LUKE 5

Isu Nungzui Masate

(Mat 4.18-22; Mrk 1.16-20)

1Chun, tihi ahi a, mipi’n Pathien thu a ngaihthak u a, amah a vawk hut hut lai u chun, amah chuh Genesaret dîl pang achun a dinga. 2Chun, dîl panga kuong nih um chuh a mu a, himahlele, ngamante chuh a pawt u a, a len hawu a sawp u a. 3Tichun, Isu chuh kuong khat Simon a zawk achun a chu a, a kawmah, lui panga pat neukhat tawl lut deuh dingin a ngên a; tichun, kuong achun a chu a, mipite chuh a sinsak ta a. 4Chun, thugen a haih phet chun, Simon kawm achun, “Na kuong chuh lithuk lam zuonin tawl lut deuh inla, nga man dingin na len hawu sep un,” a ti a.

5Chun, Simon chun a kawmah, “Sinsakpa, zan khawvak in gim takin ka tawi u a, bangmah ka man puou a, himahlele, nang thu’n lên sep kit ing ka ie,” a ti a. 6Khutichun, a vak sep kit u a, nga nasatak a khuh kha tau a, a len hawu chuh a ek philhphelh a. 7Ziephet chun, kuong danga a lawiteu um haw chuh amau haw hung panpih ding chun khut in a vak zap u a. Tichun, a hung u a, kuong nih chuh tum vang vang hielin a sungdim gel u a. 8Simon Peter in zie chuh a muh phetin, Isu masang achun a khupbawk a, a kawmah, “Lalpa, ei taihsan ah, migilo ka hi,” a ti a.

9Amah leh a lawite chun, zie bang lâwm lâwm a nga tampi a mat u chuh mak a sa mah mah u a. 10Simon lawi mah, Zebedai chapa Jakob leh Johan in le mak a sa mah mah u a. Isu’n Simon kawmah, “Lau ki’n, tunung vang leh mihiem hun man ding na hi tai,” a ti a.

11Chun, a kuonghawu chuh lui pang lam ah a tawl kai u a, bangakai taihsan in Isu a zui tau a.

Isu’n Mi a Sukdamna

(Mat 8.1-4; Mrk 1.40-45)

12Chun, tihi ahi a, khaw khata a um lai in, ngaitie, mi khat phâk vei a um a. Isu a muh phetin, a masanga bawkkhup in, “Lalpa, na nawp leh nei hih thiengtho thei hi,”#12. “Nei hih thiengtho thei hi” tih hi, sakhuo dana thienglote tihna ahi. ti’n a ngên a. 13Tichun, Isu’n amah chuh a vak bân a, a khawih a, “Ka nuom hi, a na thiengtho ta’n,” a ti a. Chun, phulo-halo in a phâk chuh a bei pai zieng ta a. 14Isu’n a kawmah, “Kuomah hilh ki’n, amahvang chuh, chieh inla, mi chengin na dam tai tih a hetna dingun thiempu va ki-etsak inla, Mosi thupiek guolin kithawihna va lân in,” ti’n thu a pie a.#Tpd 14.1-32 15Himahlele, a chanchin chuh a hah kithan zaw deuh ta a, mipi nasatak a thu ngaitha nuom leh a natna hawu hihdam nuom in a hung kikhawm u a. 16Himahlele, amah chuh mun thip ah a chiehdawk a, a paucham sek a.

Zeng Sukdamna

(Mat 9.1-8; Mrk 2.1-12)

17Chun, tihi ahi a, ni khat chuh, Isu’n a sinsak lai in, Pharisaite khenkhat leh dân thuzikte a kawmah a chuu a, ziehaw chuh Galili leh Judia gam khawpi tin apat a leh Jerusalem khuo apat a hung ahiu ui. Lalpa thilhih theihna chuh mi sukdamna dingin Isu kawmah piek in a um a. 18Chun, ngaitie, zeng khat a zâlkhun pum in a hun zawn u a, a ânga kawih dingin zawn lut a guou a. 19Himahleh, mipi ziek chun zawn lutna ding himhim a mu puou a. tichun, In chung lam ah a kal dawk u a, In chung a vit vang u a, tichun, a zâlkhun pum in mipi lak achun, Isu âng zawn achun a khâi tha suk tau a. 20Chun, Isu’n a taksan zieu chuh a muh in, a kawmah, “Mihiem, na gitlohna ngaihdam ahi ta ie,” a ti a.

