MATHI 7

Tangar O Bendangba Indang

(Luk. 6.37-38,41-42)

1“Nenok anema o mebendangtsüsa nenoki o tebendang. 2#Mar. 4.24 Kechiaser kechi obendangba agi nenoki o bendangdir nenoka yamaji o bendangtsü, aser kechi touzükba agi nenoki ozüktsüdir iba kasa nenok nema ozüktsütsü. 3Kechiba nai pei tenük nung aliba anak tuluji mungui yur ne adianu tenük nung aliba anak tilaji ajir? 4Mesüra ne tenük nung anak yur, ‘ni ne tenük nungi anak endoktsüdi’ ta nai ne adianu dang koda ashitsü? 5Anemsüba, na pei tenük nungi tamasa anakji agiteta endokang, aser idangji ne adianu tenük nungi anakji endoktsütsü nai akoktsü. 6Kechi temeshi lir aji azütem nem tagütsü, aser aktem matsüngdang nenok berem teyutsü, ashiko itemji parnoki tetsüng kübok ajemshitsü aser meyiper nenok shisatsütsü.

Meshiang, Bushiang, Akoshiang

(Luk. 11.9-13)

7“Meshiang, aser aji nenok nem agütsütsü, bushiang, aser nenoki angutsü, akoshiang, aser aji nenok nem lapoktsütsü. 8Kechiaser temeshir shiai angur aser shibai bushir pai angur, aser shibai akoshir pa nem aji lapoktsütsü. 9Mesüra pei jabasoi amtsük ka meshi nung, pa nem lung ka agütsütsü; 10mesüra pai ango ka meshi nung, pa nem per ka agütsütsü, nenok rongnung nisung shiba lir? 11Ajangla nenok mejungia nenok chir nem sempet tajung agütsütsü nenoki metetra, kotak nung aliba nenok Tebui pa dang meimertem nem oset tajung koda tali magütsütsü? 12#Luk. 6.31 Anungji nisungtemi nenok nem kechisa inyakdaktsünür, yamaji nenokia parnok dang inyakang; kechiaser ozüng aser ainkar o ibai lir.

Süngkhümbong Temesüba

(Luk. 13.24)

13“Süngkhümbong temesüba jagi iang, kechiaser tesamadaki aniba süngkhümbongji sademsademer aser lenmangji temela aser iba lenmang jagi air aika dang. 14Saka taküm leni aniba süngkhümbongji temesü aser lenmangji tasak aser aji agi iteter ishika dang.

Pei Süngjang agi Süngdongji Meteter

(Luk. 6.43-44)

15“Tiyazü ainkartem, shiri nenok dangi san sobutsü sobur arur, saka telunglen tesashi tsünü lir, parnok asoshi kümdangang, 16Parnok süngjangtem agi nenoki parnok metettsü. Nisungi ayidong nungi tsükmenatzü süshia, küyilakso nungi munguzünu süshia aonger ama? 17Anungji süngdong, tajung shia nung süngjang tajung atanger; saka süngdong tamajung nung süngjang tamajung atanger. 18Süngdong tajung nung süngjang tamajung atangtsü makok. Mesüra süngdong tamajung nung süngjang tajung atangtsü makok. 19#Mat. 3.10; Luk. 3.9 Koba süngdong nungsa süngjang tajung metanglir aji lepzüker aser mi nung enoker. 20Anungji parnok süngjang jagi nenoki parnok metettsü.

Ni Nenok Kodanga Memetet

(Luk. 13.25-27)

21“Kü dang ‘Kibuba, Kibuba’ ta ajar shiai kotak yimli aitsü makok; saka shibai kotak nung aliba kü Bui mulungbaji inyaker paji dang aitsü akok. 22Iba anogo nungji aikati kü dang ashitsü, ‘Kibuba, Kibuba, onoki ne tenüng nung meshinka ma, aser ne tenüng nung temenen tanelatem maridoka ma, aser ne tenüng nung yinket mapa tulu aika meinyaka ma?’ 23#TKe. 6.9 Idangji ni parnok dang metetdaktsütsü, ‘Ni nenok kodanga memetet; nenok tamajung inyakertem, ni nungi oadokang.’

Teyangerdak Kimung Ana

(Luk. 6.47-49)

24“Anungji shibaisa kü o itemi angashir, aser inyaker pa lungma nung ki asüba shisa taka nisung ka mesüka lir. 25Tzünglu alu, tzümetsüng adok, mopung aon, aser item jagi iba ki dakji nungshi; aser ibaji melao, kechiaser ibaji lung manung azüng. 26Shibaisa kü o itemi angashir aser meinyaker pa lisem ma nung ki asüba tamashi nisung ka mesüka alitsü. 27Tzünglu alu, tzümetsüng adok, mopung aon, aser item jagi iba ki dakji nungshi, aser iba kiji lao aser iba laobaji tulu liasü.” 28#Mar. 1.22; Luk. 4.32 Yisui item o jembimar külen teloki pai sayuba nungji süngmang. 29Kechiaser pai parnok dang tezülurtem ama masü, saka bangdak aketba nisung ka ama sayua liasü.

Currently Selected:

MATHI 7: AONAGABSI

Highlight

Copy