawl sawhloh Kut hi ding a hi a; thiempu liente leh dân sinsaktute chun, Isu lepbawl a, a thah theihna dinguh a gûkin a hawl tau a.#Pdn 12.1-27 2“Kut sungin vang hih puoi tiu, khutilochun, vantâng lak ah buoina um kha’na,” a kitiu a.

Mari’n Isu Thau a Nuhna

(Mat 26.6-13; Joh 12.1-8)

3Chun, Isu chuh Bethani a Simon, mi phâk pa In ah a um a. Chun, ankuong a um lai in, numei khat, alabasta bawma spiknard thau gimlim, man tamtak chawiin a hung a. A bawm chuh a khên kêk a, Isu lu chung achun a sung a. 4Himahleh, taka um mi khenkhat haw chu a lungnau a, “Bang dinga zie thau gimlim hi a mawk sukmang ahi? 5Makhai zathum sanga tam zaw a khawt a, neilahte kawma piek theih ahi ngâl a,” a tiu a. Zie nu chung achun nasatak in a phunchiek tau a.

6Isu chun lah, “Bangmah lawh kiu; bang zieka amah hi subuoi na hiu hi? ka chungah na pha a sem ahi. 7Mi neilahte chuh na kawm u a um zing ahiu a, na nawp phat phat u leh amau chuh na pha nasep sak thei ui; kei vang chuh na kawm u a um zing lo ding ka hi ngâl a.#Dann 15.11 8A hih theih sun a hih ahi a, ka sapum hi vuih dinga thau ana nuh lawk ahi. 9Tihtakzet a ka hun hilh hi, Khawvel pumpi ah, khawiale Chanchin Pha hi a kigenna tâkah, zie numei thilhih hile amah hetzingna dingin gen zel hi’n a,” a ti a.

Juda’n Isu a Matsakna

(Mat 26.14-16; Luk 22.3-6)

10Chun, Juda Iskariot, sawm le nih te laka khat chun, Isu a kawm u a a matsak theihna dingin thiempu liente kawmah a va chieh a. 11Amau haw chun a het phet un, a kipâk mah mah u a, a kawmah dangka piek a tiem tau a. Tichun, a matsakna ding lemchâng a hawl ta a.

Chiehkân Ankuong

(Mat 26.17-25; Luk 22.7-14, 21-23; Joh 13.21-30)

12Chun, chângthâk chawl sawhloh ni, ni masapen, Chiehkân Kut na ding a thah seknau ni chun, a sinsakte’n a kawmah, “Chiehkân Kut An na nek theihna dingin khawi ah va guong leu ung na nuom hi?” a tiu a. 13Isu’n a sinsakte laka nih a sawl a, a kawm u ah, “Khawpi ah va lut un la, pasal khat bela tui pu’n hun na kituokpih intin; amah chuh zui u. 14Tichun, a lutna In ah, zie In neipa kawm achun, ‘Sinsakpa’n, Ka sinsakte tawh Chiehkân an ka nekna dinguh malzin indan chuh khawitaka?’ a tii, va tiu. 15Tichun, ama’n indan chungnung lien tak, thuomphuo umsa, guonggalh zawh sa hun na etsak ina; zie tak achun ei u a dingin ana guonggalh un,” a ti a.

16Chun, sinsakte chuh a pawtdawk u a, khawpi achun a lut u a, a kawm u a Isu’n a gen bang chun a va muu a; zie chun Chiehkân Kut an chuh a guonggalh tau hi.

17Tichun, nitâk a hung hih phetin, Isu chuh sinsak sawm le nih te chu tawh a hung tau a. 18Tichun, dawhkan a an a nek lai un Isu’n a kawm u ah, “Tihtakzet a ka hun hilh na hiu hi, na lak u a mi khat, ei nekpih hin ei matsak ding ahi,” a ti a.#Sam 41.9

19Sinsakte chu a lungkham tau a, khat khatin a kawmah, “Kei ka him?” A ti chiet u a, chun, a dangte’n le, “Kei ka him?” a tiu a. 20Isu’n a kawm u ah, “Sawm leh nih te laka khat, kuong a chângthâk ei diehpih pa hi ahi. 21Mihiem Chapa hi a chanchin a na kizik guol takin chieh ding ahi; himahlele, Mihiem Chapa matsak ding pa chung chuh a gik hi! Zie mihiem chuh a na pieng lo hileh amah dingin phazaw ding ahi,” a ti a.#Sam 41.9

Lalpa Nitak Ankuong

(Mat 26.28-30; Luk 22.14-20; 1 Kor 11.23-25)

22Chun, a nek lai un Isu’n chângthâk a laa, vang a pie a, a phelsuoh a, a kawm u ah a pie a, “Lau inla, neu, ziehi ka sapum ahi,” a ti a. 23Chun, khawn a la a, kipah thu a gen zawhin, a kawm u ah a pie a; tichun, a bawn un a dâwn chiet u a. 24Chun, a kawm u ah, “Ziehi ka thisana thugawlh thak, mi tamtak a ding a pawt ding, etsakna chuh ahi.#Pdn 24.8; Jer 31.31-34 25Tihtakzet a ka hun hilh na hiu hi, Pathien gama a thak ka dâwn ni atun masang sieh, grep guia gah apat dâwn kit ta puo’ng ka,” a ti a.