21Ziephet chun, dân thuzikte leh Pharisaite chun, “Zie banga Pathien gensie hi kuo a hi die! Pathien ngâllo chuh kuo a gitloh ngaidam thei?” ti’n a ngaihtuoh u a.

22Khutichun, Isu’n a ngaihtuoh u chu a he a, a kawm u ah, “Bang zieka na lunggil u a zie bang thil chuh na ngaihtuoh u a? 23‘Na gitlohna ngaihdam ahi tai,’ tih leh, ‘Tho inla, keng in chieh ta’n, tih hi a bang hi a gen baihlam zaw?’ 24Bang hilele, lei chunga hin Mihiem Chapa hin gitloh ngaihdam theihna a nei hi tih hun hilhchien ing ka,” a ti a. Khutichun, zeng kawm achun, “Tho inla, na puonphah la’n la, na In ah chieh ah ka hun tih na hi,” a ti a.

25Khutichun, thakhat in, a bawn u a masang achun a tho dawk a, a puonphah chuh a kilak a, Pathien pakcha kawmin a In ah a chieh ta a. 26A bawn un mak a sa mah mah tau a, lauhna’n a dim u a, Pathien a pakchau a, “Tuni hin thil mak tak I muu ahii,” a tiu a, a lau mah mah u a.

Levi Sapna

(Mat 9.9-13; Mrk 2.13-17)

27Chun, zie zawh nung chun, a pawtdawk a, siehdawlna muna chu, siehdawlte laka khat, amin Levi kiti chuh a mu a. Isu’n a kawmah, “Ei hun zui ah,” a ti a. 28Tichun, a kipan a, bangakai nusieh in a zui ta a. 29Chun, Levi chun a In ah Isu dingin guolvakna nasatak a bawl a, tichun, siehdawlte leh mi dang tamtakin a umpih u a. 30Chun, Pharisaite leh Danthuzikte chuh sinsakte chungah a phunchiek u a, “Bang zieka siehdawlte leh migilote kawma na nek u a na dâwn u a?” a tiu a. 31Chun, Isu’n a kawm u ah, “Mi hiselte chun daktor a ngai puou a, mi natcheh te’n a ngai zawu hi. 32Mi diktatte sam dinga hung ka hi puoh a, mi gilote hawla, lunghei sak dinga hung ka hi zawi,” a ti a, a dâwng a.

Anngawlhna Thua Dawtna

(Mat 9.14-17; Mrk 2.18-22)

33Chun, amau chun a kawmah, “Johan sinsakte’n an a ngâwl u a, a paucham sek uh a, Pharisai sinsakte’n le khutibangmah chun a hih sek u a, himahlele na sinsakte hin a neu a, a dâwn sek uh a,” a tiu a.

34Isu’n a kawm u ah, “Mo puite kawma a pasal ding chuh a um lai chengin, mopuite chuh na ngawlh sak sek um? 35Himahlele, a pasal ding chuh a kawm u apat puihmang ni hungtung intin, zie ni chu le vang ngawl un au,” a ti a.

36Isu’n zie tehkal thu hile a kawm u ah a gen a: “Kuoma’n puon thak puon lui belhna dingin a bawttha ngei puou. Khutichun hih ta leu, a thak chun luoi-ek intin, a thak them leh a lui chu kilawm kit puo’n a. 37Chuleh, kuoma’n uain thak savun pêng lui ale a thun ngei puou ui, thun hi taleu, uain thak chun savun pêng lui chu phukêk intin, savun pêng haw chule hung sie’na 38Uain thak chuh savun uain pêng thak a chuh a thun zawk dinguh ahi! 39Chun, kuoma’n uain lui a dâwn zawh nung un uain thak a dâwn nuom puou ui, ‘Alui a phazawi,’ a ti ngâl u a,” a ti a.

Currently Selected:

LUKE 5: GANGBSI

Highlight

Copy