MARK 8

Meyi Pezü Chiyungdaktsüba

(Mat. 15.32-39)

1Item anogo nungji tanaben yangji telok tulu ka liasü; aser parnok tachitsü kecha maliasü, aser pai pei nütsüngtemji aja aser parnok dang ashi, 2“Ni telok asoshi aochir kechiaser parnok anogo asemnü kü den munga arudagi saka parnok kecha tachitsü maka; 3aser parnok yaseta pei kidangi ni yokra, parnok lenmang nung lulatsü; aser parnok karbo lenmang talang nungi aru.” 4Pa nütsüngtemi pa dang langzü, “Lisem lima azüngmeyak dak yangi shibai kechi nungi item nisungtem chiyungtsü agi tip temdaktsütsü.” 5Pai parnok dang asüngdang, “Nenok amtsük kwika aka?” Parnoki langzü, “Tenet”. 6Pai telokji ali nung amentsü mela, pai amtsük tenetji am aser temoatsü agütsür aji sangsa-a aser parnok rongnung anganütsü pa nütsüngtem nem agütsü, aser aji parnoki telok rongnung anganü. 7Parnok ket nung ango tila-a tera liasü. Itemji moatsür, anganüang ta ashi. 8Parnoki itemji chir tip atem, aser tanüngba tanük-tari agi molok tenet sünga benden. 9Parnok meyi pezü shi liasü, aser pai parnok yokadok; 10Idangyongji pai pei nütsüngtem den rong kati ai, aser Dalmanutha limai aru.

Temaitsü Ka Meshiba

(Mat. 16.1-4)

11 # Mat. 12.38; Luk. 11.16 Farisitem kar aru aser pa den ashishitepa tokteptsü tenzük. Parnoki pa atitanga kotak nungi temaitsü ka pa dang meshi. 12#Mat. 12.39; Luk. 11.29 Idangji pai pa mulung nung bilema ashi, “Iba putui kechiba temaitsü meshir? Atangji ni nenok dang shidi, iba putu nem temaitsü kecha magütsütsü.” 13Aser pai parnok toktsür rongi ia tanaben tzüküm küleni ao.

Farisitem aser Herod Telok Piyazü

(Mat. 16.5-12)

14Parnoki amtsük abentsü amadok; aser rong nungji parnok den amtsük ka dak alaka kata maliasü. 15#Luk. 12.1 Pai parnok kümdangdakja ashi, “Ajiang, Farisitem aser Herod telok piyazü asoshi nenok kümdangang.” 16Nütsüngtemi parnok o parnok na jembitepa ashi, “Asenok ket nung amtsük maka.” 17Ya meteta Yisui parnok dang ashi, “Nenok mulung merangadoker asü? Amtsük maka ta kechiba jembiteper? Nenoki tang tonga memeteter no, mesüra tangateta mangateter no? 18#Yer. 5.21; Ezk. 12.2; Mar. 4.12 Tenük tener, nenoki mangur no? Aser tenarong tener nenoki mangashir no? Aser nenoki mebilemteter no? 19Ni amtsük pungu agi meyi pungu rongnung sangsadang nenoki tanük-tari molok kwika shiten?” Parnoki pa dang langzü, “Terana.” 20“Meyi pezü rongnung tenet-to sangsadang nenoki tanüktari molok kwika sünga shiten?” Parnoki pa dang langzü, “Tenet” 21Aser pai parnok dang ashi, “Nenoki ano mangateter no?”

Bethsaida Nung Nükpoker Ka Anebtsüba

22Parnoki Bethsaidai aru aser pai kongshia anebtsütsü asoshi parnoki pa dangi nükpoker ka anir arua pa dang mepishi. 23Pai nükpokba teka nung amer yimtak nungi pila-a anir ao, aser pai pa tenük nung metzü nüloktsür, pa teka agi pa dak nemeter pa dang asüngdang, “Nai langka nguali ma?” 24Pai rangshia aji aser langzü, “Ni nisung angur; saka ni parnok süngdong jajar ama angur.” 25Idangji pai tanaben pa ket agi pa tenük nung nemet; pai rangshia reprang aser anebadok; aser pai ajak jangjaa angu. 26Aser pai pa par kidangi yoka ashi, “Yimtaki tanaben meyipa teima.”

Yisu Indang Peteri Nangzükba

(Mat. 16.13-20; Luk. 9.18-21)

27Yisu aser pa nütsüngtem Kaisaria lima nung aliba Filipi-i aru, aser pai lendang pei nütsüngtem dang asüngdang, “Nisungtemi ni shiba-a ta ashir?” 28#Mar. 6.14,15; Luk. 9.7,8 Parnoki pa dang ashi, “Yohan Baptitsüba ta;” kari ashir, “Elia ta,” aser ano tangar kari ashir, “Ainkar rongnung ka.” 29#Yoh. 6.68,69 Pai parnok dang asüngdang, “Saka nenokia ni shiba-a ta ashir?” Peteri pa dang langzü, “Na Khristaji lir.” 30Aser pai pa indang shinga danga teshi ta parnok dang ozüng agütsü.

Yisui Pa Asütsü aser Shia Arutsü Indang Shinba

(Mat. 16.21-28; Luk. 9.22-27)

31Nisung Chir kanga tuo ashitsüla aser tamburtem, puti ungertem tezülurtemi pa sentoktsü, saka anogo asemnü lir pa shia arutsü ta pai parnok dang sayutsü tenzük. 32Pai aji odi odia ashi. Idangji Peteri pa aniena pa arütsütsü tenzük. 33Saka pai meyiper pa nütsüngtem dak ranglok aser Peter arüja ashi, “Kü sülen atsüngzükang, Satan, kechiaser na Tsüngrem tsütsü masü, saka nai nisunger mapa indang bilemer” 34#Mat. 10.38; Luk. 14.27 Pai pa dangi pei nütsüngtem den telok jar parnok dang ashi, “Kari kü sülen arunüra, pai pei sasa azüokang aser pei kangki apur kü sülen anitakang, 35kechiaser shibai pei taküm kümzüknür aji samatsü, aser shibai ni atema aser Osangtajung atema pei taküm samadir aji angutsü. 36Kechiaser nisungi alima ajak ajangzüker, pei taküm samara, kechi ajangzüktsü? 37Mesüra nisungi pei taküm melen kechi agütsütsü? 38Kechiyong iba jabujari aser temenen putu nung, shibai ni aser kü otem atema nüma metanglir, Nisung Chir-a pei Tebu sentsüwangshi nung kotak tenyartem den arudang, pai pa asoshi nüma matangtsü.”

Currently Selected:

MARK 8: AONAGABSI

Highlight

Copy