MARK 6

Yisu Nazaret Nung Magizükba

(Mat. 13.53-58; Yoh. 6.15-21)

1Pa yangnungjagi ao aser pei limai aru; aser pa nütsüngtemi pa sülen anitak. 2Amungnü pai sinagog nung sayutsü tenzük; aser aikati pai sayuba angashia süngmanga ashi, “Nisung yagi item o ya kechi nungi angu? Pa nem agütsüba shisatsüji kechi? Pa ket agi mapa tulutem inyakteter? 3Ya Mari chir, süng mapa inyaksang, aser Yakob, Yose, Yihuda, aser Simon nunger tedito masü no? Aser pa aianutem idaki asenok den melika ma?” Aser parnok pa dak chitaka kümadok. 4Yisui parnok dang ashi, “Pei lima, pei adianu rongnung, aser pei kinungertem dak alaka ainkar kaji mesangi malir.” 5Pai idakji shirangba nisung ishika dak teka agi nemeta anebtsüba dak alaka tesüngmangtsü ain mapa meinyaktet. 6Aser parnoki mamangba ngua pai süngmang.

Terana Tenyaba Mapa

(Mat. 10.1-15; Luk. 9.1-6)

Pai temeket yimtem sema sayutsüngia ao. 7Pai teranaji aja, aser anana yoktsü tenzük, aser parnok nem pai temenen tanelatem madak tashi-ain agütsü, 8aser parnok lenmang asoshi mechi ka alema, amtsük süshia, yangku süshia, parnok sen juli nung sen süshia, kecha mabentsü ashi; 9ano tsüngsem asemtsüla saka süpoksü talila mabentsüla. 10Pai parnok dang ashi, “Koba kidangisa nenok idir, iba yimti metoktsü tashi nenok yangji liang; 11#Luk. 10.4-11; TMa. 13.51 aser kechi nungsa nenok magizüklir, mesüra parnoki nenok osang mangalir, parnok anema kuli asütsü asoshi nenok pila-a aodang nenok tetsüng nungi auyi temtokang.” 12Parnoki ao aser nisungtem ajak temulung meyiptsü asoshi sayutsüngi, 13#Yak. 5.14 aser parnoki temenen tanelatem aika aridoktsü aser shiranger aika dak totzü mezüja anebtsü.

Yohan Baptitsüba Asüba

(Mat. 14.1-12; Luk. 9.7-9)

14 # Mat. 16.14; Mar. 8.28; Luk. 9.19 Herod chubai iba indang angashi, kechiyong Yisu nüngsang ajaklen meteta aküm. Kari ashi, “Yohan baptitsüba tasü nungi shia aruogo; anungji item ain pa dak lia mapa inyaker.” 15Saka tangartemi ashi, “Ibai Elia, aser ano tangari ashi, ainkar rongnung ka ama, ibaia ainkar ka lir.” 16Saka Herodi iba indang angashia ashi, “Yohan shiba ni tekolak atang, pa shia aruogo.” 17#Luk. 3.19,20 Kechiaser Herodi pei sasa nisung yoka Yohan apu, aser pa tenu Filip kinungtsü Herodiala meji nung pai pa tsüngden chiokdak alena ayu; kechiaser pai Herodiala agi. 18Kechiyong Yohani Herod dang ashi, “Nenu kinungtsü na asoshi agitsü tim masü.” 19Herodialai pa anema jashi, aser pa tepsetnü. Saka lai makok, 20kechiyong Herodi Yohanji ochi aser temeshi nisung ta meteta, pa tsübu, aser pa kümzüka ayu. Pai Yohan osang angashidang kanga ratamata-a liaka, pai jembibaji anganüa liasü. 21Saka kodang mapang tetemsü aru Herodi pa tasoba anogo bilemteta amungdang par tongtipurtem o temeranger telok tanishirtem aser Galil nung tazüngpurtem asoshi benjong ka agütsü. 22Kodang Herodiala jala ait aser tsüngsang, lai Herod aser pa den chiyungdak amenertem peladaktsü. Idangji chubai aiürla dang ashi, “Nai kechisa aginür, meshiang, ni ne nem agütsütsü.” 23Pai la dang azüngashi, “Nai kü dang kechisa meshidir, kü yimli tesadang tashia ni agütsütsü.” 24Lai ao aser pei tetsü dang asüngdang, “Ni kechi meshitsü?” Tetsüi ashi, “Yohan baptitsüba kolak.” 25Lai yakta dang chuba dangi meyipa arua ashi, “Yohan baptitsüba kolak su ka nung kü nem tangsa nai agüjang ta ni mepishir.” 26Chubaji kanga dang jashia aküm, saka pai azüngashiba yong, aser chiyungdak amenertem atema, pai la dang ma ta meshitet. 27Idangyongji chubai Yohan kolak bener arutsü temeranger tanüker ka yok. Pai oa tsüngden chiokdak pa tekolak atang, 28aser pa tekolak su ka nung bener arua aiürla nemji agütsü, aser aiürlai aji pei tetsü nem agütsü. 29Kodang Yohan nütsüngtemi iba indang angashi, parnok aru aser pa mang bener oa leper nung ayu.

