MARK 7

Tsüraburtem Yimsü-yimbong

(Mat. 15.1-9)

1Yirusalem nungi aruba Farisitem aser tezülur kar pa dangi külemi sentep. 2Idangji Yisu nütsüngtem kar teka memetsüki chi chiyungba parnoki angu, 3(kechiyong Farisitem aser Yihuda nunger ajaki tsüraburtem yimsü-yimbong benshia teka memetsükibo mechiyunger; 4aser kodang shishidak nungi arudir, parnoki tzü mechigubo mechiyunger, aser marok-enrok aser chipo-anpo aser yongmenyin su shitokba yamala yimsüyimbong jenti amshi). 5Farisitem aser tezülurtemi pa dang asüngdang, “Kechiba ne nütsüngtemi yimsüyim-bong nung mejajai teka memetsüki chiyunger?” 6Pai parnok dang ashi, “Nenok anemsübatem indang Isaiai jungjunga shinogo, yamai zülua lir,

‘Iba puri parnok tebang agi ni akhüm tsübur,

saka parnok mulungjang ni nungi talangka pila-a lir.

7 # Isa. 29.13 Parnoki amajok nung ni külemer,

nisunger ozüngtemji tesayubatem ama sayur.’

8Nenoki Tsüngrem ozüng toktsür, aser meimchir yimsü-yimbong benshir.” 9Pai parnok dang ashi, “Nenoki nenok yimsü-yimbong benshitsü asoshi, Tsüngrem ozüng agiena ayur! 10#Ani. 20.12; 21.17; Taz. 5.16; Lev. 20.9 Kechiyong Mosai ashi, ‘Nebu aser netsü akhüm tsübuang, aser shibai tebu mesüra tetsü indang tamajung jembidir, pa atangji asütsü;’ 11Saka nenoki ashi, ‘Oda nisung kati pei tebu aser, tetsü dang ashir, teyari kechi nenoki ni nungi ngula, aji Korban’ (tetezü, Tsüngrem nem kü tenla ama agütsüogo). 12Nenoki joko pa tebu mesüra tetsü asoshi pa nem kecha meinyadaktsür. 13Aji oda nenoki benshia aruba tsüraburtem yimsü ajanga Tsüngrem o amajok kümdaktsür, aser ibala mesükba mapa aika nenoki inyaker.”

Nisung Ka Memerüki Kümdaktsüba

(Mat. 15.10-20)

14Pai tanaben telokji pa dangi jar ashi, “Nenok ajaki kü dang angang aser angatetang; 15Tema nungi nisung daki ia memenendaktsür, saka nisung dak nungi kechi adoker, aji agi nisung menentsür. 16Nisung shiba tangashitsü tenarong tena ali, pai angang.” 17Pai kodang telokti toktsür kidangi ai, pa nütsüngtemi pa dang o-entepba indangji asüngdang. 18Pai parnok dang ashi, “Nenokia yamai mangateter no? Tema nungi nisung daki kechisa air, aji agi nisung menentsütsü makok, aji nenoki meshitet no? 19Kechiaser aji temulungjangi mair, saka tepoki ia, metsü-meshidaki aor.” (Iba jagi chiyungtsü ajak temeshi ta pai sayur). 20Pai ashi, “Nisung dak nungi kechi adoker, aji agi nisung menentsür. 21Kechiyong telunglen, nisung mulungjang nungi, shisatsü tamajung, jabujari, auyaba, nisung tepsetba, 22nüktapangta, merumeruba, jakla tamajung, tekülak, teseplep, tenükmeremba, Tsüngrem atalaba, asüküm, tamaji, 23item tamajung ajak telunglen nungi adoker, aser item yagi nisung menentsür.”

Sirofonikatsür Ka Anebtsüba

(Mat. 15.21-28)

24Pa yang nungjagi apuso aser Tair o Sidon linüki pila ao. Pai ki kati ai aser shinga nema aji memetetdaktsünü, saka pa miima melitet. 25Saka idangyongji tetsür ka shiba jala dak temenen tanela aket, lai Yisu indang angazüka, arua pa tsüngdang apudak. 26Tetsürji Grik tsür, Sirofoinika kin nungi liasü; aser temenen tanelaji la dak nungi aridokjang ta lai pa dang mepishi. 27Saka pai la dang ashi, “Techirtem tamasa tip temdakjangma, kechiyong tanurtem chiyungtsü bena arur azü madang endoktsü tim masü.” 28Lai pa dang ashi, “Atangji, Kibuba, saka langbang tugu nung aliba tanük-taribo azüia achir.” 29Pai la dang ashi, “Iba o ashibayong na oang, temenen tanelaji ne jala dak nungi oadokogo.” 30Lai pei kidangi ao aser aiür chanuji yipten nung mejanga temenen tanelaji oadoker angu.

Tenarong Tajak Nisung Ka Anebtsüba

31Tanaben Tair linük nungi pa meyip aser Sidon lenmangi Dekapoli linük ajanga Galil tzüyim tonga aru. 32Idangji tenarong tajak aser o mejembitetba nisung ka parnoki pa dangi anir aru, aser pa dak teka agi nemetang ta pa dang mepishi.

33Telok nungi pai pa kija dang anien aser nisungba tenarong nungji pa temeyong asenokja; pai metzü metsür, pa temeli nungji kongshi; 34aser anünglen repranga pai nünga pa dang ashi, “Effatha” (tetezü “lapokang”). 35Idangyongjisa pa tenarong lapok aser pa temeli sala, aser pai leptet lepteta jembi. 36Ibai shinga danga teshi ta pai parnok dang sashisashia nemtem, saka pai kodaka sashia ashi, yamaji taliang parnoki ayimsünga prokshi. 37Parnoki kanga süngmanga ashi, “Pai ajak jungjunga inyakogo; pai narongjaker nema angashidaktsür, aser temeli tatsükia jembidaktsür!”

Currently Selected:

MARK 7: AONAGABSI

Highlight

Copy