MARK 13
13
Isu’n Jerusalem Siet ding Thu a Genna
(Mat 24.1-2; Luk 21.5-6)
1Chun, Isu chuh Pathien Ho-In apat a chiehdawk lai in, a sinsakte laka khatin a kawmah, “Sinsakpa, entie, a suonghaw leh a Inhaw hi a nasa ngêi ie,” a ti a. 2Isu’n a kawmah, “Zie in lopitak hi na mu maw? sukchip loh a suong kitieng mawng mawng taka hin um puo’n a,” ti’n a dâwng a.
Buoina leh Sukgimtheihna
(Mat 24.3-14; Luk 21.7-19)
3Chun, Isu chuh olive tânga Pathien Ho-In zawna a chut lai in, Peter leh Jakob leh Johan leh Andrew te chuh a kawmah a hung u a: 4“Zie thil haw chuh bangtik leh hi dinga, zie thil haw chengcheng hung tun ding tieng chu leh a tiemtehna bang hi dinga, kei uh ei hilh ah,” ti’n a dawng guu a.
5Chun, Isu’n a kawm u ah, “Kuoma’n a hun dawha bawl lohna dingin chingthei un: 6Mi tamtak, ‘Krista ka hi’ ti’n Ka min in hung un tin; mi tamtak hun dawha bawl ding ahiu hi. 7Chuleh, kido thu leh kido thuthang na zak tieng u leh, lungzîng kiu; zie thil haw chuh a hung um ding mawng ahi; himahlele, a tawpna chuh hi tadih puo’n a. 8Nam chuom leh nam chuom kido untin, gam chuom leh gam chuom kido ding ahi ngâl u a; mun chuom chuom ah inling um in tin, kiel leh buoina tung intin; ziehaw chuh nauhanat kipatna ahiu hi.
9“Himahleh, chingthei u; vaihawmte hun matsak un tin, chun, kikhawpna In ah zêp hi’n na tin uh; kei ziekin vaihawmte leh lalte ma ah Chanchin pha hetsakna dingin puih hi ding na hi ngâl u a. 10Khutichun, tawpna a tun masang in, Chanchin pha chuh mi cheng kawma gen in um ina. 11Chuleh, a hun mat u a, vaihawmna In a a hun puih hun u leh, bang ka gen die aw ti’n ngaihtuoh khawl kiu in, a hun taka hung kipie chuh gen zawu un. A gen ding chuh nanguh hilo in, Thagau Thiengtho hi zaw ding ahi ngâl a. 12Chun, suklup dingin suohpihpa’n a suohpih matsak in tin, pa’n a chapa matsak in tin, chate’n le a nu leh a pa do un tin. Suklup sak un au. 13Kei ziekin mi chengcheng muhdah hi’n lau; himahleh, a tâwp chana thuok ngâp chuh, zie ngêi chuh hukdam in um ina.
Hapta lailung a Sukgimtheihna
(Mat 24.15-28; Luk 21.20-24)
14“Amahvang chuh, thiemgau Daniel in a na gen ‘Sugampa kihdak-um’ chuh a din lohna dinga ding na muh tieng u leh, (a sim ta’n a umzie he hen.) Judia gama umte chuh tânghaw achun taimang u heh.#Dan 9.27; 11.31; 12.11 15Chun, In chunga umte chule kum kiheh, a In sunga thil umte ladawk dingin lut kiheh. 16chun, lo a umte chule, a puon la dingin vaikit kiheh. 17Himahleh, zie nihaw a gai leh chasen pawmte chung chuh gik ina! 18Chun, ziehaw hi phalbi laia a hung tun lohna dingin Pathien kawmah ngên un. 19Zie nihaw achun gimtheihna hung um ding ahi a; zie bang khawpa nasa mawng mawng chuh, Pathien siem, thilsiem pat tûng apat tu chan hin a um kha ngei puoh a, um le um kha ngei puo’n a.#Dan 12.1; Thp 7.14 20Lalpa’n zie nihaw chuh suchawm kileh, kuomah suokcha puo’n a. Himahleh, a mi telte, a telchuomte ziekin nihaw chuh a suchawm ta a.
21“Zie phat chu leh, mi kuo’n le na kawm u a, ‘En tiem u, zie hin Krista a um hi’ ahim, ‘En tiem u, zie khun a um hi’; a tih u chun, taksang kiu. 22Krista lêmte leh thiemgau lêmte hung pawt ding ahi ngâl u a. Tiemtehna haw leh thilmak haw bawl un tin, hihthei vang leh telte nasan le puih mang guo’n au. 23Himahleh, chingthei u! a hun tun ma’n bangakai ka hun hilh masak na hiu hi.
Mihiem Chapa Hungna ding
(Mat 24.29-31; Luk 21.25-28)
24“Himahleh, zie nihaw, zie buoina hun zawh chu leh, nisa hung thim in tin, tha vak ta puo’n tin,#Isa 13.10; Jol 2.10-31; 3.15; Thp 6.12; Isa 13.10; Ezk 32.7; Jol 2.10; 3.15 25Van apat in aksihaw chu kieu in tin, van thilhih theihna um haw chu suklîng hi’n au.#Isa 34.14; Thp 6.13; Jol 2.10 26Zie tieng chuleh, Mihiem Chapa chuh thilhih theihna nasatak leh lopina nasatak tawh meipi chunga hung mu’nau.#Dan 7.13; Thp 1.7 27Chun, vânsâwlchâkte chuh sawldawk intin, a telchuomte chuh kâwlmawng li apat, lei tâwp apat a van tâwp chanin lawlkhawm ina.
Theipi Kung a Tehkalna
(Mat 24.32-33; Luk 21.29-31)
28“Tichun, theipi kung a hin tehkal thu sin u; a bâk a hung dawna, a nah a hung sel tieng leh, nipi a nai tai tih na he sek ui. 29Khutibang mah chun, zie thil haw hi hung tung na muh tieng u leh, a hung nai ta a, kawt bul ngêi ah a um tai tih heu in. 30Tihtakzet in ka hun hilh na hiu hi, zie thil haw chengcheng hi a hung tun ma’n, zie khang hi beilo ding ahi. 31Lei leh van bei intin, ka thu vang chuh bei puo’n a.
Ani leh Dâkkâl Kuoma’n Helo
(Mat 24.36-44)
32“Himahlele, zie ni leh dâk thu chuh, Pa ngâllo chun, kuoma’n, van a van sawlchakte’n le, Chapa’n le a he puou hi. 33Chingthei unla, kiging zinga um in paucham un; a phat chuh na he puoh ngâl u a. 34Mihiem Chapa chuh, mi a In nusieh a, a suokte thuneihna pie a, mi tin amau sep ding chiet pie a, kawtkhak ngakte le kigin zing ding thu pie a, gam gamla taka zin tawbang chuh ahi. 35Zieziekchun, kiging zingin um u; Inneipa hung ding phat chuh, nitâk lam ahim, zankhang ahim, âk khuon ahim, zingkal ahim, a hih ding na he puoh ngâl u a. 36Khutilochun, hung phut in, ipmu’n hun mu kha’n a. 37Chun, na kawm u a ka gen hi, mi chengcheng kawma ka gen ahi: Kiging zingin um un,” a ti a.
Currently Selected:
MARK 13: GANGBSI
Highlight
Share
Copy
Want to have your highlights saved across all your devices? Sign up or sign in
Gangte Holy Bible - PATHIEN LEKHABU THIENGTHO
Copyright © Bible Society of India, 2010.
Used by permission. All rights reserved worldwide.
