LUKE 6

Chawlhni Thu a Dawtna

(Mat 12.1-8; Mrk 2.23-28)

1Chun, hiti hi ahi a, chawlhni masa zawh a chawlhni nihna achun Isu buhlei haw achun a chiehpai a. A sinsakte chun buhvui haw chuh a sik u a, a khutpêk un a nuoi ngim u a, a neu a.#Dann 23.25 2Chun, Pharisai kuote ahim chun, “Bang zieka chawlhni a hih thienglo chuh na hih u a?” a tiu a. 3Isu’n a dâwng a, “David a gilkiel laia, a guolte tawh a thilhih u kha na sim kha puou maw?#1 Sam 21.1-6 4Khati a, Pathien Ho-In a a chieh a thiempute ngâllo in nek ngeiloh chângthâk kawih chuh a lak a, a nek a, a guolte kawma le a piek thu kha,” a ti a.#Tpd 24.9 5Chun, Isu mah in a kawm u ah, “Mihiem Chapa hi Chawlhni Lal ahi,” a ti a.

Khut Zeng Sukdamna

(Mat 12.9-14; Mrk 3.1-6)

6Chun, Chawlhni dang khat achun, Isu chuh kikhawpna In ah a lut a, a sinsak a. Zie tak achun mi khat a khut changlam zeng hi a um a. 7Tichun, Danthuzikte leh Pharisaite chun a hêkna ding a muh theihna dingun, Chawlhni a a hihdam ding leh hihdam loh ding guntak in a chingsui u a. 8Himahlele, Isu’n a ngaihtuoh hawu chuh a he a, zeng kawm achun, “Kipan inla, alai ah dingdawk ah,” a ti a. Tichun, a kipana, tak achun a ding ta a. 9Ziephet chun, Isu’n a kawm u ah, “Chawlhni’n hihphat a thieng hi? hih siet? sukdam a thieng hi, suklup?” ti’n a dâwng a. 10Chun, a bawn u chun a en kimvel a, chun, zeng kawm achun, “Na khut tung ah,” a ti a. Chun, a tung a, a khut chuh a dam ta a. 11Khutichun, a lung uh ki-ip in a puok kêk vangvang u a, tichun Isu chunga hih dân ding a kidawptuoh tau a.

Sinsak Sawmlenih te Telna

(Mat 10.1-4; Mrk 3.13-19)

12Chun, tihi hi ahi a, Isu chuh a pawtdawk a, paucham dingin tângah a chieh a, Pathien kawmah zankhuo’n a paucham a. 13Khuo a hung vak phetin, a sinsakte chuh a sam khawm a, a lak u a mi sawmlenih a teldawk a, ziete chuh sawlchakte tih a vawh ta a. 14Ziete haw chuh Simon (Peter) a sak leh a suohpih Andrew te; Jakob leh Johan, Philip leh Bartholomai; 15Matthai leh Thoma, Alphai chapa Jakob leh Simon (Zelot a tih u leh) 16Jakob chapa Juda leh a matsakpa Juda Iskariot ahiu hi.

Isu Sinsakna leh Sukdamna

(Mat 4.23-25)

17Isu chuh tâng apat a sawlchakte tawh a hung suk phet u chun, a nungzuite tamtak tawh muncham khat ah a ding a. Judia gamsung cheng apat leh, Jerusalem khuo apat leh, Tura leh Sidon gama tuisuohgiet pang apat mipi tamtak a um u a, 18Ziete haw chuh a thu ngaitha nuom leh a natna teu sukdam sak nuom a hung ahiu hi. Thitha buok in a sawisakte le a hung u a, tichun, a dam zel tau hi. 19Amah apat thilhih theihna pawt in mitin a hihdam zel ziekin, mipi chengcheng chun amah khawih khâk a guo chiet tau hi.

Kipahna leh Chunggikna

(Mat 5.1-12)

20Chun, a dâk dawk a,

a sinsakte chuh a en a, a kawm u ah:

“Nang haw gimtheite haw, na hamphau ui;

Pathien gam chuh nanghaw a ahi ngâl a!

21“Nang haw, tu a gilkielte haw,

na hamphau ui;

Hung tai ding na hi ngâl un!

“Nang haw, tu a kapte haw, na hamphau ui,

hung nui ding na hi ngâl un.

22“Mihiem Chapa zieka mi’n a hun hawt u a, a hun deihloh u a, a hun gaih u a, mi phalo na hi ti a a hun gen tieng u leh mi hampha hung hi ding na hiu ui.#1 Pet 4.14 23Zie tawbang chuh a hungtun tieng leh kipâk unla, lâwpin kichawm un; van ah na kipahman uh a um tam ngâl a. Khutibangmah chun a suonteu inle thiemgaute chungah a na hih sek uh ahi kha.#2 Kh 36.16; Nas 7.52

24“Amahvang chuh, nang haw,

tu a neizote haw, na chunguh a gik hi,

na lungmuon nau chuh na mu ta ngâl u a.

25“Nanguh, tu a vah te haw, na chunguh a gik hi,

hung gilkiel ding na hi ngâl u a.

