SOLOMON KEN 6
6
1Ne meimba koleni oadok,
Oh na tetsür rongnung tajungtila?
Ne den pa tebushi-i asenok aotsüsa.
2Kü meimba par atsüki tesanem menemdaki,
atsüki nung chiyimdaktsütsü aser labu naro apettsü lua lir.
3Ni kü meimba meyong, aser kü meimba kü meyong;
Pai pei san telok labu naro rongnung chiyimdaktsür.
Pungububa Ken: Kiyimla Tobur Ajungba
4Oh kü meimla, na Tirza ama tobur tajung,
Yirusalem ama ajungla,
nisan abenba temeranger telok ama tetsübutsü.
5Kü dak nungi ne tenük meyipadokang,
kechiyong parnoki ni ajemdaktsür.
Ne ku nabong telok ka Gilead tenem, wabetsa nung aliba mesüka lir.
6Ne tepu san tetsü chigudak nungi adoka aliba mesük.
Parnok shia jakrep mepur,
aser parnok rongnung kata tasüba mali.
7Ne tenibung ne temeyiba sü,
kübok jarem jang ka mesüka lir.
8Chubatsür roker, aser tezüngatsü lir-anasü,
aser aiür mezüngdangtet lir.
9Kü guduru, kü tabensala,ka dang lir.
Tetsür nungi la dang lir;
la asola teshimtetlaji la lir.
Jalatemi la angu aser la dang temoatsü ta aja;
hau, chubatsürtem aser tezüngatsütemi,
aser parnoki la asang.
10Anepdang ama repranga yokba ita ama tobur tajung anü ama tejangja,
nisan abenba temeranger telok ka mesüka tetsübutsü ya shiba?
11Lenten nung amak amaka aliba tsükmenatzü temechi adok madok reprangtsü,
jarem naro apung mapung reprangtsü.
Ni süngjang tsüki bushia alu.
12Ni memeteti alidang,
kü nelai kü mulungba nübur,
talungtsü nung ni mendaktsü.
13Meyipang, meyipang, Oh Shulam nunger;
onoki ne dak reprangtsüsa meyipang, meyipang.
Mahanaim tsüngsangba dak reprangba ama,
kechiba nenoki Shulam nunger dak reprangtsü?
Currently Selected:
SOLOMON KEN 6: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
