MARK 9

1Pai parnok dang ashi, “Züngpong ni nenok dang ashir, Tsüngrem Yimli ain nung aruba mangu tashi, yangi noktaka alir rongnung kari tasüba kodaka-ang majurutsü.”

Yisu Sentsü Melenba

(Mat. 17.1-13; Luk. 9.28-36)

2 # 2 Pe. 1.17,18 Anogo troknü lir külen, Yisui Peter, Yakob, aser Yohan tenem talang kati parnok anir atu. Aser parnok madang pa sentsü melenadok. 3Aser pa süoshi alima nung alir shingaia kodanga mesünga meshidokdangba ama kanga mesünga aser sentsüpranga aküm. 4Parnok dangi Elija aser Mosa adok; aser parnoki Yisu den jembia liasü. 5Aser Peteri Yisu dang ashi, “Tesayur, asenok yangi aliba ya junger. Asenoki semtu asem yangludi. Na asoshi ka, Mosa asoshi ka; aser Elija asoshi ka.” 6Kechiyong pai kecha meshitet, kechiaser parnok kanga tsübuseta liasü. 7#Mat. 3.17; Mar. 1.11; Luk. 3.22 Parnok sübanga mepet ka aru aser mepet nungjagi ola ka adoka ashi, “Ibai kü meimba Chir, nenoki pa dang angang.” 8Aser idangyongji parnoki meketa reprang aser parnok den Yisu dak alaka joko tangar shinga mangu.

9Parnok tenem nungi aludang parnoki kechi tenem nung atalokba angu, Nisung Chir tasü nungi shia maru tashi shinga danga teshi ta pai nungtem. 10Tashibaji dang parnoki mamai ayu; aser sür shia aruba tetezüji kechi ta parnok o parnok na jembitep. 11Parnoki pa dang asüngdang, “Kechiba Elija tama arutsüla ta tezülurtemi ashir?” 12Pai parnok dang langzü, “Atangji Elija tama arutsü aser ajak tanaben yanglushitsü; aser Nisung Chir indang ya, pa kanga tuo ashitsü aser mesükshitsü ta kechi koda zülua lir? 13Saka ni nenok dang shidi, Elija aruadokogo, aser zülua aliba ama, parnoki pa dang parnok benshinütsü benshi.”

Suwar Kümdaktsüba Tanela agi Apuba Tanur ka Anebtsüba

(Mat. 17.14-21; Luk. 9.37-43a)

14Kodang parnoki nütsüngtem dangi aru, telok tulu ka parnok meketa aser tezülurtemi parnok den o toktepba parnoki angu. 15Idangyongji telok ajaki pa ngua süngmang, aser pa dangi asema oa salem agütsü. 16Pai parnok dang asüngdang, “Nenoki parnok den kechi asüngdangteper?” 17Aser telok rongnung kati pa dang langzü, “Tesayur, ni ozü chir shiba dak ola madokdaktsüba tanela ia lir, pa ne dangi anir aru; 18kodangsa pa yagi timtemdaktsüdir, pa toktena aitdaktsür aser tebang nungi poja adoker, pai tepu shiteper aser togima akümer. Ni ne nütsüngtem dang ya aridokjang ta asüngdang, saka parnoki makok.” 19Pai parnok dang langzü, “Oh tamang makaba putu, ni nenok den kopiga alitsü? Ni nenok den kopiga aremzüka alitsü? Pa kü dangi anir arung.” 20Parnoki pa Yisu dangi anir aru. Kodang pai Yisu angu, idangyongji tanelai pa kanga ateptena aitdaktsü, aser ali nungji lao aser tebang nungi poja adoka lungzü. 21Yisui tebu dang asüngdang, “Pa dak ya adoker mapang kopiga asütsü” Tebui langzü, “Lanuwa nungi, 22aser aiben iba yagi pa mi o tzü nungsa pa samatsütsü asoshi nungoktsüogo. Saka nai langka inyaktsü kokra, ozü dang aochiang aser yariangma.” 23Yisui pa dang ashi, “Nai kokra ta!” Shibai amanger pa asoshi ajak takoktsü. 24Idangyongji tanur tebu jagi nüktzü yima ayimtena ashi, “Ni amanger, nai ni mamangba asoshi yariangma.” 25Kodang Yisui telok ka asema aruya angu, pai temenen tanelaji arütsü, aser ashi, “Na suwar aser tenarong tajak tanela, ni ne dang ashir, pa dak nungi adokang aser kodanga pa daki tei.” 26Pai asa aser kanga ateptena aitdaktsür adok, aser tanurji tasü ama aküm, anungji aikati pa süogo ta bilem. 27Saka Yisui pa teka nung amer atsümeso, aser pai noktak. 28Pa kodang ki kati aru pa nütsüngtemi kibok nung pa dang asüngdang, “Kechiba onoki aji maridoktet?” 29Aser pai parnok dang ashi, “Yamalaibo sarasadem dak alema kecha agia maridokteter.”

