SOLOMON KEN 7
7
Tebursangi Atenba
1Oh Chuba jala, tsüngsem semer,
ne tsüng koda tobur tajung!
Ne tepi teloktep senti lung ama tetangshir teka mapa ama lir.
2Ne tebela temeyoktep yi agi anünga maliba,
marok tenari ka mesük.
Ne tepok, labu naro agi meketa aliba,
tsük nangtenba ka mesüka lir.
3Ne mama anaji,
mesü lameni jakrep mepuba mesüka lir.
4Ne tekong shidi pu mitsa mesüka;
ne tenük Heshbon nung, Bath-rabbim anasa tzübu amaji lir.
Ne teni Damaska tsütsü shia aliba Lebanon mitsa ka mesük.
5Ne dak ne kolakji Karmel tenem mesük,
aser ne kolak nung ne ku nakrema meremba sentsü mesük;
iba ku tekirak nungji chubaji pua lir.
6Na koda tobur ajung aser koda jangratemtsü,
Oh temeimla, temulung pelatsü asoshi!
7Ibai ne sorubangru asangdong mesüka lir,
aser ne mama tsükmenatzü tejeb mesüka lir,
8Ni ashi, Ni asangdong jagi atutsü
ni iba kongsang nung sottsü.
Ne mamaji tsükmenatzü tejep ama,
aser ne tangula menembaji metoklashi mesüka sangma;
9Ne tebang mesepbaji yi tajungtiba mesüka,
koba meilungi oa aneb aneba,
tebangmechi aser tepu manung air.
Mesepa nanga kü bangi yimoka aiba mesük.
Tetsürlai Atenba
10Ni kü meimba meyong lir,
aser pa tejangraba kü tsütsü lir.
11Arung, kü meimba, asenok moapu jagi odi;
aser asenok yimtak mungdi.
12Yakta saker tsükmenatzü lu jagi asenoki odi.
Tsükmenatzü mechizüka ali mali,
aser pa teben punga ali mali;
aser jarem naro punga ali mali asenoki reprangdi.
Yangji ni kü temeim ne nem agütsüdi.
13Mandrake narotemi tesanem yoker,
aser ozü kishi züngdang süngjanglijang tapu ajak
tasen aser tejen, ni na asoshi yuja lir,
Oh kü meimba.
Currently Selected:
SOLOMON KEN 7: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
