SOLOMON KEN 8
8
1Oh Naji kütsü mama ayongba künu ama lilasang!
Ni na kimalen angudang, ni ne dang tebang mesepla;
Hau, aser shingaia ni matalatsüi lila.
2Ni na anir ola aser na kütsür kidangi bener arula.
Lai ni sayutsüngila.
Ni ne nem kü jarem süngjang teronem yi jemdaktsüla.
3Pa tabelen teka kü kolak kübok alitsü,
aser pa tajichi tekai kü dak azüittsü.
4Oh Yirusalem jalatem, ni nenok dang melar.
Nenoki pa pela-a maküm tashi temeim tarimeso,
mesüra tesakdaktsü.
Trokbuba Ken
5Pai meimba dak metaloker
arem nungi adokba ya shiba?
Metoklashi süngdong kübok ni na sakdaktsü.
Yangji netsü na asotsü kangshia liasü.
Yangji shibai na aso, la nusotsü kangshia liasü.
6Ne mulungjang nung tajenba ka ama,
ne tepen nung tajenba ka ama nai ni yuang.
Kechiyong tasüba ama temeim tashi tait lir.
Tenükmeremji lep ama taochi maka;
iba yaloktsübaji mi nungi yaloktsüba,
Kibuba milak tesashi adokba lir.
7Tzü jenti agia temeim meremseptet,
mesüra tzümetsüng agi aji metsüngbangtsü makok.
Nisung kati temeim asoshi
pei kidang rongsen ajak agütsüra,
pa khenyongi sensatsütsü.
8Ozü tenu tenüla ka lir,
aser la dak mama maket.
Lai ani asüngba anogo nung onoki tenüla asoshi kechi inyaktsü?
9La jara ka asübo,
onoki la manung taribi mitsa yangerloktsü;
aser la kishi ka asübo onoki cedar süng süngtsük agi angenbangla.
10Ni jara ka, aser kü mama iba mitsatem mesüka lir.
Idangji pa nükdang ni tesünep angur ka ama liasü.
11Baal-hamon nung Solomon tsükmenatzü lu ka liasü.
Tanükertem nem pai tsükmenatzü luji agütsü.
Nisung shiai süngjang asoshiji taribi sen meyi ka ka bener arutsü liasü.
12Kü tsükmenatzü lu, koba kü meyong lir, kü kisüng meyong lir.
Na, Oh, Solomon, meyirijangi agitsü akok,
aser shirnoki süngjang anüker itemji noklang ana agitsü.
13Na atsüki nung alisang,
medemertemi ne ola angashir;
aji kü nem angashidakjang.
14Kara-ang, kü meimba,
aser teronem aliba tenem manung
na mesü tsüla ka mesüra shio chanu ka ama liang.
Currently Selected:
SOLOMON KEN 8: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
