LUKE 4

Isu Thepa a Umna

(Mat 4.1-11; Mrk 1.12-13)

1Chun, Isu chuh Thagau Thiengtho a dim in, Jordan lui apat chun a kilehkit ta a, tichun, gamthip ah Thagau puih in a um a, 2Tichun, ni sawmli sung chuh Diabol thep in a um ta a. Zie hun sung cheng chun bangmah a ne puoh a, a tâwp chun a gil a hung kiel ta a. 3Khutichun, Diabol chun a kawmah, “Pathien Chapa na hih leh, zie suong hi chângthâk suok dingin thu pie’n,” a ti a. 4Himahlele, Isu’n a dâwng a, “Mihiem hi chângthâk chauh in hing puo’n au tih zik ahi,” a ti a.#Dann 8.3 5Ziephet chun, Diabol chun tângsang tak ah a puito a, mitphetlohkal in khawvel lalgam chengcheng a etsak a. 6“Ziehaw chengcheng chunga thuneihna leh, hauhsakna hi hun pie’ng ka. A bawna hi ka kawma piek a hi ta a, ka nawp taphawtte kawma ka piek sek ahi. 7Khutichun, kei nei ho a a hih chun, ziehaw cheng hi piek hi’n la,” a ti a. 8Isu’n a kawmah, “Lalpa na Pathien ho inla, amah na chauh sem in tih a zik ahi,” ti’n a dâwng a.#Dann 6.13

9Zie zawh chun Diabol chun Jerusalem ah a pui a, Ho-In sipzum ah a kawih a, a kawmah, “Pathien Chapa na hih chun, zie apat hin kie thah. 10‘Nang hun veng dingin Pathien in a vânsâwlchâkte hun sawl intin,#Sam 91.11 11a khut un hun dawm un tin uh tichun, na keng in suong suikha puo’n la,’ tih zik ahi,” a ti a.#Sam 91.12

12Chun, Isu’n a kawmah, “Lalpa na Pathien zedap kih, tih zik ahi,” ti’n a dâwng a.#Dann 6.16

13Khutichun, Diabol chun thepna ding tin chenga a thep zawh phetin, hunlemchang a dingin a taihsan ta a.

Galili Gama A Nasep patna

(Mat 4.12-17; Mrk 1.14-15)

14Tichun, Isu chuh Galili gam ah a kîkkit ta a, Thagau Thiengtho thilhih theihna chuh a chungah a um a. A chanchin chuh zie gam chengcheng achun a kithang suok ta a, 15Kikhawpna In haw achun a sinsak zel a, mi chengcheng pahchak in a um ta a.

Nazareth a Isu Nawlha a Umna

(Mat 13.53-58; Mrk 6.1-6)

16Chun, a seiletna khuo Nazareth chuh a tung a; a hihdan ngeina guolin Chawlhni’n kikhawpna In ah a lut a, Pathien lehkhathu sim dingin a ding dawk a, 17Thiemgau Isai lehkhabu chuh a kawmah a pieu a. Tichun, lehkha ziel chuh a phel a, zie thu kizikna hi a sim a:

18“Liengvaite kawma Chanchin Pha gen dinga nei guot ziekin,

Lalpa Thagau chuh ka chungah a um;

Amah chun salte kawma pawtna thu leh,

Mitdûkte kawma mit vak neih kitna thu gen ding leh,

Sukgimtheih thuokte pawtdawk sakna ding leh,#Isa 61.1-2

19 Lalpa lungkim kum thu gen ding banga ei sawl ahii,” tih hi.

20Chun, Isu’n lehkhabu chuh a ziel kit a, sawlvielpa kawm achun a pie a, chun, a chu ta a, Kikhawpna In a umte chengcheng mit chuh a chungah a chu ta a. 21A kawm u ah, “Zie Pathien lehkhathu na zak u hi tuni hin a hung guitung tai,” a ti a. 22Tichun, a bawn un amah a pakchau a, a kamsuok lungsietna thu haw chuh mak sa ten u a. tichun, “Zie pa hi Joseph chapa hilo ahim?” a tiu a.

