MARK 11

Yirusalemi Takok Ngua Aiba

(Mat. 21.1-11; Luk. 19.28-40; Yoh. 12.12-19)

1Kodang Parnoki Yirusalem anasai aru, Oliv tenem jakdang Bethfage aser Bethani nung, pai pei nütsüng rongnungi ana yoka, 2parnok dang ashi, “Nenok jakdang aliba yim jagi oang, aser nenok ajagi aidang nisungi kodanga memendangba gado chanu ka idakji sentaka angutsü; aji sala-ang aser anir arung.” 3“Kechiba nenoki ya inyaker” ta kari nenok dang asüngdangra, yamai langzüang, “Kibuba asoshi ya nüngdaker, aser pai yaktasa aji yagi meyipa anir yoktsü.” 4Parnoki ao aser kima yimdong nung, kishi tezülen, gado chanu ka sentaka angu; aser parnoki aji sala. 5Idakji noktaka alir kari parnok dang asüngdang, “Nenoki kechiba gado chanuji salar?” 6Parnoki Yisui ashiba amaji parnok dang langzü; aser parnoki parnok odaktsü. 7Parnoki gado chanuji Yisu dangi anir aru, aser parnok sü iba manungji lemloktsü aser pai idakji amen. 8Nisung aikati pei sü lenmang nungji lemtsü, kari süngojong arem nungi lepzüka bener arua lemtsü, 9#TKe. 118.25 aser tejaklen aortem aser tesülen anitakertem ajaki ayimtena ashi,

“Hosanna! Tsüngrem tenüng nung shiba arur sangang!

10Asen tebu Dawid yimli koba arur, sangang.

Tematiba nung Tsüngrem sangang!”

11Pai Yirusalemi arua tenla kidangi ai; aser ajak meketa repranger nikongtsütsü asünung terana den Bethani-i ao.

Tejang Matangba Mungudong

(Mat. 21.18-19)

12Asüngji kodang parnok Bethani nungi aru, pa yaadok. 13Aser mungudong ka to keter talang nung oagi ngua, idakji pai langka ngudisü ta aru. Kodang pa ajagi aru, süngo dak alema pai kecha mangu, kechiyong aji mungu atangwa masü. 14Idangji pai mungudong dang ashi, “Tang nungi teti shingaia ne dak nungi süngjang machitsü.” Aser pa nütsüngtemi aji angashi.

Tenla Ki Meshitetba

(Mat. 21.12-17; Luk. 19.45-48; Yoh. 2.13-22)

15Parnok Yirusalemi aru aser pai tenla kidangi ai aser tayokertem o talirtem tenla kidang nungi arizüka yoktsü tenzük; sen melenertem langbang aser guduru ayokertem menden mekeptoktsü, 16aser tenla ki ajanga oset abentsü pai memela. 17#Isa. 56.7; Yer. 7.11 Pai parnok dang sayua ashi, “Kin ajak asoshi kü kiji sarasademba ki ta ajatsü ta zülua melika ma? Saka nenoki aji rakzükraktemer leprungki kümdaktsüogo!” 18Puti-ungertem o tezülurtemi ya angashia pa samatsütsü bushimeso. Saka parnoki pa tsübu, kechiyong telok ajaki pai sayuba nung süngmang. 19Kodang nikongtsütsü aru, Yisu aser pa nütsüngtem yimti nungjagi pila ao.

Azüla-a Aoba Mungudong Nungi Tangazüktsü

(Mat. 21.20-22)

20Anepdang parnok süidang, mungudongji toa dena azülar parnoki angu. 21Peteri bilemtet aser Yisu dang ashi, “Tesayur, ajiangjo, nai atakatemba mungudong to aruzükogo” 22Yisui parnok dang langzü, “Nenoki Tsüngrem dak tamang ka-ang; 23#Mat. 17.20; 1 Ko. 13.2 atangji ni nenok dang ashir, kari iba tenem dang, ‘ajungketang aser tzüyim nungji ajungokang’ ta shidir, aser temulung nung matitaki amangdir, pa dang yamaji inyaktsü. 24Anungji ni nenok dang ashir, kechi asoshisa nenoki sarasademdir aser meshidir, nenoki itemji nguogo ta amangang aser nenoki itemji angutsü. 25#Mat. 6.14 Aser kodangsa nenoki noktaka sarasademdir, kari ne madang aia kara tai tokang; anungji nenok Tebu shiba kotak nung lir paia nenok dang nenok tai atoktsü. 26Saka nenoki tai metokra, nenok Tebu shiba kotak nung lir paia nenok taitem matoktsü.”

Yisu Tashi-ain Indang Asüngdangba

(Mat. 21.23-27; Luk. 20.1-8)

27Aser parnoki Yirusalemi tanaben aru. Yisu tenla kidang senzüya alidang, puti-ungertem o tezülurtem aser tamburtem pa dangi aru, 28aser parnoki pa dang ashi, “Kechi tashi-ain agi nai itemi inyaker, mesüra itemi inyaktsü tashi-ain shibai ne nem agütsü?” 29Yisui parnok dang langzü, “Nia nenok dang langka asüngdangdi: kü dang langzüang, aser kechi tashi-ain agi ni item inyaker nenok dang shidi: 30Yohan baptitsüba kotak nungi asü mesüra meimchir nungi? Kü dang langzüang.” 31Parnoki parnok rongnung ashishitepa jembitep,“kotak nungi ta asenoki shira, ‘kechiba nenoki pa dak mamanger’ ta pai ashitsü.” 32Aser meimchir nungi ta shira parnoki nüburtem tsübu, kechiyong ajaki Yohanji chichiba ainkar ka ta bilem. 33Anungji parnoki Yisu dang langzü, “Onoki meshitet.” Anungji Yisui parnok dang ashi, “Sürabang, kechi tashi-ain agi ni itemi inyaker nia nenok dang meshili.”

Currently Selected:

MARK 11: AONAGABSI

Highlight

Copy