MARK 10

Balaba Indang Tesayuba

(Mat. 19.1-12; Luk. 16.18)

1Pai idak nungjagi apusor Yihuda linük aser Yordan küleni aru, aser tanaben pa dangi teloktem senten; aser pa yimsü amato, pai parnok dang tanaben sayu. 2Farisitem pa dangi arua “Kinungpui pei kinungtsü balatsü tim asü” ta pa atitanga asüngdang. 3Pai parnok dang langzü, “Mosai nenok dang kechi mela?” 4#Taz. 24.1-4; Mat. 5.31 Parnoki ashi, “Tepalaba kulizüng ka zülua agütsütsü aser palatsü akok ta Mosai mela.” 5Saka Yisui parnok dang ashi, “Nenok temulung merangba yong pai nenok nem iba ozüng zülua agütsü. 6#Lip. 1.27; 5.2 Saka alipok dang nungi pai parnok apuani yanglu. 7Ibayongji tebur kati pei tebu aser tetsü toktsür aser pei kinungtsü den sentepa alir. 8Aser tenaji shi ka dang akümtsü; joko parnok ana masü, saka ka dang lir. 9Anungji Tsüngremi kechi lungjemdaktsü, aji nisungi tepiladaktsü.” 10Kodang pa nütsüngtemi pa dang iba indang asüngdanga liasü, 11#Mat. 5.32; 1 Ko. 7.10 Pai parnok dang ashi, “Shibaisa pei kinungtsü pala-a yoker, tangar agidir, pai la anema nüktapangta benshir, 12aser lai pei kinungpu palar tangar kiyi-i ora, lai pa anema nüktapangtar.”

Yisui Tila-tanurtem Moatsüba

(Mat. 19.13-15; Luk. 18.15-17)

13Pa nem kongshidaktsütsü asoshi Yisu dangi parnoki tila-tanurtem anir aru, saka nütsüngtemi parnok arütsü. 14Saka Yisui aji angudang jashia parnok dang ashi, “Tila tanurtem kü dangi arudakjang; parnok tesongtem, kechiyong Tsüngrem Yimli ibala meyong. 15Atangji ni nenok dang ashir, shibaisa tila-tanur ka ama Tsüngrem Yimli magizüklir, pai kodaka-ang aji agi maitsü.” 16Aji sür pai parnok ajunga arur, parnok dak teka agi nemeta moatsü.

Takar Asangur Ka

(Mat. 19.16-30; Luk. 18.18-30)

17Pa lenmang jagi adoker oya alidang nisung ka pa dangi asema aru aser apudaka pa dang asüngdang, “Tesayur tajung, teti tatem maka senmang angutsü asoshi ni kechi inyaktsü?” 18Saka Yisui pa dang ashi, “Kechiba nai kü dang tajung ta ajar? Tsüngrem dak alema shinga tajung mali. 19#Ani. 20.12; Taz. 5.16 Nai ozüngtem metet, ‘tetepset, nüktapangta tebenshi, tauya, tiyazü kuli teyi, merumerua tagizük, nebu aser netsü akhüm tsübuang.’ ”

20Aser pai pa dang ashi, “Tesayur, item ajak ni lanuwa nungi benshia aru.” 21Yisui pa dak reprang aser pa meima bilem aser ashi, “Na langka kati madoksa, oang, na kechisa aka aji yokang aser sensaker nem lema agüjang, aser na kotak nung rongsen akatsü; aser arung, kü sülen anitakang.” 22Iba o yagi pa jashia aküm, aser mepelai oadok, kechiyong pa rongsen jenti akaba nisung ka liasü.

23Aser Yisui meketa repranger pei nütsüngtem dang ashi, “Takari Tsüngrem Yimli-i aitsü koda tasak!” 24Pa o angashia pa nütsüngtemi süngmang. Saka Yisui tanaben parnok dang langzü, “Tebusangtem, Tsüngrem Yimli-i aitsü koda tasak! 25Takari Tsüngrem Yimli-i aitsü dang nungibo ajem-ki ateta ut aotsü temelaba.” 26Idangji parnoki kanga süngmanga parnok rongnung jembitep, “Ajangla shiba-ang kümzüktsü?” 27Yisui parnok dak reprang aser ashi, “Meimchir asoshibo ya tamakoktsü, saka Tsüngrem asoshibo aji oda masü, kechiyong Tsüngrem tsüngdangbo ajak takoktsü lir.” 28Peteri pa dang ashitsü tenzük, “Ajiang, Onoki ajak toktsür ne sülen anitak.” 29Yisui ashi, “Atangji ni nenok dang ashir, Shibaisa ki süshia, aianu süshia, tebu süshia, tetsü süshia, kinungtsü süshia, adianu süshia, chirnur süshia, lim süshia, ni aser Osangtajung atema toktsüogo, 30pai tang iba mapang nung noklang bena, kitem, chirnurtem, adianutem, tetsütem, tebutem, alutem aser ano rishikangshi dena angutsü, saka tarutsü mapang nung teti tatem maka taküm angutsü. 31#Mat. 20.16; Luk. 13.30 Saka tamapur aika tesüpur akümtsü aser tesüpur tama akümtsü.”