23Chun, amah chun a kawm u ah, “Daktor, nangmah kihihdam ah, tih thuching hi hun gen tei un au. Chuleh, Kapernaum khuo a thil kihih na zak hawu hi, nangmah khawpi ngeia le hihin ei hun ti’n lau,” a ti a. 24Chun, amah mah in, “Thiemgau kuomah amah khuo lam ah limbawl in a um ngêi puoi, a ti a. 25Khutichun, diktaka ka hilh na hiu hi, Elijah damlai a kum thum leh tha gup van a bin a, khawvel a kiel nasatak ahung tun khan, Israel gam ah meithai tamtak a um u a;#1 Let 17.1 26Himahlele, alak u a kuomah kawmah Elijah sawl ahi puoh a, Sidon gam lama Sarepta khuo a numei khat meithai kawm maia sawl ahi zaw kha!#1 Let 17.8-16 27Chuleh, thiemgau Elisha hun lai khan le, Israel gam ah phâk tamtak a um u a, himahlele, a lak u ah kuomah hih thientho in a um puou a, Suria mi Naaman kha sukdam in a um zaw ta kha,” a ti a.#2 Let 5.1-14

28Chun, kikhawpna In a mi chengcheng in zie chuh a zak phet un a lungna mah mah tau a. 29Tichun, a kipan u a, khawpi apat chun a sawn dawk u a, a khuou a kâwllêk a sawtthâk dingin a pui tau a. 30Himahlele, amah chuh mipi lak achun a chiehpai a, a chieh zel ta a.

Mi Khat Thithabuok Vawp

(Mrk 1.21-28)

31Chun, Galili gama khawpi khat Kapernaum achun a chieh a, chun Chawlhni’n mipite chuh a sinsak ta a. 32Thunei taka mi a sinsak chuh mak a sa mah mah tau a. 33Chun, kikhawpna In achun thitha buok vawp mi khat a na um a; amah chun ngeih tak in, 34“E! Nazareth Isu, kei u leh nang banga I kizawlnau um? Ei sumangthai dinga hung na him? Nang ka hun hêi: Pathien mi thiengtho na hii,” ti’n ngeih tak in a kiko a. 35Chun, Isu’n a gai a, “Thip inla, a sung apat chuh hung pawt ah,” a ti a. Ziephet chun, thitha chun a masang u chun a hihpuk zet a, bangmah lawh lo in a sung apat chuh a pawt ta a. 36Mipi cheng chun maksa takin, “Ziehi bang thu ahi ta die leh? Thunei tak leh thilhih thei takin thitha buok haw le thu a pie a, a hung pawt tâk u hi,” ti’n a kiho u a. 37Tichun, zie gam cheng achun Isu chanchin kigen chuh a kithang suok ta a.

Isu’n Mipi Tamtak a Sukdamna

(Mat 8.14-17; Mrk 1.29-34)

38Chun, Isu’n kikhawpna In chuh a taihsan a, Simon In ah a lut ta a. Simon zinu nu chuh nasatak in a na khawsik a, tichun a chanchin chuh Isu kawmah a na gen tau a. 39Tichun, a chieh a, a kieng achun a dinga, khawsik chuh a gai a, tichun a hung pha ta a. Tichun, a hung tho dawk a, amau haw chuh a zenviel ta a. 40Chun, nisa tum ding kuon velin, natna chuom chuom a na leh, damlote chuh Isu kawmah a hun pui u a, a bawn u a chung achun a khut a nga a, a hih dam zel ta a. 41Chuleh, thithate’n le, “Pathien Chapa na hii,” ti a kiko in mi tamtak sung apat in a hung pawt tau a. Isu’n thitha haw chuh a gai a, Krista ahi tih a het ziekun a pau dinguh a za nuom puoi.

42Chun, khuo a hung vak phetin a pawt a, mun thip ah a chieh ta a, Mipite chun a hawl u a, amah a muh phet un, amau haw taihsan lo dingin thoh a guou a. 43Himahlele, amah chun a kawm u ah, “Pathien Gam Chanchin Pha chuh khawpi dang ale ka gen ding ahi, zie dinga chuh sawl ka hi ngâl a,” a ti a. 44Khutichun, Galili gama kikhawpna In haw achun thu a gen ta a.

Currently Selected:

LUKE 4: GANGBSI

Highlight

Copy