MARK 5

Gerasin Nung Temenen Tanela Agi Apuba Nisung ka Anebtsüba

(Mat. 8.28-34; Luk. 8.26-39)

1Parnoki tzüyim külen Gerasin linüki aru. 2Pa kodang rong nungi adok, temenen tanela aliba nisung ka leprungki nungi adoka pa den ajurutep. 3Iba nisung leprungkitem nungji ali, aser shingaia, oda merangsen agia pa malentet, 4kechiyong pa aiben yin tsüngden o merang agi alenaka, pai merangsen toksa aser yin tsüngden akosa, aser pa azüoktsü shinga daka tashi maliasü. 5Teti, mangli sangwali, pai leprungkitem aser tenemtem nung asatena aser pei sasa lung agi ranga liasü. 6Oji nungi Yisu ngua, pai asema arua pa madang apudak, 7aser ola tulu agi ayimtena ashi, “Yisu, Na Tematiba Tsüngrem Chir, Na kü den kechi teinyaktsü aka? Ni tekangshi ta ni ne dang Tsüngrem tenüng nung mepishir.” 8Kechiyong pai pa dang ashi, “temenen tanela, nisungba dak nungjagi adokang,” 9Pai pa dang asüngdang, “Ne tenüng shiba?” Pai pa dang langzü, “Kü tenüng Legion#5.9: Legion: Tetezü nisung Meyi Trok shi dang ajar. kechiaser onok aika lir.” 10Aser parnok iba linük nungi taridok ta pai pa dang mepishi. 11Idakji tenem tezülen ak lokti tulu ka chiyima liasü; 12aser parnoki pa dang mepishi, “Onok ak lokti dangi yokang, aser onok parnok daki idakjangma.” 13Anungji pai parnok odaktsü. Aser temenen tanelatem adok, aser aktem daki ai; aser ak loktiji meyi ana shi liasü, parnok lungbangi asemjena tzüyimi alu, aser parnok tzüyim nungji arakset. 14Idangji ak pokyimertem ajen aser yimti o yimtsüng aika nung osangji sangoktsü. Aser kechi atalok aji reprangtsü nisungtem aru. 15Parnoki Yisu dangi aru aser shiba dak temenen tanela jenti liasü paji sü abener, nüji mulungjang tener mena aliba parnoki angu; aser parnok tsübua aküm. 16Temenen tanela aketba nisung dak aser aktem dak kechi atalok aji angurtemi parnok dang ashi. 17Aser parnoki Yisu parnok lima temeket nungi aotsü mepishi. 18Pa rongi ia alidang, temenen tanelatem keta alisang jagi pa den aotsü mepishi. 19Saka pai pa dang memela, saka pai pa dang ashi, “Ner kinungertem dangi kidangi oang, aser Kibubai na asoshi kechi mapa inyakogo aser ne dang aochiogo, iba indang parnok dang shiang.” 20Aser pai aenshia ao aser Yisui pa asoshi kechi inyak, aji Dekapoli nung sangoktsütsü tenzük; aser nisung ajaki süngmang.

Yaira Jala aser Tetsür Shibai Yisu Sü nung Kongshi

(Mat. 9.18-26; Luk. 8.40-56)

21Kodang Yisui tanaben tzüküm külen jagi rong nung ao, telok tulu külemi sentep; aser pa tzüyim anasa liasü. 22Idangji sinagog madak yimsüsür rongnung ka, tenüng agi Jaira aru, aser pa ngua, pa tsüngdang apudak, 23aser pa dang kanga mepishia ashi, “Kü jala tasür dang lir; la junga kümer taküm alitsüsa, na arua teka agi nemetang.” 24Aser pai pa den ao. Telok jenti pa sülen anitak aser parnoki pa nungbang. 25Idakji tetsür ka azü aoba tashitak agi küm terana tashi timtem lia arunung, 26mozü shiteter jenti nungi tekangshi jenti ngua la akaba ajak lalu. Lai kecha majangzük, saka tamajungba dang aküm. 27Yisu indang o angazüka, telok nungji lai tezülen nungi arua, pa süoshi nungji kongshi; 28Kechiyong lai bilem; “Ni pa süoshi nung danga kongshira, ni ajungtsü.” 29Idangyongjisa la azü aoba anenadok, aser tashitak nungi la anebogo ta lai pei mang nung metet. 30Idangji Yisui pa dak nungi ain tuguogo ta pei sasa meteta telok rongnung meyipa ashi, “Shibai kü süoshi nung kongshi?” 31Pa nütsüngtemi pa dang ashi, “Telokti-i na nungbanga aruba nai angur nung ano nai ashir, ‘Shibai kü dak kongshi?’ ” 32Shibai ya inyak aji metettsü pai meketa reprang. 33Saka tetsürlaji tsübuseta aser atentena, la dak kechi atalok, aji meteta lai aru aser pa tsüngdang apudak, aser pa dang ajak shitak ashi. 34Pai la dang ashi, “Tenü, ne tamang agi na junga kümogo, tesünep nung oang, aser ne tashitak nungi junga liang.” 35Pai jembia alidang, sinagog yimsüsür nungi kar arua ashi, “Ne jala süogo. Joko nai Tesayur timtetemdaktsü.” 36Saka parnoki ashiba oji Yisui mangashi aser sinagog nung yimsüsürsang dangji ashi, “Tetsübu, tamang dang amangang.” 37Pai Peter, Yakob, aser Yakob tenu Yohan dak alema nisung shinga pa sülen anidaktsü memela. 38Kodang sinagog nung yimsüsür kidangi parnok aru, rongrongshishi aser mangyimba pai angu. 39Pa aita parnok dang ashi, “Kechiba nenoki asateper aser ajeber? Tanurji masü, saka mejanger dang.” 40Parnoki pa menütsü. Saka pai parnok ajak meindoker, tanur tebu tetsü aser pa den alibatem anir tanur alidaki ai. 41Aiür chanu teka nungji amer pai la dang ashi, “Talitha koumi!”#5.41: Aram oshi. tetezü, “Aiür chanu, shishiang.” 42Idangyongji aiürlaji shishi aser jaja, kechiyong la küm terana tain liasü. Idangji parnok kanga süngmanga aküm. 43Ya shinga danga temetetdaktsü ta pai parnok dang kanga sashia ashi; aser la nem langka tachitsü agüjang ta pai parnok dang ashi.

Currently Selected:

MARK 5: AONAGABSI

Highlight

Copy