Yisui Pa Asütsü indang Tasemben Shinba

(Mat. 20.17-19; Luk. 18.31-34)

32Yirusalemi atuba lenmangi parnok tuya liasü, aser Yisu parnok dang tama oya liasü; aser parnok süngmangadok, aser tanitakertemi tsübu. Pai tanaben teranaji aniten, aser pa dangi tarutsü aliba mapatem indang parnok dang ashitsü tenzük: 33“Ajiang, asenok Yirusalemi atur aser Nisung Chir putiungertem aser tezülurtem nem bendanga agütsütsü; aser parnoki pa tepsetsü asoshi aitsütsü aser bendanger ket nung bendang agütsütsü. 34Parnoki pa sensatsütsü, pa dak metsü metsüloktsütsü, pa dak azüktsü aser tepsettsü; saka asemnü lir pa shia arutsü.”

Yakob o Yohan na Temepishiba

(Mat. 20.20-28)

35Zebedi chirtem Yakob o Yohan na, pa dangi arua ashi, “Tesayur, onoki ne dang kechisa asüngdangdir, nai onok asoshi inyakdaktsünür,” 36Pai parnok dang langzü, “Nenoki nenok asoshi kü nem kechi inyakdaktsünür?” 37Parnoki pa dang ashi, “Ne sentsüwangshi nung, küna ne tajichilen ka aser tabelen ka ta amentsü onok dang melang.” 38#Luk. 12.50 Saka Yisui parnok dang ashi, “Nenoki kechi meshir, aji nenoki memetet. Ni koba marok nung jemdir, iba marok nungji nenoki jemtetdi ma? Mesüra ni kechi agi baptia lir, iba jagi nenoki baptitetdi ma?” 39Aser parnoki pa dang langzü, “Onoki koker” Saka Yisui parnok dang ashi, “Ni koba marok nung jemdir, aji nenokia jemtettsü, aser baptiba koba agi ni baptir, iba nung baptitsü akok, 40saka tajichilen mesüra tabelen amentsü, aji ni nenok nem agütsütsü masü; saka aji shir atema renem parnok asoshi lir.” 41Kodang ter jagi aji angashi, parnoki Yakob o Yohan na dang jashitsü tenzük. 42#Luk. 22.25,26 Idangji Yisui parnok pa dangi aja aser ashi, “Shirnoki Bendangertem madak yimsü asür ta bilemer parnok madak ang kibur südaktsür, aser par tulurtemi parnok madak tashi-ain amshidaktsür aji nenoki meteta lir. 43#Mat. 23.11; Mar. 9.35; Luk. 22.26Saka nenok rongnungbo yamaji malitsü; saka nenok rongnung shibai tulu kümnür, pa nenok tenzüker asütsü, 44aser nenok rongnung shibai mezüngbuba kümnür, pa ajak lar asütsü. 45Kechiyong atangji Nisung Chir-a sünga pei tenzükdaktsütsü atema masü, saka tenzüktsü aser aika alang pei taküm agütsütsü aru.”

Nükpoker Bartima Anebtsüba

(Mat. 20.29-34; Luk. 18.35-43)

46Parnoki Yerikoi aru. Pai nütsüng tem aser telok tulu ka den Yeriko nungi pai aenshia aodang, Timia chir, Bartima, nükpoker meshimetsür ka, lenmang tezülen mena liasü. 47Kodang pai paji Nazaret nunger Yisu ta angashi, pai ayimtentsü tenzük aser pai ashi, “Dawid Chir Yisu, kü dang aochiangma!” 48“Mokorai liang” ta aikati pa arütsü; saka taliang ayimtena pai ashi, “Dawid Chir, kü dang aochiangma!” 49Yisui noktak aser ashi, “Nenoki pa ja-ang.” Aser parnoki nükpokba ja-a ashi, “Tasü itang, aramesoang, pai na ajar.” 50Pai pa sü amungdoker, pungmeso aser Yisu dangi aru. 51Aser Yisui pa dang langzüa ashi, “Ni na asoshi kechi inyakdaktsünür?” Nükpokbai pa dang ashi, “Tesayur, ni ngunür,” 52Yisui pa dang ashi, “Oang, ne tamang agi na anebogo.” Aser idangyongjisa pa tenük junga aküm, aser lenmang nungji pa sülen anitak.

Currently Selected:

MARK 10: AONAGABSI

Highlight

Copy