Meyi Pungu Chiyungdaktsüba

(Mat. 14.13-21; Luk. 9.10-17; Yoh. 6.1-14)

30Tenyartem Yisu dangi külemi sentep, aser parnoki inyakba aser sayuba ajakji pa dang ashi. 31Pai parnok dang ashi, “Tazüngdak tesem kati nenoki arung aser kenpiga anisüngzükang;” kechiaser aika oli aruli ta liasü, aser parnok chiyungtsüa mapang mungutet. 32Anungji parnok rongnung azüngmeyakdak tesem kati ao. 33Saka nisungtem shirnoki parnok oya angu, aikati parnok shitet, yimti ajak nungi aritepa tetsüng agi ajiagi asema ao aser parnok jakdang atong. 34#Zün. 27.17; 1 Ch. 22.17; 2 Pu. 18.16; Ezk. 34.5; Mat. 9.36 Pa adokdang pai telok tulu ka angu, aser pai parnok asoshi aochia bilem, kechiaser parnok sannüker maliba santem ama liasü; aser pai parnok dang tapu meyina indang sayumeso. 35Kanga menua kümer pa nütsüngtem pa dangi arua ashi, “Ya azüngmeyakdak lir, aser kanga menua kümogo; 36parnok langka tachitsü alitsüsa temeket alutem aser yimtem dangi parnok yokadokang.” 37Saka pai parnok pa dang ashi, “Nenoki parnok nem langka tachitsü agüjangma.” Parnoki pa dang ashi, “Onoki oa amtsük sen noklang ana jenjang alir, parnok nem tachitsü agütsütsü asü?” 38Saka pai parnok dang ashi, “Nenok amtsük kwika aka? Oa reprangdangangma.” Parnoki metetteper ashi, “Amtsük pungu, aser ango ana kar.” 39Aser ai manung telok telok küma menang ta pai parnok nem ozüng agütsü. 40Parnok taren taren noklang ka ka aser tenem-tenem amen. 41Pai amtsük pungu aser ango anaji amer, anünglen repranga moatsü, aser amtsükji sangsa, aser parnok madang ayutsü nütsüngtem nem agütsü; aser ango anaji pai parnok rongnung lemsa. 42Parnok ajaki aji achi aser tip atem. 43Parnoki tanük-tari agi molok terana sünga benden aser ango nungia yamaji liasü. 44Aser amtsük achirtemji parnok tebur meyi pungu liasü.

Tzü Manung Jajaba

(Mat. 14.22-23; Luk. 6.15-21)

45Idangyongji pa nütsüngtem rong kati idaktsü aser pa dang tama tzü külen Bethsaidai odaktsü aser pai telokji senshidakja ata-a ali. 46Parnok dang tepila o shir, pai sarasademtsü tenemi atu. 47Aser nikongtsütsü akümdang, rongji tzüyim tiyong nung liasü aser Pa ali takong nung kija liasü. 48Parnok rongitsü kangshir ta pai angu, kechiaser yipru mopungji parnok anema aon; aser anepdang yakta ano mesangwadang Yisui tzüyim ma nung jaja-a parnok tsütsüi aru, aser pai parnok ajateta süia oya liasü. 49Saka parnoki pa tzüyim manung jajabaji ngua, aji temenen tanela ka ta bilem, aser parnoki ayimten, 50kechiaser parnok ajaki pa angu aser tsübuadok. Saka indangji pai parnok den jembi aser ashi, “Tasü itang, Niar, tetsübuma.” 51Aser pai parnok dangi rongjagi ait aser yipru mopungji anenadok, aser parnoki kanga bangkatep, 52kechiaser parnoki amtsük indangbo mangatet, aser parnok mulung merajemi liasü.

Gennesaret Nung Shiranger Aika Anebtsüba

(Mat. 14.34-36)

53Kodang parnoki tzüyim ajanga oa Gennesaret atong, parnok tzüyimkhüm nung anen. 54Kodang parnok rong nungi adok, idang yongjisa nisungtemi pa ajitetadok, 55aser iba temeket ajak nungi asemtepa, pa kechi nung liasü ta parnoki angazük, ajagi shiranger nisungtem yipten nung parnoki bener arutsü tenzük. 56Aser yimtsüngtem, yimtitem mesüra, alutem, kongisa pa ait parnoki shirangertem shishidak yur, pa sütsüng nung danga kongshitsü pa dang mepishi aser kwikati pa dak kongshi parnok ajak aneb.

Currently Selected:

MARK 6: AONAGABSI

Highlight

Copy