26Tichun, la a sak zawh un a pawtdawk u a, olive tâng achun a chieh tau a.

Peter in Isu a Kizuksanna

(Mat 26.30-35; Luk 22.31-34; Joh 13.36-38)

27Chun, Isu’n a kawm u ah, “Tuzan in ka chungthu ah na bawn un lungkim lo in hung um vek un lau, ‘Belam chingpa chuh zêp ing ka ting, belam haw chuh kithehzâk un au,’ tih zik ahi ngâla.#Zek 13.7 28Himahleh, ka thawhkit nung in Galili gama na mau ah chieh ing ka,” a ti a.

29Himahlele, Peter in a dâwng a, a kawmah, “A bawn un hun nusieh vek mah leule, ken vang hun taihsan puo’ng ka,” a ti a.

30Isu’n a kawmah, “tihtakzet in ka hun hilh hi, tuni’n, tuzan mah mah in, âk nihvei a khuon ma’n, nangin thumvei ei kinungzuk san in la,” a ti a.

31Himahleh, Peter in, khauh zaw diek in a dâwng a, “Na thihna a thi ding hi leng le, hun kinungzuksan puo’ng ka,” a ti a.

Zie tawbang chun a bawn un a ti chiet tau a.

Gethsemani Huon a Isu Pauchamna

(Mat 26.36-46; Luk 22.39-46)

32Chun, Gethsemani kiti mun chuh a tung u a; Isu’n a sinsakte kawmah, “Ka paucham sungin taka hin chuu in,” a ti a. 33Tichun, Peter leh Jakob leh Johan a pui a, nasa taka thawmhau in ana lungzîng pan ta a; 34Tichun, a kawm u ah, “Ka lungthim nasatak in a lungkham a, thihna khawp hiel ahi; zie tak a hin um unla, kivêng zingun,” a ti a.

35Chun, masang lam zuonin neu khat a chieh a, tuol ah a bawkkhup a, a hihtheih chun, zie hun chun amah peltha dingin a paucham a, 36“Abba, hepa, bang cheng nangin na hihthei a, zie khawn hi kei apat in lamang in; himahlele, kei thu hilo in, nangmah thu thu hi zaw hen,” a ti a.

37Chun, a hung kit a, a sinsak thum te chuh ipmu’n a mu a. Peter kawmah, “Simon, a ip na hi maw? Dâkkâl khat le kiging zing a um theilo maw?” a ti a. 38Tichun, a kawm u ah, “Thepna a na puk lohna dingun kiging zing unla, paucham un. Thagau in vang a ngâp a, taksa vang chuh a hatlo ahi,” a ti a.

39Tichun, a va chiehdawk kit a, thugen ngêi gen in a paucham kit a. 40Chun, a hungkit phetin, amau haw chuh ipmu’n a mu kit a, a ihmut uh a suok ten ngâla; tichun, a dawnna ding le a he ta puou hi.

41Chun, a hung thumveina achun, a kawm u ah, “Tuhin chuh ipmuu inla kichawl tau in. A hun tai! A hun chuh a hung tung tai! En tiem u, Mihiem Chapa hi migilote khuta matsak a um ding ahi. 42Tho unla, chieh hitiu. Entiem u, ei matsak ding pa chuh a hung nai tai!” a ti a.

Isu Mata a Umna

(Mat 26.47-56; Luk 22.47-53; Joh 18.3-12)

43Chun, Isu’n a gen lai takin, Juda sawm le nih te laka khat chuh a hungtung pai zieng a, amah tawh hung kitawn in, thiempu liente leh dân thuzikte leh upate apat in mipi tamtak, chemzâm leh khetbuk chawiin, a hungtung u a. 44Chun, a matsak ding pa chun: “Ka châwp pên pên chuh hi’n tin man un la, phataka veng in puimang zieng u,” ti a amau haw chuh tiemtehna a na pieksa diem ahi. 45Khutichun, a tun tun u chun, amah chuh a zuon phei a, “Sinsakpa, sinsakpa!” ti’n a châwp a. 46Khutichun, Isu chuh a man u a, a kân tau a. 47Tichun, a kawm u a dingte laka khat chun a chemzâm a zuk dawka, thiempu lienpen suokpa a sat a, a bil a satthak sak a. 48Ziephet chun, Isu’n amau haw chuh a hopih a, a kawm u ah, “Chemzâm leh khetbuk chawiin, gucha man ding guolin, ei man dinga hung pawt na hiu maw? 49Pathien Ho-In ah ni chengin, nang haw hun sinsak in ka um sek a, himahleh, nei man puou a. Himahleh, Pathien lehkhathu a guitunna ding ahi,” a ti a.