Yisui Pa Asütsü aser Shia Arutsü Indang Tanaben Shinba

(Mat. 17.22-23; Luk. 9.43b-45)

30Parnok idak nungjagi apuso aser Galil ajanga süi, aser pai aji nisung shinga nema memetetdaktsünü; 31kechiyong pai nütsüngtem dang sayua ashi, “Nisung Chir meimchir ket nung bendanga agütsütsü, aser parnoki pa tepsetsü, aser pa kodang tepsetdir, asemnü lir pa shia arutsü.” 32Saka tashiba oji parnoki mangatet, aser pa dang asüngdangtsü parnoki tsübua liasü.

Shiba Tulutiba

(Mat. 18.1-5; Luk. 9.46-48)

33Parnoki Kapernaumi aru. Kodang pa kidang liasü pai parnok dang asüngdang, “Nenoki lenmang nung kechi jembitepba liasü?” 34#Luk. 22.24 Saka parnoki ola madok, kechiyong shiba tulutiba ta parnoki lenmang nungji atitep.

35Pai mener teranaji aja aser pai parnok dang ashi, “Nisung kari tazüngba kümnüra pa ajak dang tilatiba aser ajak tenzüker akümtsüla.” 36Pai tanur ka ajunga arua parnok tiyong nung yutsü, aser pai teka nung tanurji ajunger parnok dang ashi, 37“Kü nüng atema shibai ibala tanur chanu ka agizükdir, pai ni agizüker aser shibai ni agizükdir ni agizüker dang masü, saka shibai ni yok pa agizüker.” #Mat. 10.40; Luk. 10.16; Yoh. 13.20

Shibai Asenok Manemer Pa Asenok Asoshi Lir

(Luk. 9.49-50)

38Yohani pa dang ashi, “Tesayur, nisung kati ne tenüng nung temenen tanelatem aridoktsüba onoki angu, aser onoki pa nemtem, kechiaser pai onok sülen manidak.” 39Saka Yisui ashi, “Pa tenemtem, kechiyong kü tenüng nüng sayatenya inyakeri ano yakta ni majung indang tesülen jembitsü akok.” 40#Mat. 12.30; Luk. 11.23 Kechiyong shibai asenok manemer, pa asenok asoshi lir. 41#Mat. 10.42 Kechiyong nenok Khrista meyong asü nung shibaisa nenok nem tzü marok ka danga jemdaktsüdir, atangji, ni nenok dang ashir, pai pei tajangzük kodaka-ang mesamatsü.

Temenen Asoshi Atitangba

(Mat. 18.9; Luk. 17.1-2)

42“Kü dak amangba item tila rongnung ka danga shibai metsüdaktsüdir, pa asoshi temenüngba lungpak tulu ka tekong nung iloker tzüyim nung pungoka asü tajungba süla. 43Ne ket agi na metsüdaktsüra, aji leptokang; teka ana tener aseptsü makokba molumi-i aodangbo, lemtar taküm daki ai na asoshi tajungba. 44Kong parnok mesen masür, aser molumi kodanga maseper. 45Ne tetsüng agi na metsüdaktsüra, aji leptokang; tetsüng ana tener molumi aodangbo, tetsüng tsüker taküm daki ai na asoshi tajungba. 46Kong parnok mesen masür, aser molumi maseper. 47#Mat. 5.29 Ne tenük agi na metsüdaktsüra, aji aroktokang, tenük ana tener molumi nung puokdangbo, tenük ka tener Tsüngrem Yimli-i ai na asoshi tajungba. 48#Isa. 66.24 Molumi nungji parnok mesen masür, aser molumi kodanga maseper. 49Kechiyong tarongba tenla metsü agi merüktettsüba ama nisung shia mi agi merüktettsü. 50#Mat. 5.13; Luk. 14.34-35 Metsü junger; saka metsü dak tanangji samadokra, nenoki aji kechi agi nangdaktsütsü? Nenok dak metsü lidakjang aser nenok o nenok na putepa liang.”

Currently Selected:

MARK 9: AONAGABSI

Highlight

Copy