MATHI 8
8
Zütsüra Aketer Ka Meshitettsüba
(Mar. 1.40-45; Luk. 5.12-16)
1Kodang Yisu tenem nungjagi alu, telok jenti pa sülen anitak. 2Aser ajiang, zütsüra aketba nisung ka pa dangi arua apudaka ashi, “Kibuba, nai mulungra nai ni merüka kümtsütet.” 3Yisui pa teka songtok aser pa dak kongshia ashi, “Ni mulunger; na meshitetang.” Idangyongjisa pa zütsüra nungi meshiteta aküm. 4#Lev. 14.1-32 Yisui pa dang ashi, “Nai ya shinga danga teshi, saka oang aser nesasa putir dang sayuang; aser na anepba kuli asütsü asoshi parnok dang Mosai melaba ama tenla agüjang.”
Noklang Madak Tanishir Kilir Anebtsüba
(Luk. 7.1-10)
5Kodang Yisu Kapernaumi ait noklang madak tanishir ka pa dangi arua mepishia ashi, 6“Kibuba, kü kilir togimra agi shiranga aser kanga kangshia, kidang ontaka lir.” 7Yisui pa dang ashi, “Ni arur pa anebtsütsü.” 8Noklang madak tanishibai langzü, “Kibuba, na kü kilempoki aittsü ni metemsü, saka oji dang shiokang, aser kü kilir aneba adoktsü. 9Kechiaser nia bangdak kübok aliba nisung ka lir, aser kü kübok temerangertem lir. Ni pa dang ashir, oang, aser pai aor; aser tangar ka dang ashir, arung, aser pai arur; aser kü kilir dang ashir, ya inyakang, aser pai aji inyaker” 10Kodang Yisui ya angashi, pai süngmang aser pai tanitakertem dangji ashi, “Ni nenok dang züngpong shidi, iba ama tamang tulu Israel rongnung ni kecha nunga munguka. 11Ni nenok dang ashir, anüdoklen aser anüolen nungi aika arutsü aser Abraham, Isak aser Yakob den kotak yimli nung parnoki amentsü. 12Saka Yimli senmang amangtsü purtemjibo tezülen tammang nungji enoktsü; yangji tajepba aser tepu shitepba alitsü.” 13Yisui noklang madak tanishiba dangji ashi, “Kidangi oang, nai amangba ama, aji na asoshi inyaktsü”. Aser kilirji iba mapang nungji anebadok.
Yisui Nisung Aika Anebtsüba
(Mar. 1.29-34; Luk. 4.38-41)
14Kodang Yisu Peter-er kidangi aru, pai Peter kinungtsü tetsü ramen agi shiranga angu. 15Yisui la teka nung amet aser ramen jagi la toktsü; aser lai shishir Yisu nem awazüa agütsü. 16Kodang nikongtsütsü aküm, parnoki pa dangi temenen tanelatem agi apuba nisung aika anir aru; aser Yisui temenen tanelatemji o ka agi aridok, aser shirangertem ajak pai anebtsü. 17Ibai Isaia ainkari jembiba o ya ataloktsü asoshi liasü; “Pai asen mokokmintem bener oadok aser asen tashitaktem anebtsü.”
Yisu Sülen Anitaktsüpurtem
(Luk. 9.57-62)
18Kodang Yisui pa meketa telok jenti angu, pai tzüyim külen jagi aotsü ozüng agütsü. 19Aser tezülur kati arua pa dang ashi, “Kibuba, na kolenisa odir ni ne sülen anitaktsü.” 20Yisui pa dang ashi, “Shirongtem lungki kar, aser anüng ozütem tesep kar; saka nisung Chir tekolak atalokdak maka.” 21Aser nütsüng rongnung tangar kati pa dang ashi, “Kibuba, ni tamasa or kübu aremtsü melaangma.” 22Saka Yisui pa dang ashi, “Kü sülen anitakang, aser tasürtemi pei tasür aremtsü tokjang.”
Yisui Tzüsem Süngjemdaktsüba
(Mar. 4.35-41; Luk. 8.22-25)
23Kodang Yisu rong kati ai, nütsüngtemi pa sülen anitak. 24Aser ajiang, tzüyim nungji tzüsem ka adoka rongji mobangya liasü, saka Yisubo ayipjanga mejanga liasü. 25Nütsüngtemi Yisu dangi arua pa mesoa ashi, “Kibuba, onok kümzükang; onok tesamar!” 26Yisui parnok dang ashi, “Kechiba nenoki tsübur; Oh nenok tamang tila akartem?” Idangji pai shishi aser mopung o tzüsemji arütsü, aser tesüngjem tulu liasü. 27Aser nisungtemi süngmanga ashi, “Mopung aser tzüsemia tashi angatsüba ya kechi amala nisung ka?”
Gadara Nung Temenen Tanela Agi Apuba Nisung Ana Yisui Anebtsüba
(Mar. 1.5-20; Luk. 8.26-39)
28Yisui Gadara linük tzüyim külen jagi arudang, temenen tanelai apuba nisung ana leper nungi adoker pa den ajurutep. Parnok kanga tesashi asünung nisung shingaia iba lenmang jagi mesüitet. 29Aser ajiang, parnoki ayimtena ashi, “Na onok den kechi inyaktsü aka? Oh na Tsüngrem Chir? Mapang matongdang onok kangshitsü yagi aru no?” 30Tang parnok nungi tatsüka pila or ak lokti ka chiyimya liasü. 31Temenen tanelatem jagi Yisu dang mepishia ashi, “Nai onok aridokra onok ak lokti dakji idakjangma.” 32Yisui parnok dang ashi, “Oang.” Anungji parnok adok aser ak lokti dak jagi ai. Tang ak lokti ajongaji tzüyimküm lungren jagi asemjena alu aser tzü nung arakset. 33Idangji parnok pokyimertem ajen aser yimti jagi ao. Idakji parnoki tatalokba ajak indang aser talisa temenen tanelatem agi apuba indangji sangoktsü. 34Aser ajiang, yimer ajaki Yisu den ajuruteptsü adok, aser kodang parnoki pa ajuru, parnoki pa arrtsü nungi yakta oadokang ta Yisu dang mepishi.
Currently Selected:
MATHI 8: AONAGABSI
Highlight
Share
Copy
Want to have your highlights saved across all your devices? Sign up or sign in
Ao Naga C.L. Bible
© Bible Society of India, 2004.
Used by permission. All rights reserved worldwide.