Nanguh tu a nui te haw na chung uh a gik hi;

lungkham a hung kap ding na hi ngâl u a.

26“Mi chengin a hun pahchak tieng u leh na chunguh gik ina, zie tawbang mah chun a suonteu in thiemgau lêmte chungah a hih sek ui.

Melmate Lungsietna

(Mat 5.28-48; 7.12a)

27“Himahleh, nanguh ka thu ngaite haw, ka hun hilh na hiu hi: Na melmateu chuh hehpih unla, a hun hawte chuh a phatna dinguh hih sak un la; 28a hun hosie te chuh vangphat pieu unla, a hun bawlsie chuh paucham sak un. 29Mi’n na bieng uh a bet chun a lehlam le dawh un; mi’n na puon a hun lâksak chun, na puonâk u le pie ngâl in. 30A ngên cheng kawm achun pieu inla, na sum hun lâksakte chuh ngên kit kiu. 31Chun, mi’n na chunga a hih dinga na deih bang tak chuh mi chung ale hih un.

32“Nanguh hun hehpihte mah na hehpih u hin, kipahman banga na muh dinguh? Mi gilote’n le amau hehpihte chuh a hehpih thuk sek uh a puo. 33Chuleh, na chung u a phate chung maia na phat u hin, kipahman bang zieka mu ding? Mi gilote’n le khutibangmah chun a hih sek uh a puo. 34Muh kit na kinepnateu mai thil na palâk sak u hin, bang ziekin a kipahman na muh dinguh? Mi gilote’n le a zah mah a muh kit dingun mi gilote kawmah a palâk sak sek uh ahi. 35Khutichu hilo in, na melmateu hehpih unla, a phatna dinguh hih unla, bangmah muh kit kinepna hilo in palâk sak un. Khutichun, kipahman tampi nei un na tin, Chungnung pên pa chate hin lau. Amah chuh mi kipahna zie helote chung leh mi gilote chuh a hehpih sek ngâla. 36Zieziekchun, na Pau in mi a lungsiet guolin, mi lungsiet un.

Midang te Awihmawh Thu

(Mat 7.1-5)

37“Awimawh kiu, khutichun, awihmawh in um puo’n lau; mi dangte mawhchansak kiu, khutichun, mawhchansak a um lo ding na hiu. Mi dangte ngaidam un, khutichun ngaihdam in um un lau. 38Pieu inla, tichun, piek in um un lau; thilphal taka pie a, sîtchak a, lawhchâk a, let zut zut in, na khut u ah hun pie’nau. Na tehna ngêi mah un hun teh sak kit ding ahi ngâl u a,” a ti a.

39Chun, Isu’n zie tehkal thu hile a kawm u ah a gen a: “Mitdûk in mitdûk mah a pui thei dinga ahim? Khuti ta leh, a nih un kawkhuk ah kie khawm lo ding maw? 40Sinsak chuh a sinsakpa chungah a um puoi, himahlele, sinsak chun a zilna a zawh tieng leh sinsakpa guolin um ina.

41“Bang zieka nangmah mita thing them lut chuh mu sam lo a, na suohpih mita ninpa neucha um chuh na muh theih a? 42Nangmah mita thing them lut chuh mu sam lo in, na suohpih kawmah, ‘Suohpih, na mita ninpa neucha lut chuh nei lâkdawk sak ah,’ bangti dana na tih theih ding? Nang migukhah, na mita thing them chuh ladawk masa’n la, khutichun, na suohpih mita buok neucha lâkdawk ding chuh kichien takin mu thei inla.

Thing leh a Gah

(Mat 7.16-20; 12.33-35)

43“Thing pha himhim a gah a sie ngei puoh a, thing sie le a gah a pha ngei diek puoi 44Thing chuh a gah in a kihêi. Hamlingnei kung ah theipi a lo ngei puou a, sangakdai kung ah le grep a lo kha diek puou hi. 45Mi pha chun a lunggil go bawm pha apat in thilpha a ladawk sek a; mi gilo chun a lunggil go bawm sie apat in thil sie a ladawk sek hi. Lunggil a dawl val chuh kam in a gen dawk sek ngâl a.

Insatu Nih te

(Mat 7.24-27)

46Chun, nangun ka thu zawp sâm lo a, bang zieka Lalpa, Lalpa, nei tih sek uh a? 47Mitin ka kawma hung a, ka thu za a, zawp ta chuh, kuo tawbang a hih uh hun etsak ing ka: 48In sapa, thuk taka laia, suongpi chunga suong vuih tuok bang chuh ahiu hi; tui ahung lien a, zie In chuh a hun nam a, himahlele, phataka sak a hih ziekin a tawi puoi. 49Amahvang chuh, he a, zawp sam lo chuh, suongvuih loh a leichung maia sapa tawbang chuh ahi; tuilien in a hun nam a, zie In chuh thakhat in a chim pai zieng a, a puk chuh tizat-um tak ahii,” a ti a.

Currently Selected:

LUKE 6: GANGBSI

Highlight

Copy