50Tichun, sinsakte cheng chun amah a taihsan u a, a tai mang tau a.

51Chun, tangval, kuo ahim khatin patngatpuon silh in Isu chuh a zui a. amah chule ana man u a, 52himahleh, a patngatpuon chuh a taihsan a, sangawn in taimang ta a.

Vaihawmte Masanga Isu Dinna

(Mat 26.57-68; Luk 22.54-55, 63-71; Joh 18.13-14, 19-24)

53Tichun, Isu chuh thiempu lienpen In achun a pui u a, tak achun thiempu liente leh, dân thuzikte leh upahaw chuh a kikhawm u a. 54Peter in amah chuh gamla tak apat in a zui a, thiempu lienpen In huong gei in; mi vengte lak achun a va chu a, mei a awi a. 55Tichun, thiempu liente leh vaihawmte chengcheng chun Isu a suklup theihna dingun, a mah hêkna ding a hawl u a, himahleh, khat chale a mu thei puou ui. 56Mi tamtakin zuou in a hêk u a, himahleh, a hêkna hawu chuh a kituok thei a um puoi. 57Chun, kuote ahim a ding dawk u a, zuou thu’n a hêk u a: 58“Zie Pathien Ho-In khuta sak hi phie’ng ka ting, ni thum sungin Ho-In dang, khuta sak loh tung dawk ing ka, a tih ka zau hi,” ti’n a gen u a. 59Himahleh, a heknau thu chuh a kituok diek puoi. 60Ziephet chun, thiempu lienpen chuh a lai ah a ding dawk a, “Bangma’n na dâwng paw maw? Ziete hun hêkna hi bangti dân a?” ti’n Isu a dawng a. 61Himahleh, amah chuh a thip kêi a, bangma’n a dâwng puoi. Thiempu lienpen chun Isu a dawng kit a, “Krista, Hampha Pathien Chapa chuh na hi?” ti’n.

62Ziephet chun, Isu’n, “Ka hi, Mihiem Chapa hi, Bangakai hihtheipa khut changlama chuh a, van mei laka hung hun mu ding na hiu hi,” a ti a.#Dan 7.13; Sam 110.1

63Ziephet chun, thiempu lienpen chun a silhlechente chuh a bawtthêk a, “Hetpih dang bang dinga ngaih beh ding I hiu a? 64Pathien a gensiet zie chuh na za tau hi. Bangti’n na ngai u?” a ti a.

Khutichun, a bawn un amah chuh thi tâk ahi, ti’n mawh a chansak chiet tau hi.#Tpd 24.16 65Chun, khenkhat in chil a sietkhum pai u a, a mai a tuom sak u a, a bêng u a, a kawmah, “Gen lawk ale,” a tiu a. Chun, suokte chun a bêng diek diek u a.

Peter in Isu a Kizuksanna

(Mat 26.69-75; Luk 22.56-62; Joh 18.15-18, 25-27)

66Chun, Peter chuh nuoilam a In huongsung a a um lai in, thiempu lienpen suok nungakte laka khat a hung a. 67Peter mei lum awi chuh a muh phetin, a en a, “Nang le Nazareth Isu kawma um na hi,” a ti a.

68Himahleh, amah chuh a kilep, “Ka he puoi, na thugen chule ka hekha hiel puoi,” ti’n, huongcha ah a va pawtdawk a; ziephetchun, âk a khuong ta a.

69Chun, suok nungak khatin tak achun a mu kit a, a kawma dingte kawm achun, “Zie pa hi amau haw laka khat ahi,” a ti kita. 70Himahleh, Peter chuh a kilep kit ta a. Zie zawh chawmkhat hal chun, a kawma dingte chun Peter kawmah, “Amau laka tel na hi mawngmawng hi; Galili mi na hi ngâla, na pau in a kihei,” a ti kit u a.

71Himahlele, Peter chun, “Zie mihiem na gen pau chuh ka he puoi,” ti’n amah kihansiet khum hielin a kihâksiel a.

72Chun, âk khuon nih veina chuh a hung khuong ta a. Ziephet chun, Peter in, Isu’n a kawma, “Ak nihvei a khuon ma’n nangin, ka hun he kha puoi, ti’n thumvei ei kilepsan inla,” a tih kha a hedawk a. Zie chuh a ngaihtuoh leh a kap ta a.

Currently Selected:

MARK 14: GANGBSI

Highlight

Copy